Ang NU—Paagi Bala sang Dios Padulong sa Paghidait?

“Kombinsido ako nga ang Nasyones Unidas nagaaman sing labing maayo nga dalan padulong sa palaabuton para sa ila nga may pagsalig sa amon ikasarang sa pagdihon sang aton kapalaran sa sining planeta.”

INA nga pagsalig ginpabutyag ni anay Sekretaryo-Heneral Kurt Waldheim sa iya libro nga The Challenge of Peace. Bisan pa ginabaton ang mga kakulangan sang NU, sia nagpaathag man: “Dapat marealisar sang isa nga ang Nasyones Unidas isa ka gamay nga kalibutan. Busa ang mga kaluyahon sini dapat tamdon una sa tanan subong mga pagsumpakilay nga nagaluntad mismo sa kalibutan nga komunidad.” Sia nagdugang: “Dapat ko sambiton nga [ang NU] isa lamang ka salaming sang kalibutan nga iya ginaalagaran. Nga ang kalibutan isa ka hugpong sang nanuhaytuhay, sa masami mabudlay swetohon, mainiton, kag makiawayon nga mga pungsod.” Apang indi subong sina ang pagtamod sang tanan nga komentarista sa NU.

Sa ila libro nga A Dangerous Place—The United Nations as a Weapon in World Politics, sanday Propesor Yeselson kag Gaglione nagpangatarungan nga kutob pa sa maaga nga mga adlaw ang NU nangin isa ka asambleya sa pagpabutyag sing malain nga mga buot kag nga isa ini ka kahon sang mga pagbangigay kag politikal nga mga pagmaniobra nga makapadabdab lamang sang kalayo sang internasyonal nga inaway. Kag kamusta ang kalibutan nga ginapanghikotan sini? “Ang tiko apang simple lamang nga kamatuoran amo nga ang politika sang kalibutan daw subong gid sang kagulangan. Ang panimuot sang pungsod amo ang interes sa kaugalingon kag sa kaugalingon nga kaluwasan. Ang sobra nga kabalaka sa kaluwasan nagahatag sa pungsod-estado nga sistema indi lamang sing kasugoan sang kagulangan kundi sing moralidad man.” Subong resulta, “ang inaway nangin permanente nga bahin sang internasyonal nga mga relasyon.”

Daw ano ka tuhay sa ila anay paglaum sang ang Karta sang Nasyones Unidas ginpirmahan sang 1945! Ang introduksion sa konstitusyon sini nagsiling: “KITA NGA KATAWHAN SANG NASYONES UNIDAS NGA DETERMINADO sa pagluwas sang masunod nga mga kaliwatan gikan sa halit sang inaway, nga makaduha sa aton pagkabuhi nagdala sing daku gid nga kasubo sa katawhan . . . NAGPAMAT-OD NGA TINGUBON ANG ATON MGA PANIKASOG SA PAGTUMAN SINING MGA TULUMURON.”

Kap-atan ka tuig sang ulihi daw wala na ini sing kahulugan. Sa baylo nga magtingob, nagbahinbahin ang mga pungsod. Bisan sa karon ang inaway amo ang ginaeksperiensiahan sa adlaw-adlaw sang minilyon sa lainlain nga bahin sang kalibutan! Sa kada adlaw ang katawhan nagaantos kag nagakapatay subong mga biktima sang inaway—walay sapayan sang pagluntad sang NU.

Sin-o Gid ang sa Likod sang NU?

Bisan pa nagakatuhay sing pagtamod, ang duha ka libro nga ginbalikwat kaina nagatingob sa isa ka tumalagsahon nga detalye. Si Wald­heim nagsiling nga ang NU ‘isa ka salaming sang kalibutan nga iya ginaalagaran,’ kag si Yeselson kag si Gaglione nagpaanggid sang politikal nga kalibutan sa kagulangan. Sa amo ang NU mahimo gid nga nagapabanaag sang amo man nga kasugoan sang politikal nga kagulangan nga ginapuy-an sang iya mga katapo.

