Nakibot Gid Sia sa Resulta

Gusto gid dugangan ni Desicar, nga isa ka nagasolo nga nanay, ang iya ginahimo sa pag-alagad kay Jehova paagi sa pag-regular payunir. Nagaistar sia sa Venezuela, nga isa ka pungsod nga may madamo nga problema sa ekonomiya. Pero determinado gid sia nga magpayunir, gani ginhimo gid niya ini. Nalipay gid sia sa sini, pero nagsugod ang COVID-19 nga pandemic.

Sa umpisa sang COVID-19 nga pandemic, nabudlayan si Desicar mag-adjust sa pagbantala bangod sa bag-o nga sitwasyon. Nabudlayan sia maghimo sang mga sulat. Kag indi man sia makagamit sang videoconference sa iya pagministeryo bangod mahal katama ang Internet sa ila lugar. “Naluyahan gid ako,” siling niya. “Gulpi lang nga indi na ako maka-preaching pareho sang una. Pamatyag ko indi na ako epektibo nga regular payunir.”

Dayon, sang Enero 2021, gin-aprubahan sang branch office sang mga Saksi ni Jehova sa Venezuela ang isa ka special preaching campaign. Naghimo sang kahimusan nga i-broadcast sang 60 ka estasyon sang radyo kag 7 ka channel sang television ang ginpili nga mga pamulongpulong sa Biblia sa lima ka weekend sina nga bulan. Ginpalig-on ang mga Saksi nga imbitahon ang mga interesado nga magtan-aw kag mamati sa sini nga broadcast. Naghatag man ang branch sang mga pamangkot kag mga teksto parte sa kada pamulongpulong, nga puede magamit sang mga kauturan sa ila mga sulat kag sa ila maistorya sa telepono. Dugang pa, ginpalig-on man sang branch ang mga kauturan nga maggamit sang text messaging sa ila pagministeryo, nga isa ka bag-o nga paagi sa pagbantala para sa madamo nga Saksi sa Venezuela.

Excited gid si Desicar nga magpakigbahin sa sini nga kampanya. Bisan wala pa sia nakapanaksi paagi sa text, gintestingan niya ini. Pero, kinahanglan niya sang bulig. “Indi ako sagad sa paggamit sang gadyet,” siling ni Desicar. Gani ginpangabay niya ang iya bata nga babayi nga tudluan sia, kag sang ulihi, handa na si Desicar nga magpakigbahin sa kampanya.

Paagi sa pag-text, gin-imbitar ni Desicar ang madamo niya nga kakilala nga mamati sa narekord na nga daan nga mga pamulongpulong. Nakibot gid sia sa resulta. Madamo sa mga ginkontak niya ang namati sa mga pamulongpulong kag namangkot sa iya. Ang iban wala nakatan-aw ukon nakapamati pero namangkot sila kay Desicar kon ano ang ginbinagbinag sa mga pamulongpulong. “Gingamit ko ang akon mga note sa tion sang assembly para sugiran sila sang parte sa mga pamulongpulong,” siling ni Desicar. “Wala pa gid ako nakaagi nga nakahimo ako sang sobra sa 5 ka return visit sa sulod sang isa ka bulan, pero pagkatapos sang kampanya, nakahimo ako sang 112 ka return visit!”a

Gin-imbitar man ni Desicar ang iya magulang nga babayi nga indi Saksi nga nagaistar sa tupad lang nila para mamati sa mga pamulongpulong sa radyo. “Nakibot gid ako sang nagpasugot sia,” siling ni Desicar. “Kada Domingo sa alas 8:00 sang aga, nagakadto ako sa iya apartment kag upod kami nga nagapamati. Madamo sia sang mga pamangkot sa tion sang programa kag pagkatapos sini.” Nag-attend man sa Memoryal sang kamatayon ni Jesus ang magulang ni Desicar paagi sa videoconference. Ginpasugtan man niya si Desicar nga gamiton ang iya Internet para sa ministeryo.

“Nagapasalamat gid ako kay Jehova,” siling ni Desicar. “Ginapasalamatan ko man ang mga gulang sa kongregasyon sa pagpalig-on sa akon. Ginbuligan nila ako nga magbalik ang akon kalipay sa ministeryo.” (Jeremias 15:16) Padayon si Desicar nga nagapayunir kag padayon man niya nga ginatudluan ang mga interesado nga nakita niya paagi sa text.