“Ang Dayon nga Pagkaulay ni Maria” Ang Epekto Sini

ANG iban nga mga bumalasa mahimo nga makibot, kag matingala pa gani, kon makita nila ang tema nga “ang dayon nga pagkaulay ni Maria” nga ginabinagbinag sa idalom sang kabilogan nga tema nga “Ang Iglesia Katolika—Ang Pagtamod Sini sa Sekso.” Indi namon tuyo nga saklawon ang mga Katoliko ukon pakanubuon si Maria. Sa kamatuoran, ginatahod namon sia sing daku subong isa sang matutom nga mga disipulo ni Cristo.

Dugang pa, nagaugyon gid kami nga si Maria isa ka ulay sang ginbun-ag niya si Jesus. (Mateo 1:18-23) Ang pamangkot amo, Nagpabilin bala si Maria nga ulay sa bug-os niya nga kabuhi sa duta?

Madamo nga Katoliko ang Nagaduhaduha

Ang Katoliko nga mga reperensya nagapakita nga ang Katoliko nga mga iskolar nagaduhaduha nga si Maria nagpabilin nga ulay sa bug-os niya nga kabuhi. Ang Biblia makapila nga nagasambit sang “mga utod nga lalaki” kag “mga utod nga babayi” ni Jesus. (Mateo 12:46, 47; 13:55, 56; Marcos 6:3; Lucas 8:19, 20; Juan 2:12; 7:3, 5) Apang, ang iban nga mga Katoliko nagasiling nga ining mga pulong nagakahulugan sing “mga paryente,” subong sang mga pakaisa. Matuod bala ini?

Ang The New Cath­o­lic En­cy­clo­pe­dia nagasiling: “Ang Griegong mga tinaga . . . nga gingamit sa pagpakita sang kaangtanan ni Jesus kag sining mga paryente may kahulugan nga bug-os nga utod nga lalaki kag utod nga babayi sa dugo sa nagahambal sing Griego nga kalibutan sang tion sang mga Ebanghelista kag gani natural lamang nga hangpon sang iya Griego nga bumalasa sa sining kahulugan.” Subong man, ang The New Amer­i­can Bi­ble, isa ka Katoliko nga badbad, nagabaton sa footnote sang Marcos 6:1-6, nga sa diin ang mga utod nga lalaki kag mga utod nga babayi ni Jesus ginsambit: “Ang pamangkot tuhoy sa kahulugan sini wala kuntani mag-utwas kon indi bangod sa pagtuo sang iglesia sa dayon nga pagkaulay ni Maria.”

Maathag nga ginapakita sang Biblia nga si Maria may iban pa nga mga anak luwas kay Jesus; ang panudlo sang Iglesia Katolika nga wala sia sing iban nga mga anak nagtuga sing sinuay. Ang Katoliko nga awtor nga si J. Gilles, nga nag-usisa sang tanan Makasulatanhon nga pamatuod tuhoy sa sini, naghinakop: “Sa malip-ot kag sa mahalungon nga hambal, bangod sang katutom sa Iglesia [Katolika], amo ini ang akon nausisaan. . . . Ang APAT KA EBANGHELYO SANG CANON nagahatag sing nagahilisanto nga pamatuod . . . nga si Jesus may matuod nga mga utod nga lalaki kag mga utod nga babayi sa iya pamilya. . . . Sa atubangan sining malig-on nga pamatuod ang tradisyonal nga tindog [sang Iglesia Katolika] daw maluya kag mahuyang.”

Gani kon ang Biblia wala nagahatag sing pamatuod tuhoy sa “dayon nga pagkaulay ni Maria,” sa diin naghalin ining pagtuluohan?

Mga Ginhalinan sang Pagtuluohan

“Sa pila ka dumaan nga relihion,” siling sang Jesuita nga pari nga si Ignace de la Pot­te­rie, “ang pagkaulay may relihioso nga balor. Ang pila ka diosa (­Anath, Artemis, Athe­na) gintawag nga mga ulay.” Apang, ano ang kaangtanan sina kay Maria? Ang Katoliko nga pari nga si An­drew Gree­ley nagapaathag: “Ang simbulo ni Maria talangkod nga nagaangot sang Cristianismo sa dumaan nga mga relihion sang iloy nga mga diosa.”