Ginahunahuna ini, makapainteres gid nga talupangdon ang mga simbulo nga gingamit sa Biblia. Ang Biblia nagahambal tuhoy sa isa ka “sapat nga mapintas” kag subong man sa “larawan” sini nga ginalaragway subong “mapula nga sapat nga mapintas.” (Bugna 13:1, 2, 14; 17:3, 8, 11) Ang una nga sapat nga mapintas nagalaragway sa bug-os nga politikal nga organisasyon sang kalibutan nga nagluntad sa sulod sang nagligad nga 4,000 ka tuig kag nagkatuhaytuhay sing daku sa kalibutan karon.a Kon amo ano ang ginalaragway sang “larawan” sang sapat?

Suno sa libro nga ginbalikwat kaina, ano nga organisasyon ang nagasalaming sang politikal nga sistema karon? Maathag nga amo ang NU nga may 159 ka katapo nga halos nagatiglawas sa bug-os nga uniberso. (Tan-awa ang pahina 11.) Kag ang simbulo sang sapat nga mapintas sa Biblia nagahisanto gid sa larawan sang ‘politikal nga kagulangan.’ Makapasubo apang matuod nga madamo nga politiko ang naggamit kag nagagamit gihapon sang ila politikal nga mga pilosopiya kaangay sang mga sapat nga mapintas—mapintas nga nagapamatay sa minilyon ka katawhan, mga soldado kag mga sibilyan, sa ila mga inaway kag politikal nga mga intereses. Ang pagpaantos kag pagpamatay amo anay kag amo sa gihapon ang mga kasangkapan sang politikal nga pagpamigos. Kag ang kalabanan sini gihapon nga mga pangulohan kag mga pilosopiya may mga tiglawas nga ginatahod sa NU.

Bangod sini, makatarunganon bala ang magpati nga ang NU amo ang paagi sang Dios padulong sa paghidait, labi na bangod sang pinakasimple nga paglaragway nga ang “Dios gugma”? (1 Juan 4:8) Apang kon ang NU indi ang sabat sang Dios sa problema, ano gid ang sa likod sang NU?

Maathag nga ginasugid sang Biblia kon sin-o ang ginhalinan sang politikal nga sistema sang “sapat nga mapintas” kag sang “larawan” sang NU. Sa Bugna 13:2 aton mabasa: ‘Kag ang dragon naghatag sa sapat sang iya gahom kag sang iya trono kag sing daku nga pagbulut-an.’ Sin-o ang ginalaragway sang “dragon”? Ginapaathag man sang Biblia nga ang “dragon” amo ang “ginatawag nga Yawa kag Satanas, nga nagapatalang sa bug-os napuy-an nga duta.” Apang sa anong paagi ginapatalang ni Satanas ang kalibutan?—Bugna 12:9.

Paagi sa tanan posible nga pahito sang politika kag pilosopiya, lakip ang NU, ginapaliso ni Satanas, ang orihinal nga butigon, ang igtalupangod sang katawhan gikan sa lamang matuod nga banas padulong sa paghidait kag kalig-onan—ang paggahom sang Ginharian sang Dios sa ibabaw sini nga duta. (Juan 8:44) Sa sulod sang halos duha ka libo ka tuig, ang nagapangangkon nga mga Cristiano nagapangamuyo, “Magkari ang imo ginharian.” Apang ang kalabanan wala makahangop kon ano ang kahulugan sang Ginharian sang Dios. Ano ang kahulugan sini sa imo? Importante gid nga mahangpan sing husto kon ano ini bangod ina nga Ginharian tuman na kalapit karon.—Mateo 6:9, 10.

