“Hupti ang Inyo Ikasarang sa Paghunahuna sing Maayo, Mangin Mabinantayon!”

1. Ano ang ginsugid ni Jesus sa iya mga disipulo kon san-o maabot ang katapusan, kag ano ang ginpaandam niya sa ila?

PILA ka adlaw antes napatay si Jesus, ginpamangkot sia sang apat niya ka disipulo: “Ano bala ang tanda . . . sang hingapusan sang sistema sang mga butang?” (Mat. 24:3) Posible nga nagapalibog ang iya mga disipulo kon paano nila mabal-an nga malapit na malaglag ang Jerusalem kag ang templo sini. Gani ginsugid ni Jesus sa ila ang parte sa kalaglagan sang Jerusalem kag sang templo sini. Pero magluwas sa sina, ginsugid man niya ang parte sa “hingapusan sang sistema sang mga butang” nga amo ang aton tion subong. Amo ini ang ginsiling ni Jesus kon san-o maabot ang katapusan: “Tuhoy sina nga adlaw ukon oras wala sing nakahibalo, bisan pa ang mga anghel sa langit ukon ang Anak, kundi ang Amay lamang.” Dayon ginpaandaman niya ang iya mga disipulo nga ‘magpadayon nga nagamata’ kag ‘padayon nga magbantay.’—Mar. 13:32-37.

2. Ngaa dapat magpadayon sa pagbantay ang mga Cristiano sang unang siglo?

² Para maluwas ang Judiyo nga mga Cristiano sang unang siglo, dapat sila magpadayon sa pagbantay. Ginsilingan ni Jesus ang iya mga sumulunod kon ano ang dapat nila bantayan para mabal-an nila nga malapit na malaglag ang Jerusalem kag ang templo sini. Nagsiling sia: “Kon makita ninyo nga ang Jerusalem ginalibutan sang kasuldadusan, hibalua ninyo nga ang paghapay sa iya malapit na.” Kon matabo ina, dapat nila sundon ang sugo ni Jesus nga “magpalagyo sa mga bukid.” (Luc. 21:20, 21) Naluwas ang mga nagsunod sa sini nga sugo sang ginlaglag sang mga Romano ang Jerusalem.

3. Ano ang binagbinagon naton sa sini nga artikulo?

³ Nagakabuhi na kita sa tion nga malapit na lang laglagon ining malain nga kalibutan. Gani dapat man naton huptan ang aton ikasarang sa paghunahuna sing maayo kag magpadayon sa pagbantay. Sa sini nga artikulo, binagbinagon naton kon paano naton dapat tamdon ang mga nagakatabo sa kalibutan, kon paano naton mapakita nga nagaandam kita, kag kon paano naton magamit sing maayo ang aton tion.

HUSTO NGA PAGTAMOD SA MGA NAGAKATABO SA KALIBUTAN

4. Ngaa dapat kita mangin interesado kon paano ang mga nagakatabo sa kalibutan nagapakita sang katumanan sang mga tagna sa Biblia?

⁴ Ang mga nagakatabo subong sa kalibutan nagapakita nga nagakatuman ang mga tagna sa Biblia. Gani dapat gid kita mangin interesado sa sini. Halimbawa, may ginsugid si Jesus nga mga hitabo nga magapakita nga malapit na lang malaglag ang kalibutan ni Satanas. (Mat. 24:3-14) Ginpalig-on kita ni apostol Pedro nga talupangdon naton ang katumanan sang mga tagna kay makabulig ini para magbakod pa gid ang aton pagtuo. (2 Ped. 1:19-21) Sa katapusan nga libro sang Biblia, amo ini ang mabasa naton sa umpisa sini: “Ini ang bugna nga ginhatag sang Dios kay Jesucristo agod ipakita sa iya mga ulipon ang mga butang nga pat-od nga mahanabo sa indi madugay.” (Bug. 1:1) Gani interesado gid kita sa mga nagakatabo sa kalibutan kay posible nga katumanan ini sang mga tagna sa Biblia. Kag posible nga gusto naton nga istoryahan ini nga topiko.

5. Ano ang indi naton dapat paghimuon, pero ano ang dapat naton himuon? (Tan-awa man ang mga piktyur.)

⁵ Pero, indi kita dapat maghaumhaum kon ginaistoryahan naton ang mga tagna sa Biblia. Ngaa? Bangod posible ini makaguba sang paghiusa sang kongregasyon. Halimbawa, posible magsiling ang mga lider sa kalibutan nga masolbar na nila ang kinagamo kag maeksperiensiahan na naton ang paghidait kag kalig-unan. Imbes nga maghinakop kita dayon nga matuman na ang tagna sa 1 Tesalonica 5:3, dapat anay naton usisaon ang pinakabag-o nga paathag sang aton mga publikasyon. Kon pirme naton ginabase ang aton mga ginasiling sa mga publikasyon nga ginhimo sang organisasyon ni Jehova, nagabulig kita para mahiusa ang kongregasyon “sa isa ka panghunahuna kag katuyuan.”—1 Cor. 1:10; 4:6.

