Iluga ang Matutom nga mga Anghel

1-2. (a) Ano ang kinalain sa aton sang mga anghel? (b) Ano ang pagkaanggid naton sa mga anghel?

BILANG katawhan ni Jehova, bahin kita sang isa ka mahigugmaon nga pamilya nga nagasimba sa iya. Nalakip sa sini nga pamilya ang aton mga kauturan sa bilog nga kalibutan kag ang minilyon nga mga anghel. (Dan. 7:​9, 10) Kon ginahunahuna naton ang parte sa mga anghel, posible mapensaran naton kon ano ang mga kinalain nila sa aton. Halimbawa, sang gintuga ang mga tawo, madugay na nga nagaluntad ang mga anghel. (Job 38:​4, 7) Mas gamhanan ang mga anghel sangsa aton. Mas balaan man sila kag mas matarong sangsa aton bangod indi kita perpekto.​—Luc. 9:26.

² Pero, madamo man kita sang pagkaanggid sa mga anghel. Halimbawa, pareho sa mga anghel, mailog naton ang dalayawon nga mga kinaiya ni Jehova kag may kahilwayan kita sa pagdesisyon. Pareho sa ila, may personal kita nga mga ngalan, sarisari ang aton mga personalidad, kag lainlain ang aton mga asaynment sa pag-alagad kay Jehova. Kag pareho sa mga anghel, dapat naton simbahon ang aton Manunuga.​—1 Ped. 1:12.

3. Ano ang matun-an naton sa matutom nga mga anghel?

³ Bangod madamo kita sang pagkaanggid sa mga anghel, mapalig-on kita sang ila maayo nga halimbawa kag madamo kita sang matun-an sa ila. Sa sini nga artikulo, binagbinagon naton kon paano naton mailog ang pagkamapainubuson sang matutom nga mga anghel, ang ila pagpalangga sa mga tawo, ang ila pagbatas, kag ang ila mga ginahimo para mangin matinlo pirme ang kongregasyon.

MAPAINUBUSON ANG MGA ANGHEL

4. (a) Paano ginapakita sang mga anghel ang pagkamapainubuson? (b) Ngaa mapainubuson ang mga anghel? (Salmo 89:7)

⁴ Mapainubuson ang matutom nga mga anghel. Bisan pa eksperiensiado sila, gamhanan, kag maalam, ginatuman nila ang mga instruksion ni Jehova. (Sal. 103:20) Wala nila ginapabugal ang ila mga asaynment, kag wala nila ginapadayaw ang ila gahom. Nalipay sila nga tumanon si Jehova bisan pa wala kabalo ang iban sang ila ngalan.a (Gen. 32:​24, 29; 2 Hari 19:35) Wala nila ginabaton ang kadungganan nga para kay Jehova. Ngaa mapainubuson gid ang mga anghel? Bangod palangga nila si Jehova kag ginarespeto gid nila sia.​—Basaha ang Salmo 89:7.

5. Paano ginpakita sang isa ka anghel ang pagkamapainubuson sang gintadlong niya si apostol Juan? (Tan-awa man ang piktyur.)

⁵ Binagbinaga ang isa ka hitabo nga nagapakita nga mapainubuson ang mga anghel. Sang mga 96 C.E., may isa ka anghel nga wala ginsambit ang ngalan nga nagpakita sang dalayawon nga palanan-awon kay apostol Juan. (Bug. 1:1) Ano ang reaksion ni Juan sa sini nga palanan-awon? Nagluhod sia para simbahon ang anghel. Pero, ginpunggan sia dayon sang mainunungon nga anghel. Nagsiling sia: “Maghalong ka! Indi ina paghimua! Masigkaulipon mo lamang ako kag sang imo mga kauturan . . . Simbaha ang Dios!” (Bug. 19:10) Mapainubuson gid ini nga anghel. Indi niya gusto nga padunggan sia ukon dayawon. Gani, ginsilingan niya dayon si Juan nga si Jehova nga Dios ang dapat simbahon. Pero, wala man ginpakanubo sang anghel si Juan. Bisan pa mas madugay na nga nagaalagad kay Jehova ini nga anghel kag mas gamhanan sia sangsa kay Juan, mapainubuson gid sia kay gintawag niya si Juan nga masigkaulipon niya. Kag bisan pa gintadlong niya si Juan, wala niya gin-akigan ang tigulang na nga apostol kag wala niya sia ginhambalan sing masakit. Sa baylo, mainayuhon ang iya paagi sang paghambal. Posible narealisar niya nga nahalawhaw gid si Juan sa iya nakita amo nga nagluhod sia.

