Ang Pagtamod sang Biblia . . .
“Horoscope”—Makabulig Ukon Makahalit?
SA WALA pa ang isa ka iloy makasugod sang iya adlaw-adlaw nga buluhaton ginabasa niya anay ang “Imo mga Bituon” nga kolumna sa pamantalaan. Ang isa ka manugbaligya sang aksiones nagatelepono anay sa iya astrologo antes magbaligya. Ang isa ka sugarol sa karera nagauyat sing isa ka bugkos nga kuwarta sa isa ka kamut kag ang pihak nga kamut nagauyat sing libro nga How to Play the Horses Horoscopically. Ang mga bituon sa hampang, mga politiko, kag ang madamo pa, nagakonsulta sang ila horoscope antes maghimo sing desisyon.
May epekto bala sa imo kabuhi ang posisyon sang mga bituon, mga planeta, bulan, kag sang adlaw sa pagkabun-ag sang isa ka tawo subong ginapakita sa tsart sang mga astrologo? Minilyon sa karon ang nagapati sa sini. Gani mahimo magapalibog ikaw:
Makabulig Gid Bala ang mga “Horoscope”?
Huo, sabat sang makugi nga mga sumulunod sini. Ngaa amo sini ang ila pagpati? Ang isa ka tawo nagpaathag: “Ginabasa ko ang akon horoscope kada adlaw . . . kag masiling ko nga 80 porsiento sang ginsugid sa akon ang nagmatuod.” Huo, nagapati sila nga may sabat ina, ukon sa dimagkubos nagatuytoy ina sa paglubad sang ila mga palaligban, subong masapwan sa horoscope.
Apang, makabulig gid bala ang mga kolumna sang horoscope sa mga pamantalaan? Tan-awa kon ano ang ginsulat sang kilala nga astrologo nga si Alexandra Mark sa iya libro nga Astrology for the Aquarian Age: “Ining mga pagpatpat . . . halos indi aplikado sa isa ka indibiduwal luwas nga nataboan lamang. Apang ang gahom sang pagpanugda indi mapakadiutay.” Magdulog anay kag maghunahuna, luyag mo bala nga ang kabuhi tuytuyan sang wala ginahungda nga hitabo ukon paagi lamang sa gahom sang pagpanugda?
‘Apang,’ mahimo mamangkot ikaw, ‘sibu bala ang paghimo sing personal nga horoscope nga napasad sa eksakto nga oras kag lugar nga natawhan sang isa?’ Ina nga pagpati maathag nga napasad sa ideya nga ang langitnon nga mga butang may gamhanan nga impluwensia sa kabuhi sang mga tawo. Apang paano ini magmatuod bangod sang daku nga mga kalayuon sa ulot sang mga planeta kag sang duta? Ginpakita sang mga sientipiko nga, kon may yara man, ang epekto sang langitnon nga mga butang sa mga indibiduwal indi salapakon. Sa kamatuoran, ang ideya nga ginpasaran sang astrolohiya nga ang duta amo ang sentro sang uniberso kag nga ang adlaw kag mga planeta nagalibot sa sini, indi matuod.
Samtang ang pagkamabuligon sang horoscope ginaduhaduhaan, ipamangkot naton ang labi ka importante nga pamangkot:
Makahalit Bala ang mga “Horoscope”?
Huo, makahalit. Kon basahon mo ang mga kolumna sang horoscope, may katalagman nga madula mo ang imo ikasarang sa paghimo sing maalamon nga mga desisyon, ukon suno sa astronomo nga si Roger Culver: “Ang katalagman amo nga iban ang imo basulon—gintiklod ako sang mga bituon sa paghimo sini.” Matuod, mahimo nga basahon sang isa ka tawo ang mga kolumna agod lamang malingaw, apang pananglitan ang isa ka hitabo sa iya kabuhi naghisanto sa iya nabasahan sa horoscope. Mapatalang bala sia sa pagpati nga may kamatuoran sa mga tagna sang horoscope? Masulay ayhan sia sa astrolohiya?
Kon amo, mahimo matabo ang grabe pa. Ang nag-umpisa subong indi makahalit nga pagkamausisaon mahimo nga mangin isa ka buhat nga nagasupak sa ginsiling sang Labing Gamhanan nga Dios. Ang dumaan nga mga Israelinhon ginsilingan anay ni Jehova nga Dios nga ginadumtan niya ang bisan ano nga porma sang pagpamakot, lakip ang pagsandig sa langitnon nga mga butang.
