Ngaa Ginatugutan sang Dios ang Pag-antos?

“Ang tawo tumalagsahon bangod may ikasarang ini nga mangin malaut, bangod tumalagsahon sila sa pagkahibalo sang ila ginahimo kag sa paghimo sing hungod nga mga pagpili.”—Arnold Toynbee, istoryador, Mankind and Mother Earth.

KITA tanan nagahimo sing hungod nga mga pagpili. Ginahimo naton ini kada adlaw. Ang kalabanan sang aton mga desisyon may kaangtanan sa diutay nga mga butang sang adlaw-adlaw nga pagkabuhi—kon ano ang kaunon, kon ano ang imnon, kon ano ang ipanapot, kon sa diin makadto. Apang ang iban nga mga desisyon may daku nga mga resulta nga makaapektar sa aton para sa nabilin nga bahin sang aton kabuhi—ukon makapalip-ot gani sang aton kabuhi.

Kon ginarekomendar sang doktor ang operasyon, kinahanglan ang desisyon. Takus bala ini sa katalagman? Daw ano ka eksperiensiado kag masaligan ang manugbusbos? Palawigon bala sini ukon palip-uton ang akon kabuhi? Kinahanglan himuon ang serioso nga desisyon.

Madugay na sa maragtas, ginhimo ang hungod nga mga pagpili nga nag-apektar sa katawhan kutob sadto. Kag yadto nga mga desisyon may direkta nga kaangtanan sa pamangkot, Ngaa ginatugutan sang Dios ang pag-antos?

Ang Tawo—‘Tumalagsahon sa Pagkamalauton’?

Ang rekord sang Biblia tuhoy sa una nga bahin sang maragtas nagapakita nga ang tawo indi ang una nga intelihente nga tinuga nga may hilway nga kabubut-on kag ikasarang sa pagpili. Sa kamatuoran, indi man sia ang una ukon ‘tumalagsahon sa ikasarang nga mangin malaut.’ Ang isa ka mataas nga porma sang kabuhi nagluntad na—“mga tulad sa dios,” espiritu nga mga tinuga, nga ginatawag man mga anghel.—Salmo 8:5.

Ang isa sining “mga tulad sa Dios,” nga minilyon sa kadamuon, nakakita sing kahigayunan nga mangin isa ka dios kag manuggahom para sa una nga lalaki kag babayi, sa baylo ni Jehova nga ila Manunuga. Gingamit ang iya hilway nga kabubut-on, hungod nga nagbinutig sia sa babayi agod hayluhon sia kag, paagi sa iya, ang iya bana sa paglalis sa Dios. Ginpahangop niya nga ang Dios butigon kag manuglimbong. Ginsugiran niya ang babayi nga ang independiente nga panghunahuna kag paghikot indi magadul-ong sa kamatayon, subong sang ginsiling sang Dios, kundi nagsiling sia: “Mangin kaangay kamo sang Dios nga nakakilala sang maayo kag malaut.”—Genesis 3:1-5.

Paagi sa iya ginhimo, ginsugdan sining tulad-dios nga isa ang pagrebelde batok sa paggahom sang Dios—isa ka pagrebelde nga nasaksihan sang minilyon ka anghel. Bangod sini nangin isa ka hulusayon sa bug-os nga uniberso kon sin-o ang may kinamatarong nga mangin soberano. Yadtong nagpamatok nga anghel nangin kaangay sang Dios, nga gikan sa Hebreo ginbadbad nga “Satanas.” Paagi sa pagbutang sa duhaduha sang pagkamaminatud-on sang Dios, si Satanas nangin una man nga manugpasipala, nga gikan sa Griego ginbadbad nga “Yawa.” Ining una nga pagrebelde amo ang nagpabilo sang sunodsunod nga mga hitabo nga nagdul-ong sa mga pag-antos sang tawo. ‘Sa anong paagi?’ mahimo ipamangkot mo.

“Sila ang May Depekto”

Ang una nga lalaki kag babayi may paglaum nga mabuhi sing dayon sa paraiso nga ila, upod sa ila kabataan, sa ulihi pasangkaron sa tanan nga pamusod sang duta. Apang yadto nga paglaum nasandig sa ila katutom sa Dios. Ang paglalis nagpakilala sa laragway sing isa ka bag-ong genetiko nga elemento—ang pagkadihimpit kag kamatayon—nga ginpaliton sa palaabuton nga mga kaliwatan. Ano ang natabo?—Genesis 2:15-17.

