Ang Pagtamod sang Biblia
Ang Dios—Nagaulikid Bala Sia sa Akon?
“INDI na ako makaagwanta!” hibi niya. “Kon may kaisog lamang ako sa pagpatay sang akon kaugalingon, matapos ko na ang pagkamakatalaka sang kabuhi sa sining napamatbatan nga kalibutan.”
Si Jill “wala sing nakita nga katuyoan sa pagkabuhi sa isa ka kalibutan sang kapaslawan, dumot, kag kasingki.” Nagdumdom sia nga mapaumpawan sia sang mga droga, alkohol, kag musika. Apang wala ini makapaumpaw sa iya. Sang bangod sang diborsio ang mga katapo sang iya pamilya naglinapta sa lima ka direksion, sia namangkot: “Sa diin ang Dios sining tinion?”
Kon matabo sa imo ang malain nga mga butang, amo man bala sina nga mga pamangkot ang nagalabad sa imo hunahuna? Sing tampad, sa diin ang Dios sa aton ginasalot sang mga trahedya nga ika-20 nga siglo? Isa ini ka pamangkot nga dapat atubangon sang tanan nga nagahandum sa pagpati sa isa ka Dios sang gugma. Nagaulikid gid bala ang Dios sa mga nagakatabo sa katawhan? Nagaulikid gid bala sia sa imo?
Nagaulikid ang Dios
Toloka ang imo palibot. Kon ang Dios wala nagaulikid sa mga tawo, ngaa nagpanikasog pa sia nga magtuga sing manamit nga mga kalan-on, makalilingaw nga mga sapat nga nagapahalipay sa tagipusuon, kag sang makapulunaw nga danyag sang kinaugali? Bisan ang malaw-ay nga slum nagatahom bangod sang magayon nga mga kasisidmon. Subong ginsiling ni apostol Pablo sa dumaan nga mga taga-Lycaonia, ang Dios “wala magpabaya sa iya kaugalingon nga walay saksi sa maayong mga butang nga iya ginahimo para sa inyo: nagahatag sia sa inyo sing ulan gikan sa langit, ginapatubo niya ang mga tanum sa panahon nga nagakadapat, nagahatag sia sa inyo sing kalan-on kag nagapahalipay sa inyo.”—Binuhatan 14:17, The Jerusalem Bible.
Apang matuod nga ang matahom nga kasisidmon indi magahimo sang indi malipayon nga pamilya nga magmalipayon. Ang makalilingaw nga mga sapat wala nagadula sang kasakit bangod sang pagkapatay sang mga hinigugma. Ang manamit nga mga prutas indi makapapagsik sang masubo nga mga tagipusuon. Kon ang Dios nagaulikid gid sa mga tawo, ngaa wala sia sing ginahimo nahanungod sa mga kabangdanan sang pag-antos?
Ang sabat amo nga sia may ginahimo nahanungod sini, kag makabenepisyo ikaw. Binagbinaga ang masunod nga pamatuod nga ang Dios nagaulikid sa imo
Kon Paano Naton Mahibaloan nga Nagaulikid Sia
◻ Gintuyo sang Dios ang isa ka dalayawon nga paraiso agod ibulos sa nagaantos nga sistema sang mga butang karon. Maathag nga ginalaragway sang Biblia ang isa ka duta nga sa diin “wala na sing kamatayon, ukon kalisod ukon paghibi ukon kasakit pa.” (Bugna 21:4) Sin-o ang magapuyo sa idalom sining mga kahimtangan? “Ang mga mahagop magapanag-iya sang duta, kag makasapo sila sing kalipay sa kabuganaan sang paghidait.” (Salmo 37:11) Ngaa indi buksan ang imo Biblia sa Isaias kapitulo 11, 35, kag 65 kag basahon ang dugang pa nahanungod sining Paraiso?
◻ Agod mangin posible para sa IMO nga mabuhi sa sina nga Paraiso, gin-aman sang Dios ang iya hinigugma kag bugtong nga Anak. “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Bangod sining kahimusan, bisan ang patay makabenepisyo gikan sa Paraiso nga duta paagi sa pagkabanhaw.—Juan 5:28-30.
