Paano Paluntaron sang Dios ang Paghidait? Kag San-o?
“Kutob sang pagpamanagbanag sang sibilisasyon, ang daku nga institusyon sang Tawo amo ang mga estado . . . Wala pa gid sing isa ka estado nga naglakip sa bug-os nga kaliwatan sang buhi nga katawhan sa bilog nga globo.”
“Madamo pirme sing mga estado . . . kag ang ila pagbanggianay nagpadasig sang mga inaway nga nangin isa sang mga balatian sang sibilisasyon.”
“Ang karon nga kahimusan sang lokal nga soberanong mga estado sa globo wala sing ikasarang sa paghupot sing paghidait.”—Arnold Toynbee, Mankind and Mother Earth.
SA KAPAWA sang mga pulong sa ibabaw, ano ang isa sang daku nga upang sa pagpaluntad sing paghidait? Amo ang pagbahinbahin sang katawhan sa soberanong mga estado. Sa simple pa nga paghambal, amo ang nasyonalismo.
Ang istoryador nga si Arnold Toynbee naglaragway sang nasyonalismo subong amo ang “labing gamhanan kag labing mapintas sa tatlo ka ideolohiya sang Nakatundan sa wala pa ang Cristianong panahon. [Ang iban pa, suno kay Toynbee, amo ang ‘komunismo sang kalibutan’ kag ang ‘kapitalismo sang kalibutan.’] . . . Ang nasyonalismo mga nobenta por siento sang relihion sang mga nobenta por siento sang bug-os nga kaliwatan sang tawo.” Apang ginbahinbahin sang nasyonalismo ang katawhan sa sulod sang linibo na ka tuig. Nian paano madula sang Dios sang paghidait ini nga kalalat-an sa duta?
Sadsaran sang Pagbalhin
Sa hipos nga paagi ang pagbalhin ginahimo na. Ang binhi sang paghidait kag ang panghunahuna nga nagadalahig sa mga pungsod ginasab-ug sa hunahuna sang minilyon ka tawo sa bilog nga kalibutan. Paano ina ginahimo? Paagi sa edukasyonal nga hilikuton sa bug-os nga duta nga ginahimo sang mga Saksi ni Jehova. Napakita sining relihioso nga grupo paagi sa ila rekord nga ini wala nagapasilabot sa politika—bug-os nga wala sing nadampigan sa politikal kag nasyonalistiko nga mga hulusayon. Ining tindog ginpasad sa pagsunod sa mga panudlo ni Cristo, nga ginpasad man sa sadsaran nga kamatuoran nga ang “Dios gugma.”—1 Juan 4:8.
Si Jesus nagsiling: “Paagi sa sini ang tanan makakilala nga kamo mga gintoton-an ko, kon nagahigugmaanay kamo.” Nagsiling man sia: “Padayon nga higugmaa ninyo ang inyo mga kaaway kag mangamuyo para sa mga nagahingabot sa inyo.” (Juan 13:35; Mateo 5:44) Bangod sang mga pulong ni Jesus, paano ang iya matuod nga mga sumulunod makatuon sing inaway? Paano sila makadumot kag makapatay bangod sang arbitraryo nga sadsaran sang nasyonalismo? Sa pagkamatuod, indi nila mahimo ini!
Amo kon ngaa ang mga Saksi ni Jehova nagahuman na sing bug-os kalibutan nga pag-ululutod nga nagahanda sang iya kaugalingon para sa kabuhi sa bag-ong kahimusan diri sa duta sa idalom sang paggahom sang langitnon nga Ginharian sang Dios. Buhi sila nga pamatuod nga posible tudloan liwat ang katawhan agod nga magkabuhi sila sa paghidait upod sa ila mga isigkatawo sang tanan nga rasa kag tribo kag hambal. Sa isa ka kahulugan, nagaporma na sila sing isa ka organisado nga hubon nga nagalakip sang mga tiglawas sang tanan nga katawhan sa bilog nga kalibutan. Bisan sa karon minilyon sang mga Saksi kag sang ila mga kaupod ang ‘nagsalsal sang ila mga espada nga mga punta sang arado kag sang ila mga bangkaw nga mga galab nga inughagbas.’ Indi sila mag-uyat sing mga armas batok sa ila isigkatawo ukon magtuon sing inaway.—Isaias 2:4.
Malapit Na ang Dalagku nga mga Pagbalhin
Sang nagligad nga 2,500 ka tuig ang Biblia nagsiling tuhoy sa mga matabo sa tion sang katapusan: “Ang Dios sang langit magapatindog sing ginharian nga dili gid malaglag. . . . Dugmukon sini kag papason ining tanan [nagapaindisanay nga politikal] nga ginharian, kag ini magapadayon tubtob sa walay katubtuban.” (Daniel 2:44) Amo gid ini ang Ginharian nga gintudlo sa mga Cristiano nga ipangamuyo nila sa Pangamuyo sang Ginuo. Ginabantala sang mga Saksi ni Jehova inang Ginharian nga pangulohan, kag nahibaloan nila nga indi mapaslawan ang Dios sa pagpaluntad sini bangod “indi makabutig ang Dios.”—Hebreo 6:18; Tito 1:2.
Agod mapaluntad sang Dios ang paghidait sa duta, kinahanglan ang isa pa ka daku nga pagbalhin—isa ka pagbalhin sa espirituwal nga paggahom. Si Satanas dapat magtaliwan. Isa ina sang mga rason kon ngaa si Cristo Jesus napatay subong martir, “agod nga paagi sa iya kamatayon malaglag niya ang may gahom sa kamatayon, nga amo, ang Yawa.” (Hebreo 2:14) Nahisuno sa tagna sa Bugna, sa dili madugay si Satanas indi na pahikuton. Wala na sing politikal nga mga manuggahom nga naimpluwensiahan niya sa pagpaguwa sing makiawayon nga propaganda. Ang mahigugmaon sa paghidait nga katawhan makaliso sa Dios sang paghidait para sa paggahom kag kalinong.—Bugna 20:1-3.
Sa isa ka matahom nga palanan-awon, nakita ni Juan ining bag-ong langitnon nga pangulohan nga nagapanghikot ayon sa duta, kag nakabati sia sing tingog gikan sa langit nga nagsiling: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. . . . Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa, kay ang nahaunang mga butang nagtaliwan.”—Bugna 21:1-4.
Ikaw man, makasapo sing paghidait bisan sa karon, kag sing himpit nga paghidait sa palaabuton, paagi sa paghibalo sang mga katuyoan sang Dios para sa katawhan kag sa sining matahom, bisan pa ginaabusohan, nga duta.
[Kapsion sa pahina 12]
Ang binhi sang paghidait kag ang panghunahuna nga nagadalahig sa mga pungsod ginasab-ug sa hunahuna sang minilyon ka tawo sa bilog nga kalibutan