Daw Ano ka Importante kay Jesus ang Ngalan ni Jehova?

1-2. (a) Ano ang ginhimo ni Jesus sang gab-i antes sia ginpatay? (b) Ano nga mga pamangkot ang binagbinagon naton sa sini nga artikulo?

HUEBES sadto sang gab-i, Nisan 14, 33 C.E. Lapit na lang luiban, hukman, pakalainon, paantuson, kag patyon si Jesus. Bag-o lang sia katapos sang espesyal nga panyapon upod sa iya matutom nga mga apostoles. Pagkatapos nila panyapon, ginpalig-on sila ni Jesus. Antes sila tanan naghalin, nangamuyo si Jesus kag importante gid ang iya ginsiling. Mabasa naton ini nga pangamuyo sa Juan kapitulo 17.

² Base sa pangamuyo ni Jesus, ano gid ang iya ginakabalak-an sadto nga tion? Ano gid ang importante sa iya sang ari sia sa duta? Binagbinagon naton ang mga sabat sa sini nga mga pamangkot.

“GINPAKILALA KO ANG IMO NGALAN SA ILA”

3. Ano ang ginsiling ni Jesus parte sa ngalan ni Jehova, kag ano ang buot niya silingon? (Juan 17:​6, 26)

³ Sa pangamuyo ni Jesus, nagsiling sia: “Ginpakilala ko ang imo ngalan sa ila.” Ang matuod, duha ka beses niya nga ginsambit nga ginpakilala niya ang ngalan ni Jehova sa iya mga disipulo. (Basaha ang Juan 17:​6, 26.) Ano ang buot niya silingon? Ginsugid bala niya sa ila nga Jehova ang ngalan sang Dios? Mga Judiyo ang mga disipulo ni Jesus, gani kabalo na sila sang ngalan sang Dios. Kay man, mabasa ang ngalan ni Jehova sing linibo ka beses sa Hebreong Kasulatan. Gani, indi ang personal nga ngalan sang Dios ang ginpatuhuyan ni Jesus, kundi kon ano Sia nga klase sang Dios. Ginbuligan ni Jesus ang iya mga disipulo nga mas makilala sing maayo si Jehova. Nalakip sa sini ang katuyuan ni Jehova para sa duta kag sa mga tawo, ang iya mga ginhimo, ang iya himuon sa palaabuton, kag ang iya mga kinaiya. Si Jesus lang gid ang makapaathag sini sing maayo.

4-5. (a) Maghatag sing halimbawa nga nagapakita nga puede mangin importante sa aton ang ngalan sang isa ka tawo. (b) Paano mas nakilala sing maayo sang mga disipulo ni Jesus si Jehova?

⁴ Ibutang ta nga may gulang sa inyo kongregasyon nga si David. Isa man sia ka doktor, kag tinuig na kamo nga kilalahay. Isa ka adlaw, nabutang sa peligro ang imo kabuhi gani gindala ka sa ospital. Nagaobra sa sini nga ospital ang gulang nga si David, kag ginluwas niya ang imo kabuhi. Bangod sini, mas ginpalangga mo pa gid sia. Sa kada tion nga mabatian mo ang iya ngalan, madumduman mo ang ginhimo niya para sa imo. Gani para sa imo, indi lang isa ka gulang si David nga madugay mo na nga kilala, kundi sia man ang doktor nga nagluwas sang imo kabuhi.

⁵ Sing kaanggid, kabalo na nga daan ang mga disipulo ni Jesus sang ngalan ni Jehova. Pero nangin importante pa gid sa ila ini nga ngalan bangod ginbuligan sila ni Jesus nga mas makilala sing maayo si Jehova. Ngaa masiling naton ini? Bangod ginpakita ni Jesus ang personalidad sang iya Amay sa tanan niya nga ginsiling kag ginhimo. Gani paagi sa pagpamati sa mga gintudlo ni Jesus kag pag-obserbar sa kon paano niya gintratar ang mga tawo, ‘nakilala’ sing maayo sang iya mga apostoles si Jehova.​—Juan 14:9; 17:3.

