Sibu Bala ang Ginasiling sang Biblia Parte sa Kabuhi ni Jesus?
Ang sabat sang Biblia
Amo ini ang ginsiling sang manunulat sang Biblia nga si Lucas parte sa iya rekord sang kabuhi ni Jesus: “Nausisa ko sing sibu ang tanan nga butang halin sa ginsuguran.”—Lucas 1:3.
Ang iban nagasiling nga ang rekord sang kabuhi ni Jesus sa mga Ebanghelyo—ang sinulatan nanday Mateo, Marcos, Lucas, kag Juan—ginbag-o sang ikap-at nga siglo.
Pero, sang ika-20 nga siglo, nasapwan sa Egipto ang isa ka importante nga bahin sang Ebanghelyo ni Juan. Ginatawag ini karon nga Papyrus Rylands 457 (P52) kag ara ini subong sa John Rylands Library, sa Manchester, England. Nasulat diri ang Juan 18:31-33, 37, 38 nga mabasa sa aton Biblia subong.
Amo ini karon ang pinakadaan nga manuskrito sang Cristianong Griegong Kasulatan. Nagapati ang madamo nga iskolar nga ginsulat ini sang mga 125 C.E., mga 25 lang ka tuig pagkatapos nga napatay si Juan. Dalayawon gid ini kay ang nasulat diri halos pareho gid sa mas ulihi nga mga manuskrito.