Ara sa Prisuhan Bangod sa Ila Pagtuo—Ukraine

Sa sulod sang halos treinta ka tuig, ang mga Saksi ni Jehova sa Ukraine nakabenepisyo sa kasuguan nga nagahatag sa mga nagapangindi magsoldado bangod sa konsiensia sing kinamatarong nga maghimo sang alternative civilian service. Paagi sa sini, makahimo sila sang sarisari nga serbisyo publiko kag indi nila malapas ang ila konsiensia.

Pero, sugod sang inaway sa Ukraine sang Pebrero 24, 2022, nakita nga sa tion mismo sang inaway, wala sang kasuguan para sa alternative civilian service sa mga nangindi nga magsoldado amo nga ginatos ang ginpasakaan sing kaso. Sa sini nga sitwasyon, wala gid ginkilala ang ila mga pagpati nga amo ang rason kon ngaa indi gid sila magkompromiso kag wala ginrespeto ang ila kinamatarong nga sundon ang ila konsiensia. Ini nga pagtrato supak sa mga prinsipio sa tawhanon nga mga kinamatarong kag sa Konstitusyon sang Ukraine, nga nagasiling: “Kon ang pagsoldado batok sa relihioso nga mga pagpati sang isa ka banwahanon, ini nga hilikuton dapat islan sang alternative service (nga wala sing koneksion sa militar).”

Asta sang Hunyo 17, 2025, lima na ka Saksi nga lalaki ang ginpriso kay nagpangindi sila nga magsoldado bangod sa konsiensia. Ginsentensiahan sila nga mapriso sing 36 ka bulan. May tatlo pa ka Saksi nga lalaki nga ara subong sa pretrial detention, kag nagahulat sang ila sentensia.

Nagakabalaka ang Internasyonal nga mga Organisasyon

Bangod sining mga pagpangpriso, tatlo ka UN Special Rapporteurs ang nagpabutyag sang ila kabalaka parte sa kakulang sa pagpatuman sang alternative civilian service sa Ukraine. Sa ila sulat sa gobierno sang Ukraine, nga napetsahan Nobiembre 8, 2023, sila nagsiling: “Nagakabalaka man kami sa ginpang-akusar nga mga tawo nga nagapangindi sa pagsoldado base sa ila konsiensia, lakip ang mga nagasuporta sa mga kinamatarong nga magpangindi nga magsoldado bangod sa konsiensia.”

Impormasyon Parte sa Isa nga Napriso Bangod sa Konsiensia

Andrii Khomenko

Si Andrii Khomenko nabawtismuhan bilang isa sa mga Saksi ni Jehova sang 2002. Upod sa iya asawa nga si Iryna, may ginapadaku sila nga duha ka bata nga lalaki. Bilang pamilya, regular nila nga ginatun-an ang Biblia kag ginasugid ang makapaumpaw nga mensahe kag paglaum nga ginahatag sini sa mga tawo sa ila lugar. Sang nagsugod ang inaway sang 2022, gilayon nga nagbulig si Andrii sa mga nagbakwit nga indibiduwal para makakita sila sang maistaran kag nagbulig man sia para makakuha sang bulong ang mga tigulang.

Bangod sa iya relihioso nga mga pagpati, nagpangabay si Andrii nga maghimo sang alternative civilian service sang ginpatawag sia sa militar sang Marso 2024. Wala ginpasugtan ang iya pangabay kag ginpasakaan sia sang kaso. Bilang resulta, sang Hulyo 26, 2024, ang Okhtyrka District Court nagdesisyon nga guilty si Andrii kay nagalikaw sia kuno nga magsoldado kag ginsentensiahan nga mapriso sang tatlo ka tuig. Nag-appeal sia, pero ginsuportahan sang Sumy Court of Appeal ang desisyon sang Disiembre 23, 2024. Sang Pebrero 3, 2025, ginpriso si Andrii.

Time Line

Hunyo 17, 2025

May walo ka Saksi nga ginpriso.
Pebrero 24, 2022

Ginpatuman ang Martial law, kag ginpahanda ang tanan sa inaway.
Hunyo 23, 2015

Sang nagahanda ang militar sa inaway, ginsuportahan sang High Court of Ukraine ang kinamatarong ni Vitaliy Shalaiko nga magpangindi sa pagsoldado bangod sa iya konsiensia.
Disiembre 1991

Ginsugdan ang kasuguan sa Alternative Service (nga wala sing koneksion sa militar).
Pebrero 28, 1991

Opisyal nga ginrehistro ang mga Saksi ni Jehova sa Ukraine.