Ginabutang sa Lugar ang “Baseball”

ANG hampang may daku gid nga bahin sa kabuhi sang amon pamilya sang nagadaku ako sa Or­e­gon. Ang base­ball, foot­ball, ­track, kag ang wrest­ling amo ang pila sang mga hampang nga akon anay ginaentrahan sang nagaeskwela pa ako.

Sang tin-edyer ako, nangin interesado gid ako sa base­ball sang ang akon amay nangin ­coach sa base­ball. Samtang nagadaku kami nga duha sang akon utod, ginapaupod kami sang akon amay agod magtan-aw sing mga hampang sa mataas nga liga sang base­ball. Nakabulig ini sa pagpatubo sang akon daku nga interes sa sina nga hampang.

Nagtubo ang Interes nga Mangin “Umpire”

Nian, sang 15 anyos pa lang ako, nag-utwas ang isa ka kahigayunan nga nagsugod sang akon pag-uswag sa isa ka karera nga pagdumdom ko amo pirme ang mauna sa akon kabuhi. Bangod sang akon interes sa base­ball kag sang akon nahibal-an sa sini, ginpangabay ako nga mag-um­pire sa base­ball nga mga hampang sa ulot sang team sang pamatan-on nga mga humalampang. Gintanyagan ako sing bayad. Bisan pa nalipay ako sa pag-um­pire, nangindi ako sang primero sa pagbaton sing bayad bangod madula sini ang akon tindog subong ama­teur sa hampang. Kon amo, indi na ako makapakig-indis sa mga hampang sa eskwelahan.

Apang, sang ulihi, narealisar ko nga amo gid ini ang luyag ko himuon sa akon kabuhi, gani nagsugod ako sa pag-um­pire sa base­ball nga mga hampang sa semi-propesyonal nga nibel, nga nagabaton sing bayad. Naga-um­pire ako sa tubtob sa 15 ka hampang kada semana kon tig-ilinit, sugod sa aga pa kon talipuspusan sang semana kag nagatrabaho sa 3 ukon 4 ka hampang kada adlaw, pati pa ang doble nga mga hampang sa ordinaryo nga mga adlaw sang semana.

Bangod sang akon gugma sa hampang, narealisar ko nga mahimo ako mangin propesyonal sa isa ka karera sa hampang subong um­pire sa base­ball. Sanglit amo gid ina ang luyag ko himuon subong trabaho sa akon kabuhi, nag-untat ako sa pag-eskwela sa kolehiyo pagligad sang tatlo ka tuig nga pagtuon kag nagpalista sa eskwelahan sang Flor­i­da para sa pag-um­pire sa dalagku nga mga liga.

Sang maggradwar ako sa eskwelahan sang 1957, 21 anyos lamang ako. Sadto nga tion isa ako sang pinakabata nga nagsugod sa pag-um­pire sa propesyonal nga mga humalampang, apang sa karon indi na ini lamharon. Nian ginbaton ko ang kontrata sa Geor­gia-Flor­i­da Base­ball ­League kag sa amo nagsugod ang akon karera sa pag-um­pire sa base­ball sang propesyonal nga mga humalampang.

Isa Pa ka Kinahanglanon nga Binagbinagon

Yadtong una nga tuig isa gid ka makatudlo nga eksperiensia, kag nawili gid ako sa akon trabaho. Apang, samtang nagaligad ang tion amat-amat man nga nahangpan ko nga ang kabuhi indi lamang ang pagtrabaho, bisan pa naluyagan ko gid ini. Dapat nga may espirituwal man nga bahin ang kabuhi, sa pamatyag ko.

Nagdumdom ako nga ang paagi sa pag-atipan sang akon espirituwal nga kinahanglanon amo lamang ang pagtambong sa relihioso nga serbisyo kon Domingo kon itugot ini sang akon iskedyul sa base­ball. Wala kaso sa akon kon diin ako masimba, apang masiling ko nga ang iban nga mga tawo sa mga simbahan nga akon gintambongan nagpabatyag sa akon nga wala ginaabiabi bangod taga-Aminhan ako.

