Ginaluwas Kita ni Jesus—Paano?
Ang sabat sang Biblia
Ginluwas ni Jesus ang matutom nga mga tawo sang ginhatag niya ang iya kabuhi bilang halad-gawad. (Mateo 20:28) Gani ginatawag sang Biblia si Jesus nga “Manluluwas sang kalibutan.” (1 Juan 4:14) Nagsiling man ini: “Wala na sing iban pa nga manluluwas kundi sia lang, kay wala na sing iban pa nga ngalan sa duta nga ginpili sang Dios sa katawhan sa pagluwas sa aton.”—Binuhatan 4:12.
‘Natilawan ni Jesus ang kamatayon para sa tagsa ka tawo’ nga may pagtuo sa iya. (Hebreo 2:9; Juan 3:16) Dayon, “ginbanhaw sia sang Dios,” kag nagbalik si Jesus sa langit bilang espiritu nga tinuga. (Binuhatan 3:15) Didto sa langit, “maluwas [ni Jesus] sing bug-os ang mga nagapalapit sa Dios paagi sa iya, bangod padayon sia nga nagakabuhi agod mangabay para sa ila.”—Hebreo 7:25.
Ngaa kinahanglan naton si Jesus agod mangabay para sa aton?
Tanan kita makasasala. (Roma 3:23) Bangod sa sala indi kita makapalapit sa Dios, kag nagaresulta ini sa kamatayon. (Roma 6:23) Pero si Jesus nangin “matugtabang” sang mga nagatuo sa iya halad-gawad. (1 Juan 2:1, footnote) Ginapangabay niya ang Dios nga pamatian ang ila mga pangamuyo kag patawaron ang ila mga sala pasad sa iya kamatayon. (Mateo 1:21; Roma 8:34) Ginapamatian sang Dios ang mga pangabay ni Jesus kay suno ini sa Iya kabubut-on. Ginpadala sang Dios si Jesus sa duta “agod luwason ang kalibutan paagi sa iya.”—Juan 3:17.
Ang pagtuo bala kay Jesus bastante na para maluwas kita?
Importante ang pagtuo kay Jesus para maluwas, pero may dapat pa kita nga himuon. (Binuhatan 16:30, 31) Ang Biblia nagsiling: “Subong nga ang lawas nga wala sing espiritu patay, ang pagtuo nga wala sing mga buhat patay man.” (Santiago 2:26) Para maluwas kita, dapat:
Magtuon kita parte kay Jesus kag sa iya Amay, si Jehova.—Juan 17:3.
Magtuo kita sa ila.—Juan 12:44; 14:1.
Ipakita naton ang aton pagtuo paagi sa pagsunod sa ila mga sugo. (Lucas 6:46; 1 Juan 2:17) Si Jesus nagsiling nga indi tanan nga nagatawag sa iya nga “Ginuo” maluwas, kundi ang mga “nagahimo lamang sang kabubut-on sang [iya] Amay sa langit.”—Mateo 7:21.
Padayon kita nga magtuo bisan pa may mga kabudlayan. Si Jesus nagsiling: “Ang nagbatas tubtob sa katapusan maluwas.”—Mateo 24:13.