6. Ano ang matun-an naton sa 2 Pedro 3:11-13?

⁶ Basaha ang 2 Pedro 3:11-13. Ginsugid ni apostol Pedro kon ano dapat ang aton motibo kon nagabinagbinag sang mga tagna sa Biblia. Nagsiling sia nga dapat naton ‘pirme dumdumon ang presensia sang adlaw ni Jehova.’ Ngaa? Gusto bala niya nga hibaluon naton kon san-o ang “adlaw kag oras” nga pahanabuon ni Jehova ang Armageddon? Indi. Sa baylo, gusto niya nga gamiton naton ang aton tion “may kaangtanan sa balaan nga paggawi kag sa mga buhat sang diosnon nga debosyon.” (Mat. 24:36; Luc. 12:40) Buot silingon, dapat naton pirme ipakita ang maayo nga paggawi kag siguraduhon naton nga nagaalagad kita kay Jehova bangod palangga naton sia. Gani, dapat kita mag-andam.

KON PAANO NATON MAPAKITA NGA NAGAANDAM KITA

7. Paano naton mapakita nga nagaandam kita? (Lucas 21:34)

⁷ Ginsilingan ni Jesus ang iya mga disipulo nga magbantay sa mga nagakatabo sa kalibutan. Pero ginsilingan man niya sila nga dapat sila mag-andam. Mabasa naton ang iya ginsiling sa Lucas 21:34. (Basaha.) Talupangda ang ginsiling ni Jesus: “Mag-andam kamo.” Kon nagaandam kita, alisto kita sa mga posible makaguba sang aton kaangtanan kay Jehova kag ginatinguhaan naton nga malikawan ini. Kon himuon naton ini, makapabilin kita sa gugma sang Dios.—Hulu. 22:3; Jud. 20, 21.

8. Ano ang ginpalig-on ni apostol Pablo sa mga Cristiano?

⁸ Ginpalig-on ni apostol Pablo ang mga Cristiano nga mag-andam. Halimbawa, ginsilingan niya ang mga Cristiano sa Efeso: “Padayon nga bantayi sing maayo nga ang inyo paglakat indi kaangay sang indi maalam kundi sang maalam nga mga tawo.” (Efe. 5:15, 16) Ginatinguhaan ni Satanas nga gub-on ang aton kaangtanan kay Jehova. Para indi kita madaug ni Satanas, ginalaygayan kita sang Biblia nga dapat naton ‘padayon nga hantupon kon ano ang kabubut-on ni Jehova.’—Efe. 5:17.

9. Paano naton mahantop ang kabubut-on ni Jehova?

⁹ Wala ginasugid sang Biblia ang tanan nga posible makaguba sang aton pagpakig-abyan kay Jehova. Sa masami, may mga butang nga dapat naton desisyunan nga wala ginabinagbinag sa Kasulatan. Para makahimo kita sang maayo nga mga desisyon, dapat naton hantupon, ukon hibaluon, “ang kabubut-on ni Jehova.” Makabulig sa aton ang regular nga pagtuon sang Pulong sang Dios kag pagpamalandong sa sini. Kon nahantop naton kon ano ang kabubut-on ni Jehova kag yara sa aton “ang hunahuna sang Cristo,” mangin “maalam” kita bisan pa wala sing may ginasiling ang Biblia parte sa dapat naton himuon sa isa ka sitwasyon. (1 Cor. 2:14-16) Kon kaisa, mahapos lang mabal-an ang mga dapat naton likawan. Pero may mga tion man nga mabudlay ini mabal-an.

10. Ano ang mga dapat naton likawan?

¹⁰ Nalakip sa mga dapat naton likawan amo ang pagpakiat, sobra nga pag-inom, sobra nga pagkaon, paghambal sing makasakit sa iban, pagtan-aw sing mapintas nga mga programa, pornograpiya, kag iban pa nga pareho sini. (Sal. 101:3) Ginatinguhaan gid sang aton kaaway, nga amo ang Yawa, nga maguba ang aton pagpakig-abyan kay Jehova. (1 Ped. 5:8) Gusto ni Satanas nga impluwensiahan ang aton hunahuna kag tagipusuon para mahisa kita sa iban, magbinutig, mangin makagod, dumtan ang iban, mangin bugalon, kag maghinakit. Gani, dapat gid kita magbantay. (Gal. 5:19-21) Posible nga sa primero daw makontrol pa naton ini nga mga panghunahuna kag balatyagon. Pero pareho sa makahililo nga tanom, kon wala kita sing himuon para madula ini dayon sa aton hunahuna kag tagipusuon, mahalitan gid kita sa ulihi.—Sant. 1:14, 15.