6. Paano naton mailog ang pagkamapainubuson sang mga anghel?

⁶ Paano naton mailog ang pagkamapainubuson sang mga anghel? Indi naton dapat pag-ipabugal ang aton mga asaynment ukon indi naton dapat pagtinguhaan nga kita ang dayawon sa aton mga hinimuan. (1 Cor. 4:7) Indi man naton dapat paghunahunaon nga mas maayo kita sangsa iban bangod madugay na kita nga nagaalagad kay Jehova ukon may mga pribilehiyo kita. Ang matuod, kon mas madamo ang aton pribilehiyo, dapat mas kubos ang pagtan-aw naton sa aton kaugalingon. (Luc. 9:48) Pareho sa mga anghel, gusto man naton nga mag-alagad sa iban. Indi naton gusto nga hunahunaon sang iban nga mas maayo kita sangsa ila.

7. Paano naton mapakita ang pagkamapainubuson kon kinahanglan naton tadlungon ukon laygayan ang iban?

⁷ Kon kinahanglan naton tadlungon ukon laygayan ang isa ka utod ukon ang aton bata, mapakita man naton ang pagkamapainubuson. May mga tion nga dapat mangin prangka kita sa aton paglaygay. Sa bahin sang anghel nga nagtadlong kay Juan, prangka sia pero mainayuhon. Puede man naton prangkahon ang aton ginalaygayan, pero indi ini dapat makapaluya sang iya buot. Kon nagalaygay kita nga nabase sa Biblia, dapat mangin matinahuron kita kag mahigugmaon. Mahimo naton ini kon wala naton ginakabig ang aton kaugalingon nga mas maayo sangsa iban.​—Col. 4:6.

PALANGGA SANG MGA ANGHEL ANG MGA TAWO

8. (a) Suno sa Lucas 15:​10, paano ginapakita sang mga anghel nga palangga nila ang mga tawo? (b) Paano kita ginabuligan sang mga anghel sa aton pagbantala? (Tan-awa man ang piktyur.)

⁸ Wala ginabalewala sang mga anghel ang nagakatabo sa mga tawo, kag wala nila ginahunahuna nga indi kita importante. Sa baylo, palangga nila ang mga tawo. Nalipay sila kon maghinulsol ang isa nga nakahimo sang serioso nga sala kag magbalik sia kay Jehova. Nalipay man sila kon maghimo sang pagbag-o ang isa ka tawo para maalagad niya si Jehova. (Basaha ang Lucas 15:10.) Ginabuligan man kita sang mga anghel sa aton pagbantala. (Bug. 14:6) Bisan pa wala nila direkta nga ginabantalaan ang mga tawo, posible nga giyahan nila kita sa isa ka tawo nga interesado magtuon parte kay Jehova. Siempre, indi naton masigurado kon bala mga anghel gid ang naggiya sa aton nga kadtuan ang isa ka tawo. Kay man, madamo pa sang puede gamiton si Jehova. Puede man niya gamiton ang iya balaan nga espiritu para buligan ang mga tawo nga gusto magtuon parte sa iya kag para giyahan ang iya mga alagad. (Binu. 16:​6, 7) Pero ginagamit niya pirme ang iya mga anghel. Gani kon nagabantala kita, makasalig kita nga ginabuligan gid kita sang mga anghel.​—Tan-awa ang kahon nga “Ginsabat ang Ila mga Pangamuyo.”b

9. Paano naton mailog ang pagpalangga sang mga anghel sa mga tawo?

⁹ Paano naton mailog ang pagpalangga sang mga anghel sa mga tawo? Kon ginpabalo sa kongregasyon ang parte sa pagpanumbalik sang isa nga nag-untat sa pag-alagad kay Jehova, dapat kita malipay pareho sa mga anghel. Dayon abiabihon naton sia kag isugid naton sa iya nga palangga naton sia. (Luc. 15:​4-7; 2 Cor. 2:​6-8) Mailog man naton ang mga anghel paagi sa pagbantala sa bug-os naton nga masarangan. (Man. 11:6) Kag pareho sa ginahimo sang mga anghel, puede man naton buligan ang aton mga kauturan sa ila pagministeryo. Halimbawa, puede naton updan sa pagbantala ang mga bag-uhan. Puede man naton buligan ang mga may edad na ukon ang mga may problema sa panglawas sa ila pagministeryo.