“SA IMO NGALAN, NGA GINHATAG MO SA AKON”

6. Ano ang buot silingon nga ginhatag ni Jehova ang iya ngalan kay Jesus? (Juan 17:​11, 12)

⁶ Sang nangamuyo si Jesus para sa iya mga disipulo, nagsiling sia: “Bantayi sila tungod sa imo ngalan, nga ginhatag mo sa akon.” (Basaha ang Juan 17:​11, 12.) Ginapahangop bala sini nga mangin Jehova na ang ngalan ni Jesus? Indi. Talupangda nga sa pangamuyo ni Jesus, ginpatuhuyan niya ang ngalan ni Jehova nga “imo ngalan.” Gani, wala ginapahangop ni Jesus nga mangin Jehova na ang iya ngalan. Ti, ano ang buot silingon ni Jesus sang nagsiling sia nga ginhatag sa iya ang ngalan sang Dios? Una, si Jesus ang representante kag humalambal ni Jehova. Nagkadto sia sa duta kag naghimo sia sang mga milagro sa ngalan sang iya Amay. (Juan 5:43; 10:25) Ikaduha, ang ngalan nga Jesus nagakahulugan sing “Si Jehova ang Kaluwasan.” Gani, nalakip sa kahulugan sang ngalan ni Jesus ang ngalan ni Jehova.

7. Maghatag sing halimbawa nga nagapakita nga puede maghambal si Jesus sa ngalan ni Jehova.

⁷ Binagbinaga ini nga halimbawa. Ang isa ka embahador amo ang representante sang presidente sa isa ka pungsod. Gani may awtoridad ang embahador nga maghambal para sa presidente. Sing kaanggid, may awtoridad si Jesus nga maghambal para kay Jehova bangod representante sia ni Jehova.​—Mat. 21:9; Luc. 13:35.

8. Ngaa nagsiling si Jehova nga “yara” ang iya ngalan kay Jesus antes magkadto si Jesus sa duta? (Exodo 23:​20, 21)

⁸ Gintawag si Jesus nga “ang Pulong” bangod gingamit sia ni Jehova para isugid sa mga anghel kag mga tawo ang gusto Niya nga himuon nila. (Juan 1:​1-3) Posible nga si Jesus amo ang anghel nga ginpadala ni Jehova nga magbulig sa mga Israelinhon sang ara sila sa kamingawan. Sang ginsilingan sila ni Jehova nga dapat nila tumanon ini nga anghel, amo ini ang ginsiling niya nga rason: “Bangod yara sa iya ang akon ngalan.”a (Basaha ang Exodo 23:​20, 21.) Gani “yara” kay Jesus ang ngalan ni Jehova bangod ginarepresentar niya si Jehova kag sia ang panguna nga nagapangapin kag nagapakabalaan sa ngalan sang iya Amay.

“AMAY, HIMAYAA ANG IMO NGALAN”

9. Daw ano ka importante kay Jesus ang ngalan ni Jehova? Ipaathag.

⁹ Base sa aton bag-o lang nabinagbinag, importante gid kay Jesus ang ngalan ni Jehova antes pa sia magkadto sa duta. Gani sang ari na sia sa duta, makita gid sa tanan niya nga ginhimo kon daw ano ini ka importante sa iya. Sang lapit na lang matapos ang iya ministeryo, nangabay sia kay Jehova: “Amay, himayaa ang imo ngalan.” Nagsabat dayon ang iya Amay paagi sa isa ka mabaskog nga tingog halin sa langit: “Ginhimaya ko na ini kag himayaon ko ini liwat.”​—Juan 12:28.

10-11. (a) Paano ginhimaya ni Jesus ang ngalan ni Jehova? (Tan-awa man ang piktyur.) (b) Ngaa kinahanglan pakabalaanon kag ibindikar ang ngalan ni Jehova?

¹⁰ Ginhimaya man ni Jesus ang ngalan sang iya Amay. Paano? Ginsugid niya sa iban ang dalayawon nga mga kinaiya kag mga ginahimo sang iya Amay. Pero, may ginhimo pa gid si Jesus. Kay man, dapat pakabalaanon ang ngalan ni Jehova kag dapat ibindikar ang iya reputasyon.b Ginpakita ni Jesus kon daw ano ini ka importante sang gintudluan niya ang iya mga disipulo kon paano mangamuyo. Nagsiling sia: “Amay namon nga yara sa langit, pakabalaanon ang imo ngalan.”​—Mat. 6:9.

