Ano ang Espirituwalidad? Puede Bala Ako Mangin Espirituwal nga Tawo Bisan Wala Ako sing Relihion?
Ang sabat sang Biblia
Ang tinaga nga espirituwalidad mabasa sa Biblia. Ginagamit ini para ilaragway ang handum sang isa ka tawo nga mapalipay ang Dios kag matun-an kon paano nagahunahuna ang Dios kag ilugon ini. Ang isa ka espirituwal nga tawo nagatinguha gid nga sundon ang mga kasuguan sang Dios kag ang paggiya sang Iya balaan nga espiritu.a—Roma 8:5; Efeso 5:1.
Ginapaathag sang Biblia ang espirituwalidad paagi sa pagkumparar sa ginahimo sang isa ka espirituwal nga tawo kag sang isa nga indi. Halimbawa, nagsiling ini nga “wala ginabaton sang pisikal nga tawo ang mga butang sang espiritu sang Dios,” ukon ang mga panudlo sang Dios. (1 Corinto 2:14-16) Ang undanon naman nga mga tawo masami nga ‘nagahinisaay kag nagaginamo’ imbes nga mangin maalwan kag makighidait. (1 Corinto 3:1-3) Kag ang mga nagapakalain sa iban kag nagaguba sang pag-abyanay ginatawag nga “mga tawo nga sapatsapaton, nga wala sing espirituwalidad.”—Judas 19; Hulubaton 16:28.b
Sa sini nga artikulo
Ngaa posible kita mangin espirituwal nga tawo?
Puede kita mangin espirituwal nga tawo bangod gintuga kita suno sa larawan sang Dios. (Genesis 1:27) Amo nga indi katingalahan nga ang kalabanan nga tawo interesado sa mga butang nga indi nila makita ukon matandog kag importante gid ini para sa ila.
Gintuga kita nga may ikasarang nga mapakita ang mga kinaiya pareho sa mga kinaiya ni Jehovac nga Dios. Nalakip sa sini ang paghidait, kaluoy, kag wala sing pinasulabi. (Santiago 3:17) Dugang pa, ginahatagan sang Dios sang iya balaan nga espiritu ang mga nagapanikasog nga sundon ang iya mga sugo.—Binuhatan 5:32.
Ngaa importante ang espirituwalidad?
Ang espirituwalidad nagaresulta sa “kabuhi kag paghidait.” (Roma 8:6) Hamili gid ini nga mga regalo halin sa Dios.
Kabuhi: Nagpromisa ang Dios nga hatagan niya sing kabuhi nga wala sing katapusan ang espirituwal nga mga tawo.—Juan 17:3; Galacia 6:8.
Paghidait: Amo ini ang paghidait sa Dios nga mabatyagan sang isa ka tawo kon suod sia sa Iya. Para sa Dios, mga kaaway niya ang mga tawo nga nagapokus lang sa ila pisikal nga mga kinahanglanon. (Roma 8:7) Dugang pa, ginapakamaayo sang Dios ang mga nagatinguha nga mangin espirituwal nga tawo ukon mangin suod pa gid sa iya. Ginahatagan niya sila sang “paghidait sang Dios nga labaw sa tanan nga paghangop.” (Filipos 4:6, 7) Ina nga paghidait makabulig sa ila nga mangin malipayon.—Mateo 5:3.
Paano ako mangin espirituwal nga tawo?
Hibalua kag sunda ang mga sugo sang Dios. Mahimo mo ini kon basahon mo ang Biblia. Mabasa mo sa sini ang panghunahuna sang Dios nga ginsulat sang mga tawo nga ‘ginapahulag sang balaan nga espiritu.’ (2 Pedro 1:21) Ang imo matun-an makabulig sa imo nga simbahon ang Dios “sa espiritu kag kamatuoran,” paagi sa paggiya sang balaan nga espiritu kag suno sa kabubut-on sang Dios.—Juan 4:24
Mangamuyo sing bulig sang Dios. (Lucas 11:13) Buligan ka sang Dios nga mapakita ang mga kinaiya para mangin isa ikaw ka espirituwal nga tawo. (Galacia 5:22, 23) Mahimo ka man niya hatagan sing kaalam nga makahimo sing maayo nga mga desisyon kon may problema ka.—Santiago 1:5.
Makig-upod sa espirituwal nga mga tawo. Makabulig sila sa imo nga mangin mabakod ang imo espirituwalidad ukon relasyon sa Dios. (Roma 1:11, 12) Pero kon mag-upod ka sa mga tawo nga ang mga ginahimo indi suno sa panghunahuna sang Dios, posible magluya ang imo espirituwalidad.—Santiago 4:4.
Kinahanglan ko bala ang relihion para mangin espirituwal ako nga tawo?