11. Ano ang isa ka katalagman nga daw indi hilmunon nga dapat naton likawan, kag ngaa?

¹¹ Ang malain nga kaupdanan amo ang isa ka katalagman nga daw indi hilmunon. Binagbinaga ini nga sitwasyon. May kaupod ka sa obra nga indi Saksi ni Jehova. Gusto mo nga manami ang isiling niya parte sa mga Saksi ni Jehova, gani nagapakita ka sa iya sing kaayo kag ginabuligan mo sia. May mga bes nga ginahagad ka niya nga magdungan kamo panyaga kag nagapasugot ka. Sang ulihi, pirme na kamo nagaupdanay panyaga. May mga bes nga kon nagaistoryahanay kamo, ginasal-utan niya ini sing binastos. Sang primero, daw indi ka komportable sa sini nga topiko. Pero sang ulihi, daw wala na ini sing epekto sa imo. Dayon isa ka bes, sang ginhagad ka niya nga mag-inom pagkatapos sang inyo obra, nagpasugot ka. Sang ulihi, amat-amat mo nga nailog kon paano sia nagahunahuna. Sigurado nga sa indi madugay mailog mo man ang iya mga ginahimo. Siempre, dapat kita magpakita sing kaayo kag respeto sa tanan. Pero dapat naton dumdumon nga kon pirme kita nagaupod sa isa ka tawo, maimpluwensiahan gid niya kita. (1 Cor. 15:33) Gani, importante gid nga sundon naton ang ginsiling ni Jesus nga dapat kita mag-andam. Makabulig ini sa aton nga indi makig-upod sa mga tawo nga wala nagasunod sa kasuguan ni Jehova. (2 Cor. 6:15) Kon mag-andam kita, makita naton ang katalagman kag malikawan ini.

GAMITA SING MAAYO ANG IMO TION

12. Ano ang ginhimo sang mga disipulo ni Jesus samtang ginahulat nila ang katapusan?

¹² Gusto ni Jesus nga mangin masako ang iya mga disipulo samtang ginahulat nila ang katapusan. Gani, ginhatagan niya sila sang hilikuton. Ginsugo niya sila nga ibantala ang maayong balita “sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:6-8) Madamo gid sang dapat himuon ang mga sumulunod ni Jesus para matuman nila ini nga sugo. Paagi sa paggamit sing maayo sang ila tion, nahimo nila ang ila bug-os nga masarangan para bantalaan ang iban.

13. Ngaa dapat naton gamiton sing maayo ang aton tion? (Colosas 4:5)

¹³ Basaha ang Colosas 4:5. Para mapakita naton nga nagaandam kita, dapat naton gamiton sing maayo ang aton tion. Posible nga maapektuhan kita sang “wala ginapaabot nga hitabo.” (Man. 9:11) Kag posible nga mapatay kita sa tion nga wala naton ginapaabot.

14-15. Paano naton magamit sing maayo ang aton tion? (Hebreo 6:11, 12) (Tan-awa man ang piktyur.)

¹⁴ Magamit naton sing maayo ang aton tion kon gamiton naton ini para himuon ang kabubut-on ni Jehova kag pabakuron ang aton kaangtanan sa iya. (Juan 14:21) Dapat “mangin malig-on [kita], mapag-on, kag madamo pirme sing ginahimo sa hilikuton sang Ginuo.” (1 Cor. 15:58) Gani bisan pa mapatay kita ukon malaglag na ining malain nga kalibutan, indi gid kita maghinulsol kay gingamit naton sing maayo ang aton tion.—Mat. 24:13; Roma 14:8.

¹⁵ Subong, padayon nga ginapangunahan ni Jesus ang pagbantala sang iya mga disipulo parte sa Ginharian sang Dios sa bug-os nga duta. Gintuman niya ang iya promisa sa aton. Sa aton mga miting kag paagi sa aton mga publikasyon, ginahanas kita ni Jesus kon paano ibantala ang maayong balita. Ginahatagan man niya kita sang tanan naton nga kinahanglan para matuman ini nga hilikuton. (Mat. 28:18-20) Gani, dapat kita mangin mapisan sa pagbantala kag pagtudlo sa iban. Dapat man kita padayon nga magbantay samtang ginahulat naton nga laglagon na ni Jehova ini nga kalibutan. Kon iaplikar naton ang laygay sang Hebreo 6:11, 12, mahuptan naton nga malig-on ang aton paglaum “tubtob sa katapusan.”—Basaha.

16. Ano ang determinado naton nga himuon?

¹⁶ May ginpat-od na nga adlaw kag oras si Jehova kon san-o niya laglagon ang kalibutan ni Satanas. Kon mag-abot na ina nga tion, tumanon ni Jehova ang tanan nga gintagna niya sa iya Pulong parte sa bag-ong kalibutan. Pero kon kaisa, posible magbatyag kita nga daw kadugay tapuson ni Jehova ini nga kalibutan. Kon mabatyagan mo ina, dumduma nga ‘indi maulihi’ ang adlaw ni Jehova. (Hab. 2:3) Gani, kabay pa nga padayon kita nga ‘magabantay nga nagahulat kay Jehova’ kag ipakita naton ang “nagahulat nga panimuot sa Dios nga magaluwas sa [aton].”—Miq. 7:7.