Paghidait sa Sulod sang Tapik nga Pamilya

● ‘Ginreport nga nadula sang tiyo ang iya pailob kag napatay niya sa sakit ang iya tapik nga bata.’

● ‘Ginluthang sang tin-edyer ang iya tiyo,’ suno sa report sang polisiya.

● ‘Ang katorse anyos nga bata nga lalaki ginluthang sang manding, nga suno sa report tinak-an na sa iya paggawi.’

“ANG tapik nga pamilya mahimo nga mangin mabudlay gid nga mga lugar,” paathag ni Dr. John Visher, kaupod nga tagtukod sang Step­fam­i­ly As­so­ci­a­tion sang Amerika. “Kon ang mga tawo magsulod sa isa ka relasyon nga may indi realistiko nga mga pagpaabot, mahimo nga magareklamo sila sing daku nga kabudlayan.” Bangod sang madamo nga diborsio, ang tapik nga mga pamilya hinali nga nagdugang. Apang sing makapasubo, 44 porsiento sini ang nagakapaslawan sa sulod sang una nga lima ka tuig! Apang, madamo ang nakalandas sang tumalagsahon nga mga palaligban sa pagpahiusa sang duha ka pamilya. Ang pag-aplikar sang masunod nga mga prinsipio sa Biblia importante.

“Maayo pa ang katapusan sang butang sang sa pamuno sini. Maayo pa ang mapailubon sang sa bugalon sa espiritu. Dili ka magmadagmit . . . sa pagpangakig.” (Manugwali 7:8, 9) Ang pagkamapailubon importante! Ang mga relasyon nga ginapasapayanan sa kinaugali nga mga pamilya dapat palig-unon. Indi kamo isa ka “hinali natukod nga pamilya.” Ang mga eksperto nagasiling nga ang proseso tubtob malab-ot ang punto nga batunon ang relasyon nga “kami” mahimo magakinahanglan sing apat pa pito ka tuig. Sa umpisa, ang mga tapik nga ginikanan dapat magpailob. Tinguhai nga indi maakig dayon kon ang mga panikasog sa umpisa nga abyanon ang tapik nga kabataan sikwayon.

“Tungod sa bugal ang isa nagatuga lamang sing binanggianay, apang sa mga nagapaalintonay yara ang kaalam.” (Hulubaton 13:10) Ang matig-a, bugalon nga panimuot—sa bahin sang kabataan ukon sang mga ginikanan—­nagadul-ong sa indi paghangpanay. Regular nga magtipontipon subong pamilya kag hambalan ang mga problema. Ton-i nga ipabutyag ang imo mga balatyagon sa isa ka paagi nga nagapakita sing pagkasensitibo sa iban. Sa imo dugang nga pagkahibalo nahanungod sa “bag-o” nga mga katapo sang pamilya paagi sa bukas nga paghambalanay, magasuod kamo sing kapin.

“Ang nagapakita sing paghantop sa isa ka butang makakita sing kaayohan, kag malipayon ang nagasalig kay Jehova.” (Hulubaton 16:20) Ang paghantop indi lamang pagtulok sa makita sang mata kundi may ikasarang ini sa pagkilala sang mga rason sang pila ka panimuot kag paggawi. (Tan-awa ang interbyu sa pihak nga pahina.) Ini nga kinaiya makabulig sa imo agod makita ang maayo sa iban.

Halimbawa, sa tion sang mainit nga paghambalanay, ang isa ka manding nagsiling kag nagpanugda: “Isugid naton ang indi naton naluyagan sa isa kag isa, kag dayon sundan ini sang butang nga aton gid naluyagan.” Sang ulihi, sia nagsulat: “Nakibot kami sa tanan nga maayong mga kinaiya nga amon gin-apresyar sa isa kag isa.” Ginsundan ini sang pagtulo sang mga luha kag paghaksanay. Sa lain naman nga puluy-an, ang isa ka tin-edyer nagrebelde sang mamana liwat ang iya nanay, apang ang paghantop nagdala sing paghidait. “Pagligad sang pila ka bulan, narealisar ko nga ini nga tawo amo ang nagapahalipay sa akon iloy,” siling ni Jeff. “Kag amo ina ang importante.”

Apang kon bala iaplikar mo ukon indi ining mga prinsipio, depende ina sa imo espirituwalidad. “Ang pagsalig kay Jehova,” nagahandum sa pagpahamuot sa iya, amo ang sekreto sa paghidait sa sulod sang tapik nga pamilya.