Ara sa Prisuhan Bangod sa Ila Pagtuo—South Korea

Sang Oktubre 26, 2020, sa una nga bes sa kasaysayan, ang gobierno sang South Korea naghatag sang alternative civilian service sa mga nagpangindi nga magsoldado bangod sa konsiensia. Pero, nagsiling man ang mga awtoridad sa human rights nga ang alternative civilian service sang South Korea, indi patas, grabe kabudlay, kag malawig katama. Ang kalawigon sini supak sa internasyonal nga mga kasuguan kay nagalawig ini sing 36 ka bulan nga doble sa kalawigon sa pagserbisyo sa militar. Base sa sini nga mga kasuguan, ang kalawigon sang alternative service indi dapat magsobra sa 1.5 nga kalawigon sang pagserbisyo sa militar, magluwas lang kon may mabakod nga rason. May pila ka brother sa South Korea nga nangindi sa paghimo sang alternative service. Ang iban sa ila nagpasaka sang reklamo sa korte. Sang Mayo 30, 2024, gin-dismiss sang Constitutional Court sang South Korea ang tanan nga reklamo kontra sa alternative service sa desisyon nga 5-4. Bisan pa sini nga desisyon, ang pila sa ila nga indi pabor sa sini, nagsiling: “Ang amo sini nga alternative service, daw lain lang nga porma sang pagsilot nga nagalapas sa kahilwayan sang mga nagapangindi nga magsoldado bangod sa konsiensia.”

Si Woo-jin Byeon, nga 29 anyos kag may asawa, amo ang una nga napriso kay nagpangindi sia sa paghimo sang alternative service sang South Korea. Matinahuron sia nga nagpangindi sa alternative service. Nagsiling sia nga kon sa ulihi may ara sang alternative service nga indi tam-an ka estrikto, handa sia nga batunon ini. Pero sang Hulyo 24, 2024, ginsentensiahan sia sang korte nga mapriso sing isa ka tuig kag anom ka bulan.

Subong, may 13 ka lalaki nga Saksi nga nangindi sa paghimo sang alternative service, kag lakip sa ila si Mr. Byeon. Ang 11 sa ila padayon pa nga gina-hearing. Depende sa mangin desisyon sang korte, puede sila kabigon nga mga kriminal kag prisuhon. Sa subong, ang kalabanan nga nangindi magsoldado bangod sa ila konsiensia nagdesisyon nga maghimo sang alternative service bisan pa grabe ini ka estrikto.

Time Line

1. Hulyo 24, 2024

   Ginsentensiahan si Woo-jin Byeon nga mapriso sing 18 ka bulan bangod nagpangindi sia nga maghimo sang alternative service.

2. Nobiembre 10, 2022

   Nakabaton si Woo-jin Byeon sang imbitasyon nga magsoldado, gani nagsulat sia sa Military Manpower Administration nga nagasiling nga nagapangindi sia nga magsoldado kag maghimo sang alternative service bangod sa iya konsiensia.

3. Oktubre 26, 2020

   Naghatag sang alternative service ang gobierno sang South Korea para sa mga nagpangindi nga magsoldado bangod sa ila konsiensia.

4. Nobiembre 1, 2018

   Nagdesisyon ang Supreme Court sa South Korea nga indi krimen ang pagpangindi nga magsoldado bangod sa konsiensia. Ang nangin desisyon 9-4.

5. Hunyo 28, 2018

   Gindeklarar sang Constitutional Court sang South Korea nga supak sa konstitusyon ang isa ka seksion sang Military Service Act, kay wala ini nagahatag sang alternative service para sa mga nagapangindi nga magsoldado bangod sang ila konsiensia.

6. Oktubre 18, 2016

   Sa una nga bes, gindeklarar sang Gwangju Appellate Court nga indi guilty ang tatlo ka Saksi nga nagpangindi nga magsoldado bangod sang ila konsiensia.

7. Agosto 30, 2011

   Sa liwat, ginsuportahan sang Constitutional Court ang kasuguan nga nagasilot sa mga nagapangindi nga magsoldado bangod sang ila konsiensia.

8. Agosto 26, 2004

   Ginsuportahan sang Constitutional Court ang kasuguan nga nagasilot sa mga nagapangindi nga magsoldado bangod sang ila konsiensia.

9. 1975

   Ginsugo sang gobierno ang puersa nga pagpalista para magsoldado.

10. 1973

    Ginsugdan sang gobierno ang pag-torture sa mga Saksi nga ginpriso kag nagpadayon ini asta sa tungatunga sang 1990.

11. 1953

    Ginpriso sang gobierno ang una nga Saksi nga nagpangindi nga magsoldado bangod sang iya konsiensia.