10. Ano ang matun-an naton sa eksperiensia ni Sara?

¹⁰ Ano abi kon limitado na lang ang aton mahimo sa aton pag-alagad kay Jehova bangod sa aton kahimtangan? Makasalig kita nga buligan kita gihapon sang mga anghel sa aton pagbantala. Binagbinaga ang eksperiensia sang isa ka sister sa India nga si Sara.c Sang mga 20 ka tuig na sia nga nagapayunir, nagmasakit sia kag indi na sia makabangon. Gani, na-depress gid sia. Pero bangod ginbuligan sia sang mga kauturan kag regular sia nga nagabasa sang Biblia, amat-amat sia nga nangin malipayon liwat sa iya pag-alagad. Siempre, kinahanglan niya mag-adjust sa iya paagi sa pagbantala bangod sa iya kahimtangan. Bangod indi sia makapungko para maghimo sang mga sulat, pagpanaksi lang gid paagi sa telepono ang iya mahimo. Gani gintawgan niya ang iya mga return visit. Nagsiling ang iya mga return visit nga may mga kilala sila nga posible interesado man magtuon sang Biblia. Ano ang resulta? Sa sulod sang pila lang ka bulan, 70 na ang Bible study ni Sara. Pero indi niya masarangan nga i-Bible study sila tanan, gani ginhatag niya sa iban nga kauturan ang pila sa ila. Madamo sa sini nga mga study ang naga-attend na sa aton mga miting. Sigurado nga nalipay gid ang mga anghel sa pagbulig sa mga kauturan, pareho kay Sara, nga nagahimo sang ila bug-os nga masarangan sa pagbantala.

NAGABATAS ANG MGA ANGHEL

11. Paano ginapakita sang matutom nga mga anghel ang ila tumalagsahon nga pagbatas?

¹¹ Maayo gid nga halimbawa sa pagbatas ang matutom nga mga anghel. Linibo ka tuig na nga ginabatas nila ang inhustisya kag kalainan. Nakita nila ang pagrebelde ni Satanas kag sang madamo nga anghel nga kaupod nila nga nagaalagad kay Jehova sang una. (Gen. 3:1; 6:​1, 2; Jud. 6) Ginasugiran man kita sang Biblia parte sa isa ka matutom nga anghel nga direkta nga ginpamatukan sang isa ka gamhanan nga demonyo. (Dan. 10:13) Kag kon ikumparar sa kadamuon sang mga tawo halin sang panahon nanday Adan kag Eva asta subong, diutay lang gid nga mga tawo ang nakita sang mga anghel nga nagdesisyon nga mag-alagad kay Jehova. Pero bisan pa sa sini tanan, malipayon kag makugi gihapon nga nagaalagad kay Jehova ining matutom nga mga anghel. Kabalo sila nga may gintalana na nga tion ang Dios para dulaon ang tanan nga inhustisya.

12. Ano ang makabulig sa aton nga makabatas?

¹² Paano naton mailog ang pagbatas sang mga anghel? Pareho sa mga anghel, posible may makita kita nga mga inhustisya ukon pamatukan man kita. Pero pareho sa ila, kabalo kita nga may gintalana na nga tion ang Dios para dulaon ang tanan nga kalainan. Gani pareho sa matutom nga mga anghel, ‘wala kita nagapangampo sa paghimo sing maayo.’ (Gal. 6:9) Kag nagapromisa ang Dios nga buligan niya kita nga makabatas. (1 Cor. 10:13) Puede naton ipangamuyo kay Jehova ang iya espiritu kay makabulig ini sa aton nga mapakita ang pagkamapinasensiahon kag kalipay. (Gal. 5:22; Col. 1:11) Ano naman ang himuon mo kon pamatukan ka? Magsalig sing bug-os kay Jehova, kag indi mahadlok. Buligan ka gid pirme ni Jehova kag pabakuron ka niya.​—Heb. 13:6.