Pagkatapos sang una nga hut-ong sang tion sang hampang, nagpauli ako sa Or­e­gon agod hulaton ang masunod. Didto ko nasugata ang mga Saksi ni Jehova kag nagtuon ako sing Biblia upod sa ila. Sa dugang nga pagtuon ko, dugang pa nga naganyat ako sang mga kamatuoran sang Biblia, labi na ang saad sini tuhoy sa bag-ong sistema sang pagkamatarong nga sa dili madugay magabulos sa sining nagakalusod, indi makaalayaw nga daan nga kalibutan.

Gin-apresyar ko ang aton ginaton-an, bisan pa narealisar ko nga dapat pa ako magtuon sing dugang pa. Apang, ginpaambit ko sa akon mga masigkapasahero ang akon nahibaloan nahanungod sa paglaum sang Biblia para sa palaabuton sang magbiyahe ako sa Bagatnan agod mag-eskwela sa isa pa ka eskwelahan sang pag-um­pire subong instruktor. Natabo ina sa Bagatnan nga Car­o­li­na sang Enero 1958.

Sang ulihi, sa tion sang paghanas sang tig-ilinit sa Geor­gia, naghimo ako sing kahimusan nga magpabawtismo. Anum ka bulan ina sa tapos ko makita ang mga Saksi. Kag sa katapusan sang akon paghanas sang tig-ilinit, ginbawtismohan ako sa isa ka asambleya sang mga Saksi ni Jehova sa Flor­i­da. Ginsimbulohan sadto ang akon dedikasyon sa paghimo sang kabubut-on sang Dios kutob sadto.

Sa tion sang hampang sang base­ball sang 1958, ang akon pag-um­pire nagkahulugan nga magabiyahe ako sa lainlain nga siudad. Sa masunson nga mahimo, ginakontak ko ang mga Saksi ni Jehova sa siudad nga makadtoan ko kag, kon may tion, nagatambong ako sa mga miting sa lokal nga King­dom Hall. Naghimo man ako sing kahimusan nga magguwa sa pagbantala upod sa iban nga mga Saksi.

Ang Problema nga Dapat Ko Lubaron

Apang, samtang nagaligad ang mga binulan, nakita ko ang problema nga dapat lubaron. Nahibaloan ko nga ang pagtipon upod sa mga Cristiano indi lamang isa ka butang nga matahom himuon. Ang Pulong sang Dios nagasugo sa Hebreo 10:24, 25: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon, subong sang kinabatasan sang iban, kundi nagapalig-onay ang isa kag isa, kag labi pa gid sa ginatan-aw ninyo nga nagapalapit ang adlaw.”

Huo, nagapalapit ang adlaw sang paghukom sang Dios batok sa sining malaut nga kalibutan. Sa amo, ang sugo nga ‘indi pagbiyaan ang pagtilipon’ upod sa mga masigka-Cristiano hilingagawon. Apang paano ko mahimo ina kon ang mga miting masami nga nagadungan sa tion sang pag-um­pire ko sa base­ball? Ini nga pagpakig-away sa akon konsiensia nagpadayon sa bug-os nga hut-ong sang tion sang hampang.

Sang matapos ini, nagpauli ako liwat. Karon nahimo ko ang tanan nga Cristianong mga hilikuon nga nahibaloan ko dapat ko himuon. Subong man, ginpahibalo ko ang akon mga ginikanan nga isa na ako karon sang mga Saksi ni Jehova. Wala sila malipay sa sina, apang ginbaton nila ini sang ulihi. Narealisar nila nga nangin importante gid ini sa akon kabuhi, huo, mas importante sa base­ball.

Sang masunod nga tuig, ang 1959 nga hut-ong sang tion sang hampang, nagsaylo ako sa mataas nga liga, ang North­west Base­ball ­League. Ginhimus ko ang akon iskedyul agod makatambong sa kapin nga mga miting kag makapakigbahin sing kapin sa pagbantala. Gindala ako sang akon trabaho sa nanuhaytuhay nga siudad sang liga sa kada pila ka adlaw, kag kon mag-abot ako, ginahimus ko nga mag-upod sa pagbantala upod sa lokal nga kongregasyon sang mga Saksi ni Jehova. Sa sining paagi, nakaupod ko ang madamo sang tigulang kag hamtong nga mga Cristiano. Nakatuon ako sing daku gikan sa ila, kag napalig-on gid nila ako sing daku.