Tuman ka simple nga ginpaathag ni apostol Pablo ang kahimtangan, nga nagasiling nga “paagi sa pagkadimasinulundon sang isa ka tawo ang madamo ginpakamakasasala” kag “naghari ang sala sa kamatayon paagi sa sinang isa.” (Roma 5:17-19) Paagi sa pagsikway sa pagkasoberano sang Dios, gindala nanday Adan kag Eva ang katawhan sa pag-antos, balatian, kag kamatayon. Ang ginsiling ni Moises tuhoy sa Israel, masiling man sa katawhan sa kabilogan: “Naghikot sila sing malaglagon sa ila kaugalingon; indi sila mga anak niya, sila ang may depekto. Isa ka kaliwatan nga balingag kag tiko!”—Deuteronomio 32:5.

Subong resulta, ginpili sang mga tawo nga mangin independiente gikan sa Dios kag nagpalayo sa iya paggahom. Apang ano ang ila ginlisoan? Nahibaloan man ukon wala, nagpasakop sila sa pagkasoberano sang “dios sining sistema sang mga butang nga nagbulag sa mga painoino sang mga ditumuluo.” (2 Corinto 4:4) Nangin mga bihag sila sang Yawa, “ang amay sang kabutigan.” (Juan 8:44) Ginhimo nila ini paagi sa pagpili sang hinimo sang tawo nga politikal kag relihioso nga mga pagginahom nga nagdul-ong sa dumot, kapahamakan, kag pag-antos. Indi katingalahan nga ang Biblia nagasiling nga si Satanas nga Yawa “nagapatalang [nagalimbong, Living Bible] sa bug-os napuy-an nga duta.”—Bugna 12:9.

Ngaa Gintugutan ang Pag-antos?

Ngaa wala pagpunggi ni Jehova ang pagrebelde paagi sa paglaglag kay Satanas sadto pa sa Eden? Subong Labing Gamhanan, masarangan gid ini sang Dios. Apang, wala paghangkata ni Satanas ang gahom sang Dios kundi, sa baylo, ang iya paggamit sini. Paagi sa pagpangatarungan batok sa kasugoan sang Dios, ginpahangop ni Satanas nga ang paggahom sang Dios sala kag indi gid para sa kaayohan sang iya mga tinuga. Nagpangatarungan man sia nga kon tilawan ang mga tawo, indi sila magpabilin nga matutom sa Dios. (Job, kapitulo 1 kag 2) Paano maatubang kag mahusay ang hangkat sing makaisa lang?

Ayhan mapaanggid naton ang pagpakig-angot sang Dios sa balingag nga katawhan sa buhaha, ukon palagasto nga anak nga lalaki sa isa sang mga parabola ni Jesus. Si Jesus nagsugilanon tuhoy sa isa ka tawo nga may duha ka anak nga lalaki, kag ginpangayo sang kamanghuran ang iya bahin sa palanublion samtang buhi pa ang iya amay. Luyag niya mangin independiente, maghalin sa balay kag pamatod-an nga mahimo sia mabuhi sa iya kaugalingon. Mahimo kuntani nga pangindian sang amay ang ginapangayo sang anak kag kandadohan sia sa isa ka hulot agod nga indi sia makalakat. May dayon ayhan yadto nga kaayohan? Wala, bangod ang anak mahimo nga nagpabilin batok sa iya kabubut-on. Dugang pa, pagdingot kuntani yadto sa iya sang iya hilway nga kabubut-on. Gani ano ang ginhimo sang amay?

Si Jesus nagpaathag: “Gintunga sang amay ang pagkabutang sa ulot nila. Pagligad sang pila ka adlaw, ang manghod nga anak nagtipon sang tanan nga iya kag nagpanlakatan sa malayo nga duta kag didto gin-usikan niya ang iya pagkabutang sa patuyang nga pagpangabuhi.” Namigado ining Judiyo nga anak amo kon ngaa nagtrabaho sia subong manugbahog sang mga baboy. Bisan pa may kalan-on para sa mga baboy, wala sing kalan-on para sa iya. Si Jesus nagpadayon: “Nian nahaulian sia kag nagsiling, ‘Pila ka mga mamumugon sang akon amay nga may tuman nga kalan-on kag nagabugana, apang nagakapatay ako diri sa gutom!’” Gani, ano ang iya ginhimo? Naghinulsol sia kag namat-od nga magpauli kag nagpakitluoy sa iya amay.—Lucas 15:11-32, The Jerusalem Bible.