Agod ipakita sing sibu gid kon daw ano ka serioso ini nga butang, ang Biblia nagasiling: “Kon may makit-an sa tunga nimo, sa isa sang imo mga siudad nga ginhatag sa imo ni Jehova nga imo Dios, nga lalaki ukon babayi nga nagahimo sing malaut sa itololok ni Jehova nga imo Dios, sa paglapas sang iya katipan, kag nagkadto kag nag-alagad sa iban nga mga dios kag nagsimba sa ila ukon sa adlaw ukon sa bulan ukon sa bisan anong kasoldadosan sang langit nga wala ko ginsugo, kag nasugid ini sa imo kag nabatian mo ini, nian usisaon mo sing maid-id, kag, yari karon! kon ini matuod kag ang butang pat-od nga ang subong nga kangil-aran ginhimo sa Israel! nian paguwaon mo sa imo mga gawang ina nga lalaki ukon ina nga babayi nga naghimo sining malaut nga butang, kag batuhon mo sia, kag dapat sia mapatay.”—Deuteronomio 17:2-5.
Ngaa ginakangil-aran sang Dios ang paggamit sa adlaw, bulan, kag mga bituon subong mga palatandaan? Una, batok ini sa katuyoan sa pagtuga sa ila. (Genesis 1:14-18) Dapat kita magpatuytoy sa Manunuga, indi sa tinuga. (Roma 1:25) Ikaduha, ang Dios dapat nga may tumalagsahon nga lugar sa aton kabuhi. Ang pagsimba sa iya indi dapat ipaambit sa bisan sin-o nga tawo ukon bisan ano nga butang. (Deuteronomio 4:24) Ang isa ka tawo mahimo nga magsandig sing daku sa iya horoscope nga halos daw wala sing kinatuhayan ang pagsandig kag pagsimba. Ikatlo, mahimo sini buksan ang ganhaan padulong sa okultismo. Kag ang pagtilawtilaw sa okulto makahimo sa isa ka wala nagasuspetsa nga tawo nga mangin isa ka mahapos nga puntariya sang labaw sa kinaugali nga puersa sa likod sang okultismo—ang mga demonyo. (Ipaanggid ang Deuteronomio 18:9-12; Isaias 47:12-14; Binuhatan 16:16-18.) Agod malikawan naton ang katalagman nga madalahig sa horoscope, ang Dios nagaaman sa aton sing butang nga maayo pa:
Isa ka Superyor nga Tuytoy
Nagaaman sa aton si Jehova nga Dios sang iya Pulong, ang Biblia, nga pirme masaligan. Sia nagapasalig sa aton: “Mangin subong sini ang akon pulong nga nagaguwa sa akon baba. . . . Pat-od nga magamadinalag-on ini sa butang nga akon ginpadal-an sini.”—Isaias 55:11.
Apang, kinahanglan naton ang panikasog sa pagpanalawsaw sa Pulong sang Dios kag agod makakuha sing espesipiko nga laygay. Amo sina ang ginhimo sang maalam nga si Hari Solomon. Sia nagsulat: “Kay ini tanan ginpahamtang ko sa akon tagipusuon, sa pag-usisa sini tanan, kag ang matarong kag ang maalam kag ang ila binuhatan yara sa kamut sang matuod nga Dios.” (Manugwali 9:1) Gani, sa baylo nga tuytuyan sang indi malig-on nga kamut sang horoscope sang astrologo, ipahamtang ang imo pagsalig sa malig-on nga kamut ni Jehova nga Dios.
[Kahon sa pahina 15]
“Nagumon ang mga tawo. Kinahanglan nila ang bulig sa paghimo sing desisyon tuhoy sa pinansial, personal nga mga kaangtanan kag palamugnan. Wala ini ginahatag sang relihion subong sang una kag ang sikyatriya may mga limitasyon. Gani . . . sa pagtinguha nga iangot ang ila kaugalingon sa butang nga daw may yara sientipiko nga posibilidad [sila] nagliso sa nagadugang nga kadamuon sa astrolohiya.”—Dr. Alan Rosenburg, saykayatris, Nature/Science Annual
[Kahon sa pahina 16]
Ang Committee for the Scientific Investigation of Claims of the Paranormal, sang Nobiembre 16, 1984, nagpanugda nga ibalhag ining pagpanghiwala tuhoy sa tanan nga kolumna sang horoscope: “Ang masunod nga mga pakot sang astrolohiya dapat basahon subong kalingawan lamang. Ina nga mga pakot wala sing masaligan nga sadsaran sa sientipiko nga kamatuoran.”