Sa gihapon, indi ako makakonsentrar sa espirituwal nga bahin sang akon kabuhi. Ang akon pirme nga pagbiyahe sa base­ball nga mga hampang magaupang sa akon Cristianong mga hilikuton, kag amo gid ang natabo. Gani nahibaloan ko nga tubtob nagabiyahe ako, mabudlayan gid ako nga mangin permanente sa isa ka kongregasyon kag makaamot sing kapin sa pagbantala nga hilikuton.

Paghandum sa Paghimo sing Kapin Pa

Pagkatapos sang 1959 nga hut-ong sang tion sang hampang, namat-od ako nga dugangan pa ang akon Cristianong ministeryo, kag sa sulod sang duha ka bulan nagpakigbahin ako sa sini sing bug-os tion. Subong pamatan-on pa kag soltero, ginbinagbinag ko ang posibilidad nga mag-aplay sa pag-alagad sa pangkalibutan nga ulong-talatapan sang mga Saksi ni Jehova sa Nueva York. Sang ginhambalan ko ini upod sa isa ka eksperiensiado nga Saksi, napalig-on ako sa pag-aplay.

Sa amo, sang Disiembre namat-od ako nga ihatag ang akon aplikasyon para sa bug-os tion nga pag-alagad sa Bethel, subong amo ang pagtawag sa pangkalibutan nga ulong-talatapan sa Nueva York. Apang sadto gid nga tion, nakabaton ako sing bag-o nga kontrata sa base­ball! Ang presidente sang liga nanaad nga padelantuhon ako sa mataas pa nga liga, ang Pa­cif­ic ­Coast ­League, kon magpabilin ako sa base­ball sing isa pa ka tuig. Amo ini ang madugay ko na nga handum kutob sang una ako nga magsugod sa pag-um­pire sa mga hampang.

Ano ang himuon ko? Wala sing duhaduha sa akon hunahuna. Ginpasalamatan ko ang presidente sang liga apang naghalin ako sa propesyonal nga base­ball. May kapin pa sa kabuhi sang sa mga hampang. Makahalanguyos karon ang tion sa maragtas sang kalibutan, kag may mas importante pa nga himuon sa akon kabuhi. Sa amo, sang maaga nga bahin sang 1960, ang akon aplikasyon nga magtrabaho sa ulong-talatapan sang mga Saksi ni Jehova ginbaton, kag nagkadto ako didto agod sugdan ang akon bag-o nga pagkabuhi.

Bisan pa nalipay ako nga mangin bahin sang base­ball, ginabaton ko nga may yari ini malain nga mga bahin. Halimbawa, may mga tion nga ini nagainit, subong sang kon ang mga humalampang kag mga manedyer—kag ang mga humalangad—indi mag-ugyon sa akon mga desisyon. Ginaprangka nila ako sa sini! Subong man, indi lamang makaisa nga ginpabulong ako bangod sang mga natabo sa hampang. Wala ko gid ginakamingawan ina nga mga bahin sang hampang.

Wala Nagahinulsol

Naghinulsol bala ako nga ginbaylo ko ang akon karera sa pag-um­pire sa Cristianong ministeryo? Wala gid. Sa kamatuoran, ang butang nga natabo sang 1963 nagpabaskog pa sang akon desisyon. Sa pagkamatuod, sa Siudad sang Nueva York, yara ang bantog nga Yan­kee Sta­di­um, nga sa diin ang team sa base­ball sang New York Yan­kee nagahampang. Samtang naga-um­pire, handum ko gid anay nga makaentra sa dalagku nga mga liga kag mag-um­pire sa isa ka hampang sa sadto nga istadyum!

