Mga Pamangkot Gikan sa mga Bumalasa

Ano nga “panghunahuna” ang ibutang ni Jehova sa tagipusuon sang mga gobierno sa indi na lang gid madugay?

Parte sa pagsugod sang dakung kapipit-an, ang Bugna 17:16, 17 nagasiling: “Ang napulo ka sungay nga nakita mo kag ang mabangis nga sapat, magadumot sa makihilawason nga babayi. Ini ang magahapay kag magapahubo sa iya, kag magakaon sang iya unod kag magasunog sa iya sing bug-os sa kalayo. Kay ginbutang sang Dios sa ila tagipusuon ang paghimo sang iya hunahuna, huo, ang paghimo sang ila isa ka panghunahuna paagi sa paghatag sang ila ginharian sa mabangis nga sapat.” Suno sa aton mga publikasyon sang una, ang “panghunahuna” nga ibutang ni Jehova sa tagipusuon sang mga gobierno amo nga laglagon nila ang butig nga relihion.

Pero, kinahanglan naton bag-uhon ini nga paghangop. Ang “panghunahuna” nga ibutang ni Jehova sa tagipusuon sang mga gobierno amo nga ihatag nila ang “ila ginharian sa mabangis nga sapat.” Para maintiendihan naton kon paano ini matuman, binagbinagon naton ang masunod nga mga pamangkot.

Sin-o ang mga ginsambit sa tagna? Ang “makihilawason nga babayi” nga ginatawag man “Babilonia nga Daku” amo ang bug-os kalibutan nga emperyo sang butig nga relihion. Ang “mabangis nga sapat nga eskarlata ang kolor” amo ang United Nations. Ginhimo ini nga organisasyon sang 1919 para indi madula ang paghidait sa bilog nga kalibutan, kag gintawag ini sadto nga League of Nations. (Bug. 17:3-5) Ang “napulo ka sungay” amo ang tanan nga gobierno nga nagasuporta sa mabangis nga sapat.

Ano ang kaangtanan sang makihilawason nga babayi kag sang mabangis nga sapat nga eskarlata ang kolor? “Nagasakay” ang makihilawason nga babayi sa mabangis nga sapat. Buot silingon, ginasuportahan niya ang sapat kag ginatinguhaan niya nga kontrolon ini.

Ano ang matabo sa makihilawason nga babayi? Ang mabangis nga sapat kag ang napulo ka sungay nga nagasuporta sa sini “magadumot sa makihilawason nga babayi.” Bangod sa ila dumot, kuhaon nila ang tanan nga manggad sang babayi kag ibuyagyag nila kon daw ano sia kalain. Dayon laglagon nila sia, nga amo ang ginsiling ni Jehova nga matabo sa iya. (Bug. 17:1; 18:8) Sa sina nga tion, madula na ang tanan nga butig nga relihion. Pero antes ina matabo, may himuon ang mga gobierno nga wala pa gid natabo halin pa sang una. Kag si Jehova ang magapahanabo para himuon ini sang mga gobierno.

Ano ang pahanabuon ni Jehova nga himuon sang mga gobierno? Ibutang niya sa tagipusuon sang napulo ka sungay ang “iya hunahuna,” ukon pahanabuon niya nga ‘ihatag nila ang ila gahom kag awtoridad sa mabangis nga sapat nga eskarlata ang kolor’ nga amo ang United Nations. (Bug. 17:13) Buot silingon, indi ang mga gobierno ang makahunahuna nga ihatag nila ang ila gahom kag awtoridad sa mabangis nga sapat. Sa baylo, ginapakita sang tagna nga ang Dios mismo ang magaimpluwensia sa ila nga himuon ini. (Hulu. 21:1; ipaanggid ang Isaias 44:28.) Amat-amat bala nila nga ihatag ang ila gahom kag awtoridad? Indi. Hinali lang ini nga matabo. Kag kon may awtoridad na ang mabangis nga sapat, laglagon sini sing bug-os ang tanan nga butig nga relihion.

Ano ang mapaabot naton nga matabo sa palaabuton? Indi naton mapaabot nga makabati kita sang mga report nga amat-amat na nga ginasuportahan sang mga gobierno ang United Nations. Pero ari ang mapaabot naton: Sing hinali, ibutang ni Jehova sa tagipusuon sang mga gobierno nga ihatag nila ang ila gahom sa United Nations. Kon matabo ina, kabalo kita nga magasugod na ang dakung kapipit-an. Gani, ‘magpabilin kita nga nagamata kag huptan naton ang aton ikasarang sa paghunahuna sing maayo’ kay lapit na lang gid matabo ining hinali nga mga pagbag-o.—1 Tes. 5:6.