Ang propesor sang maragtas sang iglesia nga si ­Ernst W. Benz nagkomento tuhoy sini nga kaangtanan sa pagano anay nga mga relihion. “Ang pagsimba sa iloy sang Dios,” sulat niya sa The New En­cy­clo­pæ­dia Bri­tan­ni­ca, “nagbaskog sang ang Cristianong Iglesia nangin iglesia sang emperyo sa idalom ni Constantino kag ang mga pagano nagpanong sa iglesia. . . .Ang relihioso nga buhat kag ihibalo [sang katawhan] ginporma sa sulod sang milenyo paagi sa kulto sang ‘dakung iloy’ nga diosa kag sang ‘balaan nga ulay,’ isa ka hitabo nga naghalin pa sa bantog anay nga mga relihion sang Babilonia kag Asiria . . . Walay sapayan sang indi kalahamut-an nga mga komento sa tradisyon sang mga Ebanghelyo, ang kulto sang pagsimba sa balaan nga ulay nga iloy nakasapo sa sulod sang Cristianong Iglesia sing bag-ong posibilidad paagi sa pagsimba kay Maria.”

Apang ano ang nagpahulag sa Iglesia Romana nga magpasibu kag batunon ang kulto sang “dakung iloy” nga diosa kag sang “balaan nga ulay”? Una, luyag ini sang “mga pagano” nga nagpanong sa iglesia; wala sila nagapang-iban-iban sa isa ka iglesia nga nagasimba sa ‘dakung ulay nga iloy.’ “Sa Egipto,” siling ni Propesor Benz, “si Maria, sang primero, ginasimba na sa idalom sang titulo nga manugdala sang Dios (Theotokos).” Gani ang kulto sang “balaan nga ulay” ginbaton para sa “mga pagano” nga nagapanong sadto sa iglesia.

Ang pagsimba kay Maria nagbaskog sa tion sang una nga ekumeniko nga Konsilyo sang Nicaea sang 325 C.E. Paano? Bueno, ang doktrina sang Trinidad ginhimo didto nga isa ka opisyal nga panudlo sang Katoliko, ang Ni­cene ­Creed nagdeklarar kay Jesus subong amo ang Dios. Gani naghimo ini kay Maria nga “manugdala sang Dios,” ukon “iloy sang Dios.” Kag suno kay Propesor Benz: “Ginhimo sang Konsilyo sang Efeso (431) ini nga titulo nga isa ka dogmatiko nga talaksan.” Ang masunod nga tikang amo ang paghimo kay Maria nga isa ka “dayon nga ulay.” Natabo ini sang ang titulo nga “dayon nga Ulay” ginhatag kay Maria sang ikaduha nga Konsilyo sang Con­stan­ti­no­ple sang 553 C.E.

Mga Resulta sang mga Panudlo

Si Propesor J. J. Pelikan sang Yale nagsulat: “Ang pagtubo sang nagadingot sa kaugalingon nga sulundan sa iglesia nagbulig sa pagsakdag sining pagtamod kay Maria subong modelo sang dayon nga pagkaulay.” Ining “pagdingot sa kaugalingon nga sulundan” makita man sa pag-utwas sang monastisismo kag sang panaad nga indi magminyo sang mga siglo sa tapos sang Nicaea. Ginatos ka libo ka Katoliko nga mga pari, mga monghe, kag mga madre ang nagtinguha—ang iban sing madinalag-on, ang madamo wala magmadinalag-on—sa pagkabuhi nga nagalikaw sa sekso bangod ang iglesia nagtudlo nga ang sekso kag pagkabalaan indi magkabagay.

Sing talalupangdon, ang nagapanguna nga awtoridad sang iglesia, si “Santo” Au­gus­tine, “nag-angot sang orihinal nga sala sa kailigbon sa sekso.” Matuod, ang kalabanan sang Katoliko nga mga teologo sa karon wala na nagaugyon sa sini nga pagpati. Apang wala bala ang doktrina tuhoy sa dayon nga pagkaulay ni Maria kag ang sugo tuhoy sa pilit nga panaad sang pari nga indi magminyo nagatuga sing impresyon nga ang sekso mahigko? Kag wala bala ang pagsulit liwat sang Batikano sa pagsulundan sang diborsio kag pagpugong sang pagpamata nagpadaku pa sang problema para sa minilyon ka Katoliko?

Labi ka importante, ano ang pagtamod sang Biblia tuhoy sa sekso?

[Kapsion sa pahina 8]

“Ang APAT KA EBANGHELYO SANG CANON nagahatag sing nagahilisanto nga pamatuod . . . nga si Jesus may matuod nga mga utod nga lalaki kag mga utod nga babayi.”—Katoliko nga awtor

[Laragway sa pahina 8]

‘Ang simbulo ni Maria talangkod nga nagaangot sang Cristianismo sa dumaan nga mga relihion sang iloy nga mga diosa’