Nagabalik ang Astrolohiya!

Ang hinigugma sang Kamahalan napatay. Ginpatawag sang ginsubuan nga hari ang iya astrologo nga nagpakot sini nga trahedya. May tuyo sa pagpatay, ang hari nagsiling: “Nagapakunokuno ikaw nga maalam kag may tinon-an. Sugiri ako, ano ang imo kapalaran?”

“Ginuo,” sabat niya, “Nakita ko nga mapatay ako pagligad sang tatlo ka adlaw sa atubangan sang Kamahalan.” Ang maabtik nga paghunahuna nagluwas sang kabuhi sining astrologo!

MATUOD man ukon indi ini nga sugilanon, ginailustrar sini ang kamatuoran nga sang una nga mga siglo ang mga astrologo ginapatihan, bisan sang nagagahom nga mga monarka. Tuhoy kay ­Louis XI sang Pransya, ang isa ka istoryador nagsulat: “Madamo nga astrologo . . . ang naghimulos sa iya kahadlok—kag kuwarta.” Sang ika-15 kag ika-16 nga siglo, ang pagkapopular sang astrolohiya nakadangat sa iya putukputukan sa Europa. Bisan gani ang kilala nga mga sientipiko nagpati sa sini.

Apang, ang nagasanag nga bituon sang astrolohiya nagsugod sa pagdulom. “Paagi sa isa lamang ka paglili sa teleskopyo,” baton sang libro nga Astrology—The Celestial Mirror, “ang bug-os nga kosmolohiya nawasak. . . . Ang astrolohiya ginsikway sang awtoridad sang sientipiko nga rason.” Gindumili ini sang mga unibersidad sa Europa. Kag pagbulos sang ika-20 nga siglo, ginlaragway sang istoryador nga si ­Bouché-Leclercq ang astrolohiya sang Nakatundan subong “patay.”

Sang nagligad nga 30 ka tuig, ginpahayag sang pagsurbe sang Gal­lup sa Inglaterra nga 6 porsiento lamang sang ginsurbe ang nagpati sa astroloniya. Karon 80 porsiento ang nagapati suno sa report! Kag ang mga magasin, mga programa sa TV, kag mga pamantalaan nagareport nga nagabaskog ang interes sang publiko sa astrolohiya sa iban nga mga pungsod. “Ang una nga ginabasa ko sa pamantalaan,” siling sang isa ka tawo nga taga-Bagatnan Aprika sa koresponsal sang Magmata!, “amo ang mga bituon.”

Ngaa nagbalik ini liwat? Sang ginpamangkot kon ngaa sia kag ang iban pa nagakonsulta sa mga astrolohiya, ang isa ka taga-Italya nga babayi nagsabat: “Madamo gid nga butang sa sining kalibutan ang nagalain.” Huo, nagakabuhi kita sa “ital-ital nga mga tion nga mabudlay pakigbagayan.” (2 Timoteo 3:1) Kag nagapati ang iban nga mga tawo nga ang astrolohiya nagahatag sa ila sing ginakinahanglan nga tuytoy. Gani ang bituon sang astrolohiya nagsanag liwat. Nagdagsa ang mga libro tuhoy sini. Ang ekspresyon nga “Ano ang imo sign?” nangin popular nga topiko sang paghambalanay. Ang iban nga mga indibiduwal nagapangindi gani sa pag-date kon indi magsaho ang ila mga “sign.”a

Apang, walay sapayan sang pagkapopular sini, ang mga pakot sang astrolohiya napasad gihapon sa maduhaduhaan nga sadsaran: nga ang posisyon sang adlaw, bulan, kag sang mga planeta sa tion sang pagkatawo sang isa nagapahayag sang iya personalidad kag palaabuton. Walay sapayan, ang propesyonal nga mga astrologo wala nagapangalag-ag sa pagsulat sing mga hor­o­scope halin sa pila lamang ka linya tubtob sa madamo nga pahina—depende sa kon pila ang ibayad sang isa. Suno sa magasin nga Psychology Today, “minilyonmilyon ka dolyares ang ginagasto sa hor­o­scope.” Sa pagkamatuod, ang Amerikano nga sientipiko nga si John Wheel­er nagtuaw kasan-o lang nga ang iya pungsod “nakasarang sa 20,000 ka astrologo kag 2000 lamang ka astronomo.”

Mabaskog gid ang pagbalik sang astrolohiya sa Nakatundan nga mga pungsod sa bagay nga ang Swiso nga saykayatris nga si anhing Carl Jung nagsulat: “Nagapanuktok ini sa mga ganhaan sang mga unibersidad nga kon diin ginsikway ini anay sang nagligad nga 300 ka tuig.” Sa kamatuoran, ang pila ka unibersidad sa Nakatundan nagatanyag karon sing mga kurso sa astrolohiya. ‘Matuod bala ang astrolohiya?’ mahimo ipamangkot sang isa ka tawo.

[Footnotes]