◻ Agod nga makahimulos IKAW sa aman sang Dios, ginhimus niya nga ibantala ang maayong balita sang iya Ginharian sa bug-os nga duta. “Iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran; ugaling magaabot ang katapusan.” (Mateo 24:14) Sa idalom sang pagtuytoy sang iya Anak, ginsugo sang Dios ang iya katawhan nga “himuon nga mga disipulo ang tanan nga kapungsuran.”—Mateo 28:18-20.
Apang agod makabenepisyo gikan sa kabalaka sang Dios sa imo, may butang pa nga dapat mo himuon. Dapat mo ipakita sa Dios nga ikaw may pag-ulikid sa iya.
Nagaulikid Ka Bala sa Dios?
Daw makatilingala bala ina? Dapat nga indi. Total, sa bisan anong relasyon sa tunga sang duha ka tawo, indi makatarunganon nga paabuton mo nga isa lamang sa ila ang magaulikid, indi bala? Amo man sa relasyon sang tawo kag ni Jehova nga Dios. Sa liwat kag liwat, ginapaathag ini sang iya Pulong. “Magpalapit sa Dios, kag sa sia magapalapit sa imo,” palig-on sang Santiago 4:8.
Sa pagpakita kon ano ang ginapaabot sang Dios gikan sa iya katawhan, ang Deuteronomio 30:19, 20 nagasiling: “Ginabutang ko sa atubangan mo ang kabuhi kag ang kamatayon, ang pagpakamaayo kag ang pagpakamalaut; kag dapat mo pilion ang kabuhi agod nga magkabuhi ka, ikaw kag imo mga kaliwatan, paagi sa paghigugma kay Jehova nga imo Dios, paagi sa pagpamati sa iya tingog kag paagi sa pag-unong sa iya.” Daw ano ka makapasubo kon mawasi naton ang walay katapusan nga mga benepisyo sang isa ka kaangtanan sa Dios bangod sang kakulang sing nagakaigo nga kabalaka sa aton bahin!
‘Paano ko mapat-od nga nagaulikid ako sa Dios, nga halin gid ini sa aton tagipusuon?’ mahimo ipalibog mo. Halimbawa pangabayon ikaw sang Dios sa pagpili sing wala ginabaton nga tindog dampig sa iya ukon sa paghimo sing sosyal nga pag-alagad sa iya nga wala ginabaton sang mga tawo, subong sang pagbantala sa publiko. Ano ang imo himuon? Handa ka bala nga ipakita paagi sa imo mga buhat nga ikaw nagaulikid sa Dios kag sa iya Anak? Si Jesus nagpaandam: “Ang bisan sin-o nga magkahuya sa akon kag sang akon mga pulong sa sining kaliwatan nga makilahion kag makasasala, ang Anak sang tawo magakahuya man sa iya kon magkari sia sa himaya sang iya Amay upod sa balaan nga mga manugtonda.”—Marcos 8:38.
Sa pihak nga bahin, ginaapresyar gid ni Jehova kag ni Jesus ang mga indibiduwal nga nagapakita sing kabalaka para sa ila kag sa ila matuod nga mga alagad karon. Si Jesus nagsiling: “Ang bisan sin-o nga magpainum sing isa ka tagayan sang mabugnaw nga tubig sa isa sining mga magamay bangod nga sia gintoton-an ko, sa pagkamatuod nagasiling ako sa inyo: indi nga mas-a nga madula sina nga tawo ang iya balos.”—Mateo 10:41, 42, The New English Bible.
Huo, ang Dios nagaulikid sa imo, sa matarong sing tagipusuon nga mga tawo sa bug-os nga duta karon, kag bisan sa mga yara sa lulubngan. Apang ang pag-ulikid duha ka bahin. Nagaulikid ka bala sa Dios? Kon amo, kag kon handa ikaw sa pagpakita nga ikaw nagaulikid, ang wala sing katapusan nga palaabuton mangin imo.
[Mga Laragway sa pahina 20]
Ngaa gin-aman sang Dios ining mga butang kon wala sia nagaulikid?