Ang Pinasahi nga mga Problema sang Tapik nga mga Pamilya
ANG MALIPAYON NGA MGA TAPIK NGA PAMILYA POSIBLE! PAANO?
Ang tapik nga pamilya nangin kinaandan nga sahi sang panimalay sa madamo nga bahin sang kalibutan. Apang, ang tapik nga pamilya may pinasahi nga mga problema. Pat-od gid nga ang pinakamabudlay amo ang pagpadaku sa bata. Apang, subong sang tinguhaan nga ipakita sang masunod nga duha ka artikulo, ang kabataan mahimo mapadaku sing madinalag-on sa isa ka tapik nga pamilya.
ANG MGA TIYO (IKADUHA NGA BANA SANG ILOY) KAG MGA MANDING MADUGAY NA NGA GINATAMOD SING MALAIN. SANG MGA BATA PA KITA, madamo sa aton ang nakabati sang sugilanon ni Cinderella, nga nag-antos sing daku sa mga kamot sang iya mapintas nga manding. Natun-an man sang mga kabataan sa Europa ang sugilanon nga Snow White and the Seven Dwarfs. Ang manding ni Snow White isa gali ka malauton nga bruha!
Ini bala nga mga sugilanon nagahatag sing husto nga panan-aw sa tapik nga mga pamilya? Malain gid bala ang tanan nga tiyo kag manding? Indi. Luyag sang kalabanan sa ila kon ano ang pinakamaayo para sa kabataan nga nasubli nila paagi sa pagminyo. Apang dapat nila atubangon ang pila ka mabudlay nga mga problema nga duna sa pagkabuhi sang tapik nga mga pamilya.
Ang mga Problema Tuhoy sa Pagpadaku sa Bata
Kon ang nahauna nga pagminyo malugaw-an, ang masunson nga kabangdanan amo ang pagkadihamtong sang magtiayon. Sa ikaduha nga pagminyo, ang pag-atubang sa mga problema tuhoy sa kabataan mahimo magpahuol sang kaangtanan. Ginapakita sang pila ka rekord nga kapin sa 4 gikan sa 10 ka nagsimpunay nga mga pamilya ang nagdangat sa diborsio sa sulod sang nahaunang lima ka tuig.
Ayhan wala mahunahuna sang mga bag-ong kasal ang problema sa emosyon, ang pagsumpakilay sing katutom, kag ang pagbatyag sing kahisa kag kaakig sang mga manak bangod sang pag-abot sang tapik nga ginikanan. Ayhan magabatyag sila nga mas palangga sang ila matuod nga ginikanan ang tapik nga ginikanan. Dugang pa, ayhan indi mahangpan sang matuod nga ginikanan nga ginbayaan sang tiayon ang padayon nga pagpalangga sang kabataan sa iya anay tiayon. Gintilawan nga ipaathag sang isa ka bata nga lalaki ang iya maayo nga kaangtanan sa iya biolohiko nga amay, nga nagasiling, “Mommy, nahibaluan ko nga indi maayo ang pagtratar ni Daddy sa imo, apang mabuot sia sa akon!” Ang subong sini nga ekspresyon, bisan pa nga bunayag, magapabatyag sa iloy sing daku nga kaakig sa amay sang bata.
Ang isa ka tiyo nagtu-ad: “Indi gid ako handa sa pag-atubang sa tanan nga problema may kaangtanan sa pagpadaku sa akon mga manak. Nahunahuna ko nga karon nga kasado na ako sa ila iloy, ako na ang ila amay. Abi ko, mahapos lang ini! Wala ko mahangpi ang pagpalangga sang kabataan sa ila biolohiko nga amay, kag nakahimo ako sing madamo nga kasaypanan.”
Ang mga kahuol mahimo mag-utwas ilabi na may kaangtanan sa disiplina. Ang kabataan nagakinahanglan sing mahigugmaon nga disiplina, apang masunson sila nga nagapamatok sa sini bisan pa nagagikan ini sa matuod nga ginikanan. Daw ano pa gid kabudlay ini batunon gikan sa tapik nga ginikanan! Kinaandan na nga kon ginadisiplina, ang manak magasiling sing subong sa, “Indi ikaw ang akon amay!” Makahalanusbo gid ini nga mga tinaga para sa may maayo sing tinutuyo nga tiyo ukon manding!
Mahimo bala mapadaku sing madinalag-on ang kabataan sa nagsimpunay nga pamilya? May positibo bala nga papel ang tapik nga mga ginikanan sa pagtukod sing isa ka madinalag-on nga pamilya? Huo ang sabat sa duha ka pamangkot kon ginasunod sang tanan nga nadalahig ang laygay sang inspirado nga Pulong sang Dios, ang Biblia.
[Laragway sa pahina 3]
“Indi ikaw ang akon amay!”