Ara sa Prisuhan Bangod sa Ila Pagtuo—Crimea

Ang mapintas nga paghingabot sang mga awtoridad sang Russia sa mga Saksi ni Jehova naglab-ot na sa Crimea. Sa Russia, indi lamang legal nga mga korporasyon sang mga Saksi ang gin-ban sang gobierno kundi maathag gid nga gusto sang gobierno nga dulaon pati ang ila mahidaiton nga pagsimba. Sugod sang pag-ban sang Abril 2017, gin-raid sang mga awtoridad ang madamo nga pagtinipon sang mga Saksi sa bilog nga Russia, kag madamo nga Saksi ang gin-aresto kag ginpriso. Amo man sini ang ginahimo subong sa mga Saksi ni Jehova sa Crimea.

Ang una nga dululungan nga pagpang-raid sa Crimea natabo sang Nobiembre 15, 2018, sa Dzhankoy, sang mga 200 ka pulis kag mga agent sang special forces ang nag-raid sang walo ka balay diin nagatipon ang magagmay nga mga grupo sang mga Saksi para magbasa kag mag-istorya parte sa Biblia. Puersa nga ginsulod sang mga 35 ka armado nga pulis nga may tabon ang mga guya ang balay ni Sergey Filatov, diin nagatipon ang anom ka Saksi. Hinadlukan gid ang mga Saksi sa ginpanghimo sang mga awtoridad. Ang isa ka 78 anyos nga lalaki ginpaatubang nila sa dingding, dayon ginpahapa sia sa salog, ginpusasan, kag ginkastigo sing todo amo nga kinahanglan sia dalhon gilayon sa ospital. Bangod sa grabe nga nerbios, ang duha pa ka tigulang nga lalaki, gindalagan man sa ospital kay nagtaas sing todo ang ila blood pressure. Makapasubo nga isa ka babayi ang nahulugan sang gin-raid man ang ila balay.

Pagkatapos sang pagpang-raid, si Sergey ginpasakaan sang kaso kriminal nga pag-organisar sang hilikuton sang isa ka “extremist nga organisasyon” base sa Article 282.2(1) sang Russian Criminal Code. Sang Marso 5, 2020, ginsentensiahan sang district court sang Crimea si Sergey nga mapriso sing anom ka tuig sa isa ka labor camp. Sa tapos sia masentensiahan, insigida sia nga gindala sa prisuhan.

Sa mga tinuig pagkatapos sang 2018 nga pagpang-raid sa Dzhankoy, padayon nga puersa nga ginasulod sang mga special forces officer ang mga balay sang mga Saksi nga ginasuspetsuhan nga nagahimo sang extremist nga hilikuton. Ang pinakaulihi natabo sang Agosto 7, 2024, sang may pila ka armado nga pulis nga may tabon ang guya ang nag-raid sang mga balay sang lima ka Saksi. Lakip sa gin-raid ang balay sang 68 anyos nga si Tamara Brattseva sa baryo sang Razdolnoye. Si Tamara ginkasuhan nga nagaorganisar sang mga hilikuton sang isa ka extremist nga organisasyon kag gina-hearing sia subong. Sang Oktubre 2024, duha ka brother nga sanday Yuriy Gerashchenko kag Sergey Parfenovich, ang ginsentensiahan sing anom ka tuig nga pagkapriso sa penal colony. Ginsentensiahan sila sang una sang suspended prison, pero gusto sang piskal sang mas mabug-at nga sentensia, gani ginpasugtan ini sang korte. Gindala sila dayon sa prisuhan halin sa korte.

Bilang resulta sini nga pagpang-raid sa mga balay, kag dayon mga pag-hearing kag mga kaso, may ara subong 14 ka lalaki nga Saksi nga ginsentensiahan sang asta anom ka tuig kag tunga nga pagkapriso. Tanan sila ginkasuhan nga nagasuporta sa mga hilikuton sang isa ka extremist nga organisasyon.

Time Line

1. Hulyo 18, 2025

   Katorse ka Saksi ni Jehova nga halin sa Crimea ang napriso.

2. Oktubre 3, 2024

   Si Yuriy Gerashchenko kag si Sergey Parfenovich ginsentensiahan sang anom ka tuig nga pagkapriso sa penal colony.

3. Agosto 7, 2024

   Gin-raid sang mga pulis ang lima ka balay sang mga Saksi sa Alushta, Razdolnoye, kag Senokosnoye. Ginkasuhan si Tamara Brattseva.

4. Agosto 5, 2021

   Gin-raid ang walo ka balay sang mga Saksi. Gin-aresto sanday Aleksandr Dubovenko kag Aleksandr Lityinyuk.

5. Oktubre 1, 2020

   Siam ka balay ang gin-raid sa Sevastopol. Si Igor Shmidt gin-aresto kag ginbutang sa pretrial detention.

6. Hunyo 4, 2019

   Gin-raid sang mga agent sang special forces ang pulo ka balay sa Sevastopol. Ginkasuhan si Viktor Stashevskiy nga nagaorganisar sang mga hilikuton sang isa ka extremist nga organisasyon.

7. Marso 20, 2019

   Gin-raid sang mga opisyal sang special forces ang walo ka balay sa Alupka kag Yalta. Gin-interogar si Artem Gerasimov kag ginkasuhan nga nagaorganisar sang extremist nga hilikuton.

8. Nobiembre 15, 2018

   Gin-raid sang sobra 200 ka pulis kag special forces ang walo ka balay sa Dzhankoy, pati ang balay ni Sergey Filatov.