Mga Miting sang Kongregasyon Paagi sa Videoconference

Madamo nga gobierno sa bilog nga kalibutan ang nagpatuman sang social distancing kag nagdumili sa pagtipon sang madamo nga tawo. Determinado gid ang mga Saksi ni Jehova nga tumanon ini nga mga kasuguan, pero gusto man nila nga padayon nga makatipon para sa ila pagsimba. Para makahiwat sang mga miting, nagagamit ang mga kongregasyon sang videoconference nga mga app, pareho sang Zoom.

Para makahiwat sang mga miting sing regular kag sa safe nga paagi, gin-aprobahan sang Nagadumala nga Hubon ang paggamit sang mga donasyon para magbakal sang Zoom nga mga account nga gamiton sang mga kongregasyon. Daku gid ini nga bulig para sa mga kongregasyon nga indi makasarang magbakal sang account nga nagabili sing $15-$20 ukon sobra pa. Ini nga mga kongregasyon masami nga nagagamit sang libre nga mga app nga pila lang ang makakonek kag indi masaligan ang security feature. Pero paagi sa Zoom nga mga account nga gin-aman sang organisasyon, makontrol sini nga mga kongregasyon ang security setting sang app kag madamo ang puede makakonek sa kada miting. Subong, sobra 65,000 na ka kongregasyon sa sobra 170 ka pungsod ang nagagamit sini nga mga account.

Ang Kairagi Congregation sa Manado, North Sulawesi, Indonesia, nag-untat sa paggamit sang libre nga videoconference nga app kag nagsaylo sa Zoom nga account nga gin-aman sang organisasyon. Si Brother Hadi Santoso nagsiling: “Bisan ang mga kauturan nga indi masyado kabalo maggamit sang mga gadyet mas makapanginpulos na sa mga miting kay indi na sila kinahanglan magsagi-log in sing pila ka beses sa ila miting.”

Si Lester Jijón, Jr., nga isa ka gulang sa Guayacanes Oeste Congregation sa Guayaquil, Ecuador, nagsiling: “Madamo sa mga kauturan ang pigado. Gani imposible para sa pila ka kongregasyon nga makabakal sang Zoom nga account para makahiwat sang ila miting. Subong, sa bulig sang organisasyon, may Zoom account na kami kag puede na namon maimbitar ang iban nga magtambong sa miting. Wala na kami nabalaka nga pila lang ang puede makakonek.”

Si Johnson Mwanza, nga isa ka gulang sa Ngwerere North Congregation sa Lusaka, Zambia, nagsulat: “Madamo nga kauturan ang pirme nagasiling nga ‘ang kahimusan sang organisasyon parte sa Zoom wala lamang nagpabatyag sa amon nga mas suod kami sa amon mga kauturan kundi nabatyagan man namon nga ginapalangga kag ginaatipan kami ni Jehova.’”

Ang kuarta nga gingamit sa pagbakal sini nga mga account ginkuha sa badyet nga para sa pagbulig kon may kalamidad. Ini nga kuarta naghalin sa boluntaryo nga mga donasyon para sa bug-os kalibutan nga hilikuton. Madamo sa sini nga donasyon ang ginhatag paagi sa donate.jw.org. Salamat gid sa imo mga donasyon, nga ginagamit man para sa iban pa nga mga proyekto sa pagbulig sa bilog nga kalibutan.—2 Corinto 8:14.