Indi buot silingon nga kon may relihion ang isa ka tawo, espirituwal na sia nga tawo. Ang Biblia nagsiling: “Kon ang bisan sin-o nagahunahuna nga sia relihioso, apang wala nagarenda sang iya dila, ginadaya niya ang iya tagipusuon, kag ang iya pagsimba wala sing pulos.”—Santiago 1:26, footnote.
Pero ginapakita man sang Biblia nga ang espirituwal nga mga tawo nagasimba sa Dios kag ginasunod nila ang paagi sang pagsimba nga gusto sang Dios. Nagapati sila nga may ‘isa lang ka espiritu’ kag amo ini ang balaan nga espiritu sang Dios. Ini nga espiritu amo ang nagabulig sa ila nga simbahon ang Dios bilang “isa ka lawas,” ukon isa ka organisado nga grupo nga “nagatinguha nga tipigan ang paghiusa nga nabaton [nila] paagi sa balaan nga espiritu.”—Efeso 4:1-4.
Sala nga mga pagpati parte sa espirituwalidad
Sala nga pagpati: Ang espirituwalidad amo ang bisan ano nga paagi sang pagkabuhi sang isa ka tawo para mangin malipayon sia ukon para mahimo niya ang pinakamaayo nga masarangan niya.
Ang matuod: Sa Biblia, ang espirituwalidad amo ang paagi sang pagkabuhi suno sa panghunahuna sang Dios. Wala ini nagapatuhoy sa pagtinguha sang isa ka tawo nga himuon ang iya pinakamaayo nga wala nagapagiya sa Dios. Nagapati ang espirituwal nga mga tawo nga si Jehova amo ang ila Manunuga kag nagakabuhi sila suno sa iya katuyuan para sa ila, kag nalipay gid sila sa paghimo sini.—Salmo 100:3.
Sala nga pagpati: Ginapit-an ukon ginapaantos sang iban ang ila kaugalingon kay nagapati sila nga amo ini ang paagi para mangin espirituwal sila nga tawo.
Ang matuod: Ang pagsakit sa kaugalingon amo ang “pagsimba nga naluyagan sang isa” kag indi sang Dios. Ini nga sahi sang pagsimba nalakip sa mga handum sang unod. (Colosas 2:18, 23) Sa Biblia, ang espirituwalidad nagaresulta sa kalipay kag indi sa kasakit.—Hulubaton 10:22.
Sala nga pagpati: Ang espirituwalidad amo ang pagpakig-angot sa mga espiritu kag lakip sa sini ang espiritismo.
Ang matuod: Ang isa ka sahi sang espiritismo amo ang pagpati nga maistorya sang mga buhi ang espiritu sang mga patay. Pero, ginatudlo sang Biblia nga ang mga patay wala na sing pangalibutan. (Manugwali 9:5) Ang matuod, ang espiritismo amo ang pag-istorya sa mga espiritu nga nagrebelde sa Dios. Ginadumtan gid sang Dios ang espiritismo kag ang mga nagahimo sini indi mangin malapit sa Dios.—Levitico 20:6; Deuteronomio 18:11, 12.
Sala nga pagpati: Ang tanan nga tinuga may espirituwalidad.
Ang matuod: Ang tanan nga tinuga sang Dios nagapadungog sa iya. (Salmo 145:10; Roma 1:20) Pero, ang maalam lang nga mga tinuga sang Dios ang may ikasarang nga magpakita sing mabakod nga espirituwalidad. Kay man, ang mga sapat nagadepende lang sa ila instinct, gani indi sila makapakig-abyan sa Dios. Wala sila nagapamensar sang ila ginahimo, sa baylo ginahimo lang nila ini kay amo ini ang ila kinahanglan. (2 Pedro 2:12) Amo nga suno sa Biblia, lain gid ang espirituwalidad sa sapatsapaton nga panghunahuna kag batasan.—Santiago 3:15; Judas 19.
a Sa orihinal nga lenguahe, ang tinaga nga gin-translate sa Biblia nga “espiritu” nagakahulugan sing “ginhawa.” Nagapatuhoy man ini sa indi makita nga mga puersa. Bisan pa indi ini makita, mabal-an mo nga may amo sini nga puersa kay mabatyagan ini kag may ginapahulag nga butang. Suno sa Biblia ang Dios amo ang Pinakagamhanan nga Espiritu. Ang espirituwal nga tawo nagadesisyon base sa kon ano ang gusto sang Dios kag nagapagiya sa Iya balaan nga espiritu.
b Sa Biblia, kon ginasambit ang tinaga nga “undanon” kag “pisikal” para ilaragway ang mga tawo, nagapatuhoy ini sa mga tawo nga nagabase sang ila desisyon sa gusto sang ila lawas kag indi sa mga kasuguan sang Dios.
c Si Jehova ang ngalan sang Dios suno sa Biblia.—Salmo 83:18.