Nahibaloan sang mga koresponsal sang Magmata! gikan sa personal nga pagpakighambal nga madamo sang sinsero kag dedikado nga katawhan ang nagapanghikot sa pagpauswag sang mga tulumuron sang NU. Nakita man sining mga tawo ang mga kaluyahon sang organisasyon, apang kaangay ni Kurt Waldheim kag sang iban pa, nagapati sila nga amo lamang ini ang paglaum sang katawhan para sa dayon nga paghidait kag kalig-onan. Wala sila sing nahibaloan nga maayo pa nga solusyon. Apang may yara solusyon nga ayhan nalaktawan nila—ang paggahom sang Ginharian sang Dios.—Bugna 11:15.

Ang Lamang Matuod nga Paagi Padulong sa Paghidait

Ginapakita sang Biblia nga ang Ginharian sang Dios nagapatuhoy sa langitnon nga paggahom ukon pangulohan sa duta gikan sa duog sang mga espiritu. (Daniel 2:44; Bugna 21:1-4) Ining Ginharian nga pangulohan paagi kay Cristo nagapanghikot na sa bug-os nga kalibutan kag nagahanda sang katawhan gikan sa nanuhaytuhay nga mga pungsod para sa kabuhi nga walay katapusan sa idalom sang paggahom sini. Ining nahiusa gid nga hubon sang katawhan gikan sa tanan nga pungsod kag tanan nga hambal nakilal-an subong mga Saksi ni Jehova. Sila sa pagkamatuod “nahiusa nga mga pungsod” nga ‘nagsalsal [na] sang ila mga espada nga mangin mga punta sang arado.’ Nabugras na nila ang mga kadena sang rasismo kag nasyonalismo, nga gintawag “ang labing gamhanan kag malaglagon nga puersa sa internasyonal nga politika.” Ina nga mga kadena nagahigot pa gihapon kag nagasablag sa NU.—Isaias 2:2-4.

Paagi sa personal nga pagtuon sing Biblia, nahibaloan sang mga Saksi ni Jehova nga ang Ginharian sang Dios lamang ang makadala sing matuod kag dayon nga paghidait sa sini nga duta kag malapit na ang tion nga ang Ginharian sang Dios magahikot. (Lucas 21:31-33; Bugna 16:14, 16) ‘Ano nga paghikot?’ mahimo ipamangkot mo. Amo ang paglaglag sa mga tawo nga hungod nga nagalaglag sang duta. (Bugna 11:18) Nagalakip ini sa pagdugmok sa tanan nga politikal nga elemento nga nagabahinbahin. (Daniel 2:44) Sa amo ginasikway sang mga Saksi ni Jehova subong disangkol ang huwad nga solusyon ni Satanas—ang NU. Apang ngaa disangkol ini?

Ang Olandes nga pilosopo nga si Spinoza sang ika-17 ka siglo naglaragway sa paghidait subong “indi wala sing inaway” kundi kapin ang ginalakip. Sia nagsiling: “Isa ini ka maayo nga moral, isa ka kahimtangan sang panghunahuna, isa ka maayo nga disposisyon, nga may pagsalig kag katarungan.” Matigayon lamang ina paagi sa pagtudlo sa katawhan sa gugma kag paghilisanto sa baylo sang dumot kag pagbinahinbahin. Subong ginrekord sang manunulat sang Biblia nga si Santiago: “Ang bunga sang pagkamatarong may binhi nga ginasab-ug sa idalom sang mahidaiton nga mga kahimtangan para sa mga mahidaiton.” (Santiago 3:18) Paagi sa ila edukasyonal nga hilikuton sa bug-os nga kalibutan ginatudlo sang mga Saksi ni Jehova ang mga dalanon sang Dios para sa paghidait, kay ang iya Pulong nagasiling: “Ang tanan mo nga anak tudloan ni Jehova, kag mangin bugana ang paghidait sang imo mga anak.”—Isaias 54:13.

