Ano ang Ginasiling sang Biblia Parte sa Pagtimalos?
Ang sabat sang Biblia
May tawo nga nagapati nga may rason sila nga magtimalos. Pero kon magtimalos sila, ginalapas nila ining laygay sang Biblia: “Indi ka magsiling: ‘Himuon ko sa iya ang ginhimo niya sa akon; balusan ko sia sa iya ginhimo.’” (Hulubaton 24:29) Madamo sing tawo nga gusto magtimalos, pero nabuligan sila sang mga laygay sang Biblia nga indi ini paghimuon.
Sa sini nga artikulo
Ngaa sala ang pagtimalos?
Kon nahimuan ka sing malain sang iban, natural lang nga maakig ka kag magbatyag nga gusto mo nga silutan sila sa ila ginhimo. Pero, ginsugid sang Biblia nga sala ang pagtimalos. Ngaa?
Wala gid nalipay ang Dios sa mga tawo nga nagatimalos. Sa Biblia, si Jehovaa nga Dios nagsiling: “Akon ang pagtimalos; ako ang magabalos.” (Roma 12:19) Kon may nakahimo sang sala sa aton, ginapalig-on kita sang Biblia nga kon posible makighusay kita sa sina nga tawo kag solbaron ini sing kalmado lang kag malinong, imbes nga magtimalos. (Roma 12:18) Pero ano abi kon nahimo mo na ang tanan pero wala ini gihapon nasolbar? Ginapalig-on kita sang Kasulatan nga magsalig nga tadlungon ni Jehova ang tanan nga inhustisya.—Salmo 42:10, 11.
Paano ginasilutan sang Dios ang mga tawo?
Subong, ginagamit sang Dios ang gobierno sang tawo para silutan ang mga nakasala. (Roma 13:1-4) Sa ulihi, sia mismo ang magasilot sa mga makasasala kag siguraduhon niya nga wala na sing magaantos.—Isaias 11:4.
Kon gusto ko magtimalos, ano ang makabulig sa akon para indi ko ini paghimuon?
Indi magpadasudaso. (Hulubaton 17:27) Ang mga tawo nga nagapadala sa ila kaakig masami nga makahimo sing mga butang nga ginahinulsulan nila. Pero ang mga tawo nga nagapamensar anay masami nga nakahimo sing mas maayo nga mga desisyon.—Hulubaton 29:11.
Hibalua kon ano ang matuod. (Hulubaton 18:13) Kon nahimuan ka sing malain, mas maayo kon pamangkuton mo ang imo kaugalingon, ‘May mga detalye bala nga wala ko nabal-an nga posible amo ang rason kon ngaa amo sina ang iya ginhimo ukon ginhambal sa akon? Nahimo bala niya ini bangod grabe ang iya stress? Ukon basi wala sia kabalo nga sala na gali ang iya ginahimo?’ Kon kaisa, abi ta hungod gid nga ginahimuan kita sing malain sang iban, pero sa tuod gali, indi lang nila hungod.
Sala nga mga pagpati parte sa pagtimalos
Sala nga pagpati: Ginapalig-on sang Biblia ang pagtimalos kay nagsiling ini “mata sa mata.”—Levitico 24:20.
Ang matuod: Ang sugo sa Israel sang una nga “mata sa mata” wala nagapalig-on sang pagtimalos. Ini nga kasuguan nagabulig sa mga hukom nga masilutan ang mga nakasala base sa ila nahimo nga mga sala.b—Deuteronomio 19:15-21.
Sala nga pagpati: Bangod wala ginapalig-on sang Biblia ang pagtimalos, indi naton mapangapinan ang aton kaugalingon kon himuan kita sing malain.
Ang matuod: Kon halitan ka sang iban, may kinamatarong ka nga pangapinan ang imo kaugalingon ukon mangayo sing bulig sa awtoridad. Pero, ginpalig-on kita sang Biblia nga asta sa masarangan naton, likawan naton nga magbato ukon magpanakit.—Hulubaton 17:14.
a Jehova ang ngalan sang Dios suno sa Biblia.
b Para sa dugang nga impormasyon parte sa sini nga kasuguan, tan-awa ang artikulo nga “Ano ang Buot Silingon sang ‘Mata sa Mata’?”