¹¹ Ngaa dapat pakabalaanon kag ibindikar ang ngalan ni Jehova? Bangod ginpakahuy-an kag ginpasipalahan ni Satanas nga Yawa ang ngalan ni Jehova nga Dios sa hardin sang Eden. Ginpagua ni Satanas nga butigon si Jehova kag may maayo nga butang nga indi Niya gusto ihatag kanday Adan kag Eva. (Gen. 3:​1-5) Ginpagua man ni Satanas nga indi husto ang paagi ni Jehova sa paggahom. Ginguba sining mga kabutigan ni Satanas ang reputasyon, ukon ngalan, ni Jehova. Sang ulihi, sang panahon ni Job, nagsiling si Satanas nga nagaalagad lang ang mga tawo kay Jehova bangod sa kaayuhan nga makuha nila. Nagsiling man si Satanas nga kon makaeksperiensia sang kabudlayan ang mga alagad ni Jehova, mauntat sila sa pag-alagad sa Iya kay indi nila Sia palangga. (Job 1:​9-11; 2:4) Gani, kinahanglan ang tion para pamatud-an kon sin-o gid ang butigon. Si Jehova bala ukon si Satanas?

“GINAHATAG KO ANG AKON KABUHI”

12. Ano ang handa nga himuon ni Jesus bangod palangga niya si Jehova?

¹² Bangod palangga ni Jesus si Jehova, himuon niya ang tanan para mapakabalaan niya kag mabindikar ang ngalan ni Jehova. Nagsiling si Jesus: “Ginahatag ko ang akon kabuhi.” (Juan 10:​17, 18) Handa pa gani sia nga mapatay para sa ngalan ni Jehova.c Sa bahin ni Adan kag ni Eva nga una nga perpekto nga mga tawo, nagrebelde sila kay Jehova kag nagdampig sila kay Satanas. Indi pareho sa ila, handa si Jesus nga magkadto sa duta kag pamatud-an ang iya gugma kay Jehova. Ginhimo niya ini paagi sa pagtuman sing bug-os kay Jehova. (Heb. 4:15; 5:​7-10) Nagpabilin nga matutom si Jesus sa bilog niya nga kabuhi asta sa iya masakit nga kamatayon. (Heb. 12:2) Paagi sa sini, ginpamatud-an niya ang iya gugma kay Jehova kag sa Iya ngalan.

13. Ngaa si Jesus gid ang makapamatuod nga butigon si Satanas? (Tan-awa man ang piktyur.)

¹³ Sa bilog nga kabuhi ni Jesus, ginpamatud-an niya nga si Satanas ang butigon, indi si Jehova. (Juan 8:44) Si Jesus gid ang mas nakakilala kay Jehova kon ikumparar sangsa kay bisan sin-o. Gani kon may matuod gid man sa mga akusasyon ni Satanas kay Jehova, sigurado nga mabal-an ini ni Jesus. Pero malig-on nga ginpangapinan ni Jesus ang reputasyon, ukon ngalan, ni Jehova. Bisan pa may tion nga daw wala sia gin-amligan ni Jehova, handa si Jesus nga mapatay kag wala gid niya nahunahuna nga talikdan ang iya mahigugmaon nga Amay.​—Mat. 27:46.d

“NATAPOS KO ANG BULUHATON NGA GINHATAG MO SA AKON”

14. Paano ginpadyaan ni Jehova ang katutom ni Jesus?

¹⁴ Sa pangamuyo ni Jesus sang gab-i antes sia napatay, nagsiling sia: “Natapos ko ang buluhaton nga ginhatag mo sa akon.” Nagsalig gid si Jesus nga padyaan ni Jehova ang iya katutom. (Juan 17:​4, 5) Kag husto gid nga nagsalig sia sa iya Amay. Kay man, ginbanhaw sia ni Jehova. (Binu. 2:​23, 24) Dayon ginhatagan niya si Jesus sang mataas gid nga posisyon sa langit. (Fil. 2:​8, 9) Sang ulihi, nag-umpisa sa paggahom si Jesus bilang Hari sang Ginharian sang Dios. Ano ang himuon sini nga Ginharian? Ginsabat ini ni Jesus sang gintudluan niya ang iya mga disipulo kon paano mangamuyo. Nagsiling sia: “Magkari ang imo Ginharian. Matuman ang imo kabubut-on [ang kabubut-on ni Jehova] sa duta subong sang sa langit.”​—Mat. 6:10.