Sa pagkamatuod, sang tig-ilinit sang 1963, nagkadto ako sa Yan­kee Sta­di­um—apang indi agod mag-um­pire sa base­ball nga hampang! Kundi, sa baylo, amo ang pagtambong sa isa ka daku internasyonal nga kombension sang mga Saksi ni Jehova nga ginhiwat didto. Nakunyag gid ako nga kaupod ko sa istadyum ang tignapulo ka libo nga mga alagad sang Dios. Sa kamatuoran, may bahin ako sa programa, kag ang plataporma nga akon gintindogan indi malayo sa katapusan nga inangan sang base­ball! Nagsiling ako sa akon kaugalingon: ‘Daw ano kaayo gid nga mangin diri sa latagon nga halampangan sang Yan­kee Sta­di­um sa sining paagi sang sa mag-um­pire sa hampang!’ Ginabaton ko nga isa yadto ka makaalayaw gid nga okasyon para sa akon.

Sang sa Bethel ako, nakilala ko ang akon asawa, nga si Jo­anne. Katapo sia sang isa ka lokal nga kongregasyon sang mga Saksi ni Jehova sa Nueva York, nga sa diin nagapakigbahin sia sa bug-os tion nga ministeryo. Sa amo, sang 1964, pagligad sang apat ka tuig nga pag-alagad sa Bethel, naghalin ako agod magpakasal. Sa sulod sang pila ka tuig, nagpabilin kami sa bug-os tion nga ministeryo. Sa tion sining makawiwili nga mga tinuig, nakatigayon kami sing pribilehiyo nga mabuligan ang mga kongregasyon sa Ver­mont subong man sa Wy­o­ming. Kag daw ano ka makapalig-on nga makakita sing asawa nga pareho sa imo sing mga interes.

Apang, sang 1969 nagbalik kami sa Or­e­gon agod atipanon ang akon amay nga may malala nga balatian. Kag sang masunod nga tuig, nabun-ag ang amon anak nga babayi nga si Elise. Bisan pa dapat ako karon maghimo sing dugang pa nga sekular nga trabaho agod sakdagon ang akon pamilya, nagpadayon kami sa pag-alagad sa amon Manunuga sing regular sa ministeryo kag ginahanas man namon ang amon anak nga babayi sa pagtahod sang iya mga sugo kag mga katuyoan. Subong man, sa tion kag tion nakatigayon ako sing kahigayunan nga mag-alagad sa nanuhaytuhay nga mga kapasidad sa kongregasyon.

Sang 1984 nakatigayon pa gani ako sing pribilehiyo nga magbalik sa Bethel sa Nueva York sing duha ka semana. Isa ako sadto sa madamo nga mga boluntaryo, sa masami mga may pamilya nga mga lalaki nga may trabaho, nga nagkari sing temporaryo agod magbulig sa daku nga proyekto sang konstruksion bilang pag-uswag didto. Ang akon asawa malipayon nga nagkooperar kag ginbaton ang aton paglakat. Isa gid ka pribilehiyo nga makapakigbahin sa pagtrabaho sa nagasangkad nga pabrika, opisina, kag mga ilistaran sa Bethel. Ang daku nga mga tinukod nga may kapin sa 2,500 ka boluntaryo ginagamit sa pagsakdag sa mga hilikuton sang mga Saksi ni Jehova sa bilog nga kalibutan kag sa pagdumala sang daku nga pag-uswag nga nagakatabo karon sa tunga nila. Yadtong duha ka semana naglipay gid sa akon sing daku.

Wala, wala gid ako maghinulsol sa pagbiya sang akon karera sa base­ball—bisan sa isa lang ka minuto! Bisan pa nakunyag gihapon ako sa base­ball, ginabutang ko ini sa lugar. Labi pa ako nga nakombinse nga husto nga desisyon ang akon nahimo kag may kapin pa sa kabuhi sang sa mga hampang lamang. Kag amo ini: ang pag-alagad sa akon Manunuga karon, upod ang paglaum nga alagdon sia sing dayon sa iya bag-ong sistema sang pagkamatarong nga malapit na.—Gin-asoy ni Richard DeChaine.

[Laragway sa pahina 16]

Indi tanan nga humalampang nag-ugyon sa akon mga desisyon sa pag-umpire!

[Laragway sa pahina 17]

Nagatuon sa Biblia upod sa akon asawa nga si Joanne kag anak nga babayi nga si Elise