NAGABULIG ANG MGA ANGHEL PARA MANGIN MATINLO ANG KONGREGASYON

13. Ano ang pinasahi nga asaynment sang mga anghel sa tion sang katapusan nga mga adlaw? (Mateo 13:​47-49)

¹³ Sa tion sang katapusan nga mga adlaw, ginhatagan ni Jehova sing pinasahi nga asaynment ang mga anghel. (Basaha ang Mateo 13:​47-49.) Minilyon ka tawo sa bilog nga kalibutan ang interesado sa maayong balita. Ang iban sa ila naghimo sang mga pagbag-o para maalagad nila si Jehova sa husto nga paagi, pero ang iban naman wala. Ginhatagan sing asaynment ang mga anghel nga ‘painon ang mga malauton gikan sa mga matarong.’ Gani, nagabulig sila para mangin matinlo pirme ang kongregasyon. Pero, buot silingon bala sini nga indi na puede makabalik ang mga nag-untat sa pag-alagad kay Jehova bisan ano pa ang rason sang ila pag-untat? Indi amo sina ang buot silingon sini. Indi man buot silingon sini nga indi gid makaeksperiensia sang mga problema ang mga kongregasyon. Pero, makasalig kita nga nagapangabudlay gid ang mga anghel para mangin matinlo pirme ang aton mga kongregasyon.

14-15. Bilang pag-ilog sa mga anghel, paano naton mapakita nga gusto naton nga mangin matinlo pirme ang kongregasyon? (Tan-awa man ang mga piktyur.)

¹⁴ Bilang pag-ilog sa mga anghel, paano naton mapakita nga gusto naton nga mangin matinlo pirme ang kongregasyon? Himuon naton ang mga dapat naton himuon para mangin matinlo pirme sa moral kag sa espirituwal ang aton kongregasyon. Ano ang mga dapat naton himuon? Dapat naton amligan ang aton tagipusuon paagi sa pagpili sang maayo nga mga abyan kag paagi sa paglikaw sa malain nga mga impluwensia. (Sal. 101:3) Mabuligan man naton ang aton mga kauturan nga magpabilin nga matutom kay Jehova. Halimbawa, ano ang dapat naton himuon kon nabal-an naton nga nakahimo sang serioso nga sala ang isa ka utod? Bangod palangga naton sia, palig-unon naton sia nga magtu-ad sa mga gulang. Kon indi niya ini paghimuon, dapat naton isugid sa mga gulang ang parte sa iya nahimo. Gusto naton nga mabuligan dayon ang aton utod nga maluya sa espirituwal.​—Sant. 5:​14, 15.

¹⁵ Makapasubo nga kinahanglan sikwayon sa kongregasyon ang pila nga nakahimo sang serioso nga mga sala. Kon matabo ini, “untatan [naton] ang pagpakig-upod” sa ila.d (1 Cor. 5:​9-13) Nagabulig ini nga kahimusan para mangin matinlo pirme ang kongregasyon. Ang matuod, ginapakitaan naton sang kaayo ang mga ginsikway kon untatan naton ang pagpakig-upod sa ila. Kay man, paagi sa sini, posible marealisar nila nga dapat sila magbalik kay Jehova. Kag kon magbalik sila, malipay gid kita pareho sa ginabatyag ni Jehova kag sang mga anghel.​—Luc. 15:7.

16. Ano nga mga kinaiya sang mga anghel ang gusto mo ilugon?

¹⁶ Nalipay gid kita nga ginpaposible ni Jehova nga makatuon kita parte sa mga anghel kag makaupod sila sa pag-alagad. Gani ilugon naton ang ila maayo nga mga kinaiya: ang ila pagkamapainubuson, ang ila pagpalangga sa mga tawo, ang ila pagbatas, kag ang ila mga ginahimo para mangin matinlo pirme ang kongregasyon. Kon ilugon naton ang matutom nga mga anghel, mangin bahin man kita sang pamilya ni Jehova kag masimba naton sia asta sa wala sing katapusan.