Kon luyag mo nga makatuon sing dugang pa nahanungod sa Ginharian nga pangulohan sang Dios, indi magpangalag-ag sa pagpalapit sa mga Saksi ni Jehova sa inyo duog. Malipay sila sa pagbulig sa imo nga makatuon sang paagi sang Dios padulong sa paghidait.

[Footnotes]

[Kahon sa pahina 11]

Daku nga mga Problema nga Nagaapektar sa NU

Bahin lamang nga listahan sang daku nga mga problema karon sa kalibutan nga nagapabalaka sa madamo sang katapo nga mga pungsod sang NU.

1. Palumba sa nuklear nga mga hinganiban kag ang pag-engkwentrohanay sang E.U.A. kag U.S.S.R.

2. Indi balanse nga ekonomiya sang kalibutan sa Aminhan kag Bagatnan; daku nga utang sa luwas sang nagauswag pa lang nga mga pungsod

3. Gutom kag kaimulon sa Aprika, amat-amat nga paglapad sang desyerto sang kontinente

4. Mga droga, pagbaligya sini sa mga pungsod

5. Internasyonal nga terorismo

6. Pagdampigdampig sa rasa sa Bagatnan nga Aprika kag ang relasyon sini sa kaingod nga mga estado

7. Ang pagpain sang Namibia gikan sa Bagatnan nga Aprika

8. Ang hulusayon sa ulot sang Israel kag Palestina

9. Kagamo sa Lebanon

10. Inaway sa ulot sang Iran kag Iraq

11. Southeast Asia, pag-agaw sang mga taga-Vietnam sa Kampuchea

12. Sentral Amerika, inaway sang mga gerilya sa El Salvador kag Nicaragua

13. Afghanistan, pagpanghilabot sang Unyon Sobiet

14. Problema sang kalibutan tuhoy sa mga refugee, kapin sa napulo ka milyon ang apektado

15. Mga pag-abuso sa kinamatarong sang tawo

Ining listahan ginpasad sa mga pamulongpulong nga ginpresentar sa ika-39 nga sesyon sang General Assembly sang NU sang 1984 sang 150 ka tiglawas, lakip ang 16 ka pangulo sang estado ukon pangulohan. (Tan-awa ang UN Chronicle, Tomo XXI, Numero 8/1984.)

[Kahon sa pahina 11]

Kon Paano Nagdamo ang mga Katapo sang NU

1945 51 ka pungsod: Sentral kag Bagatnan nga Amerika 19; Europa 14; Asia 2; Natung-an nga Sidlangan 7; Aprika 3; Pasipiko 3; Naaminhan nga Amerika 3

1950 60 ka pungsod: Sentral kag Bagatnan nga Amerika 19; Europa 16; Asia 7; Natung-an nga Sidlangan 9; Aprika 3; Pasipiko 3; Naaminhan nga Amerika 3

1960 100 ka pungsod: Sentral kag Bagatnan nga Amerika 19; Europa 27; Asia 13; Natung-an nga Sidlangan 10; Aprika 25; Pasipiko 3; Naaminhan nga Amerika 3

1970 127 ka pungsod: Sentral kag Bagatnan nga Amerika 23; Europa 28; Asia 16; Natung-an nga Sidlangan 12; Aprika 41; Pasipiko 4; Naaminhan nga Amerika 3

1980 154 ka pungsod: Sentral kag Bagatnan nga Amerika 29; Europa 30; Asia 19; Natung-an nga Sidlangan 16; Aprika 50; Pasipiko 7; Naaminhan nga Amerika 3

1985 159 ka pungsod: Sentral kag Bagatnan nga Amerika 32; Europa 30; Asia 20; Natung-an nga Sidlangan 16; Aprika 50; Pasipiko 8; Naaminhan nga Amerika 3

[Laragway sa pahina 9]

Ang mga bandera sang 159 ka katapo nga mga pungsod ginapasundayag sa atubangan sang NU

[Laragway sa pahina 10]

Sin-o ang ‘nakasalsal [na] sang ila mga espada nga mangin mga punta sang arado’?