15. Ano pa ang himuon ni Jesus?

¹⁵ Sa indi na lang gid madugay, magapakig-away si Jesus sa mga kaaway sang Dios kag laglagon niya ang mga malauton sa Armageddon. (Bug. 16:​14, 16; 19:​11-16) Pagkatapos sini, itagbong niya si Satanas “sa kadadalman,” gani wala na sing mahimo si Satanas. (Bug. 20:​1-3) Dayon sa tion sang Isa ka Libo ka Tuig nga Paggahom ni Jesus, paluntaron niya ang paghidait sa duta kag buligan niya nga mangin perpekto ang mga tawo. Banhawon man niya ang mga patay, kag himuon niya nga paraiso ang bilog nga duta. Gani, matuman ang katuyuan ni Jehova.​—Bug. 21:​1-4.

16. Ano na ang mangin kahimtangan pagkatapos sang Isa ka Libo ka Tuig nga Paggahom ni Jesus?

¹⁶ Ano na ang mangin kahimtangan pagkatapos sang Isa ka Libo ka Tuig nga Paggahom ni Jesus? Indi na makasasala ang mga tawo kag wala na sila sing kasablagan sa lawas. Gani, indi na kinahanglan ang halad-gawad, ang manugpatunga, ukon ang mga saserdote. Kag ‘nadula na ang kamatayon nga amo ang katapusan nga kaaway.’ Nabanhaw na ang mga patay. Kag perpekto na ang tanan nga tawo sa duta.​—1 Cor. 15:​25, 26.

17-18. (a) Ano ang matabo pagkatapos sang Isa ka Libo ka Tuig nga Paggahom ni Jesus? (b) Ano ang himuon ni Jesus kon matapos na ang iya paggahom? (1 Corinto 15:​24, 28) (Tan-awa man ang piktyur.)

¹⁷ Ano pa ang matabo pagkatapos sang Isa ka Libo ka Tuig nga Paggahom ni Jesus? Pinasahi gid ang matabo sa sina nga tion. Kay man, matapos na ang isyu parte sa pagpakabalaan sa ngalan ni Jehova. Ngaa masiling naton ini? Sa hardin sang Eden, ginpagua ni Satanas nga butigon si Jehova kag indi mahigugmaon ang Iya paagi sa paggahom sa mga tawo. Sugod sadto, pirme ginapakabalaan sang mga nagaalagad kay Jehova ang iya ngalan kag ginapamatud-an nila nga ang iya paggahom amo ang pinakamaayo. Gani pagkatapos sang Isa ka Libo ka Tuig nga Paggahom ni Jesus, mabindikar na sing bug-os ang reputasyon ni Jehova. Mapamatud-an na niya nga isa sia ka mahigugmaon nga Amay sa langit, kag indi na gid ini maduhaduhaan.

¹⁸ Pagkatapos sang Isa ka Libo ka Tuig nga Paggahom ni Jesus, mapamatud-an nga kabutigan ang tanan nga ginsiling ni Satanas parte kay Jehova. Ano ang himuon ni Jesus kon matapos na ang iya paggahom? Ilugon bala niya si Satanas kag magarebelde bala sia kay Jehova? Indi. (Basaha ang 1 Corinto 15:​24, 28.) Ibalik niya sa iya Amay ang Ginharian, kag magapasakop sia sa paggahom ni Jehova. Indi pareho kay Satanas, handa si Jesus nga ihatag ang tanan bangod palangga niya si Jehova.

19. Daw ano ka importante kay Jesus ang ngalan ni Jehova?

¹⁹ Perpekto nga ginhimo ni Jesus ang iya katungdanan bilang representante sang iya Amay. Gani, indi katingalahan kon ngaa handa si Jehova nga ihatag ang iya ngalan kay Jesus. Daw ano ka importante kay Jesus ang ngalan ni Jehova? Amo ini ang pinakaimportante sa iya. Handa sia nga mapatay para sa sini nga ngalan, kag handa sia nga ibalik kay Jehova ang tanan pagkatapos sang iya Isa ka Libo ka Tuig nga Paggahom. Paano naton mailog si Jesus? Binagbinagon naton ini sa masunod nga artikulo.