Gin-apresyar Nila ang Iya Sulat

Si Brooke isa sa mga Saksi ni Jehova nga nagaistar sa United States. Sa tion sang COVID-19 nga pandemic, nagpanaksi sia paagi sa mga sulat. Madamo gid si Brooke sang nahimo nga sulat kada semana. Pero pagligad sang isa ka tuig kag tunga, naluyahan gid sia. Kay asta sa sina nga tion, may isa pa lang ka tawo nga nagbalos sa iya kag ginsilingan sia nga indi na magsulat liwat sa iya. Nagpangduhaduha si Brooke kon bala ang iya mga sulat nakabulig gid man sa iban.

Pero sang ulihi, si Kim, nga isa man ka Saksi ni Jehova nga nagaobra sa banko, may ginsugid kay Brooke parte sa iya pagpakig-istorya sa isa ka customer. Nagsiling ang customer kay Kim nga nakabaton sia sang sulat halin sa isa sa mga Saksi ni Jehova. Sang ulihi, nabal-an ni Kim nga ini nga mga sulat naghalin gali kay Brooke. Pagkasunod nga semana nagbalik ang customer sa banko. Samtang nagaistorya kay Kim, namangkot sia kon bala puede sia maka-attend sa aton mga miting, nga ginahimo sadto nga tion paagi sa videoconference.

Wala madugay, si David nga isa man ka Saksi, nagsiling nga may upod sia sa obra nga nakabaton man sang mga sulat ni Brooke. Nanamian gid ang upod sa obra ni David kay ginpangabudlayan gid ini sulat. Nagsiling sia: “Dapat mas madamo pa nga tawo ang magpakita sang pareho sini nga personal nga interes sa iban.” Ginkalitan ini nga tion ni David nga sugiran sia sang dugang pa parte sa Biblia kag nagsiling nga dal-an sia sang publikasyon kag nagpasugot man ang iya upod sa obra.

Narealisar sang mga Saksi ni Jehova nga indi nila dayon matalupangdan kon bala nagtubo ang binhi nga ila gintanom sa ministeryo. (Manugwali 11:5, 6) Pero ang naeksperiensiahan ni Brooke nakabulig sa iya nga makita ang importansia sang iya bahin sa Cristianong ministeryo.—1 Corinto 3:6.