Karon, ano ang ginkinahanglan agod yadtong pamatan-on nga lalaki mahaulian? Tion kag eksperiensia. Ang amay wala maghimo sing mabug-at nga aksion kundi ginhatagan niya sing tion ang iya anak nga makita niya ang kabuangan sang iya mga dalanon. Matuod, ang anak nag-antos sa tion sang eksperiensia, apang nahaulian sia bangod sini.

Ang Sulundan nga Ginpasad

Kaangay sa anak sa parabola, ginpili sang aton unang tawhanon nga mga ginikanan ang banas sang pagkaindependiente gikan sa Dios. Sa pagkamatuod, indi katulad sang buhaha nga anak, sanday Adan kag Eva wala na gid magbalik sa ila Amay, kundi bangod sang ila rebelyuso nga dalanon, ang katawhan naulamid sa isa ka hulusayon nga mahusay lamang sa mga mata sang intelihente nga mga tinuga, makita kag dimakita, paagi sa paghatag sing tion. Karon, pagligad sang 6,000 ka tuig sang pagkaindependiente gikan sa Dios kag sa iya paggahom, ano ang napamatod-an? Subong ginsiling ni Jeremias: “O Jehova, nahibaloan ko nga ang dalanon sang dutan-on nga tawo wala sa iya kaugalingon. Wala sa tawo nga nagalakat sa pagmando sang iya mga tikang.” (Jeremias 10:23) Ginpakita sang maragtas sang tawo nga “ang tawo naggahom sa tawo sa iya kasamaran.” Kaangay sang buhaha nga anak, madamo nga nakatuon sini ang nagaliso sa ila langitnon nga Amay agod magpatuytoy, sa amo nagapamatuod nga si Satanas butigon sa iya pangangkon nga mapatalikod niya ang tanan gikan sa pag-alagad sa Dios.—Manugwali 8:9.

Sa dili madugay si Jehova magahikot batok sa dimahinulsulon nga si Satanas kag sa mga nagasakdag sang iya independiente nga dalanon, sa amo tapuson ang pagrebelde kag ang tanan nga resulta sini. Tuman na nga tion ang nag-agi agod mapamatod-an ang sulundan para sa tanan nga dag-on sa palaabuton. Bangod sining sulundan indi na gid liwat mangin kinahanglanon nga tugutan pa ni Jehova ang bisan anong pagrebelde sa palaabuton, sa kitaon nga duog ukon sa dimakita nga duog. Ginpakita sang tion kag eksperiensia nga si Satanas ukon ang tawo, nga napain sa Dios, indi makagahom sa makatarunganon nga paagi.—Bugna 16:14-16; 20:1-3.

Matuod, ang katawhan sa karon dapat anay magbatas sing daku nga pag-antos kag sa masami sing hilaw nga kamatayon. Apang nanaad man si Jehova nga tumbasan niya ini. Paano? Suno sa ginsiling ni apostol Pablo: “May paglaum ako sa Dios . . . nga may pagkabanhaw sang mga matarong kag mga dimatarong.” (Binuhatan 24:15) Ang pagkabanhaw sang patay padulong sa isa ka kahigayunan sang himpit nga kabuhi sa duta mangin isa ka daku gid nga buhat sang kaluoy. Nian ang kada isa makapakita sing apresasyon sa dulot nga matuod nga kabuhi.

Sa idalom sang kahimusan sang “bag-ong mga langit kag bag-ong duta,” ang nagtaliwan nga mga pag-antos amat-amat nga malipatan, bangod buslan ini sang mga pagpakamaayo sang isa ka mabungahon, makalilipay, kag walay katapusan nga kabuhi. Subong ginasiling sang Biblia: “Ang una nga mga butang indi na pagdumdumon, ukon mag-abot sa tagipusuon.” (Isaias 65:17; 2 Pedro 3:13; Bugna 21:1-4) Apang paano naton mapat-od nga posible ini? Ano nga mga pagbalhin ang magahimo sa walay katapusan nga paghidait nga isa ka katunayan?

[Kapsion sa pahina 9]

Ang tawo indi ang unang intelihente nga tinuga sang Dios nga may hilway nga kabubut-on kag ikasarang sa pagpili

[Kapsion sa pahina 9]

Ang paglalis nagpakilala sing bag-ong elemento sa laragway

[Laragway sa pahina 10]

Subong nga bangod sang tion kag eksperiensia nakilala sang buhaha nga anak ang iya pagsandig sa iya amay, sa karon man madamo ang nagakilala nga kinahanglan nila ang Dios