Aborsion—Ang Ihibalo Nagadala sing Salabton
NAGAHAMBAL ka bala pirme kon nahibaluan mo nga husto ang isa ka butang? Maayo ini himuon, labi na kon yara sa peligro ang kaayuhan sang iban. Sa tapos mabasa ang isa ka artikulo tuhoy sa aborsion sa isa ka nagligad nga guwa sining magasin, ang isa ka iloy sa Inglaterra nagsulat sang masunod:
“Bag-o ko lang mabasa ang ‘Letter From the Mother of an Unborn Child’ sa Hulyo 22 [1986] nga guwa sang Awake! kag natandog gid ang akon tagipusuon.
“Wala pa gid ako makaeksperiensia sing aborsion, apang sang nagamabdos ako sing apat ka bulan sa akon panganay, ang akon bayaw nga babayi nagamabdos sing duha ka bulan sa iya ikatlo nga bata. Bag-o lang niya mapaeskwela ang iya duha ka magamay nga kabataan nga babayi kag nakakita sia sing mataas sing suweldo nga trabaho. May mga butang sia nga naluyagan: mga kasangkapan, video, bag-o nga awto, mga tanum para sa hardin. Apang ang bata sablag sa pagtigayon sang trabaho kag sa amo sa kitaon nga kuwarta agod ibakal sining tanan nga butang. Gani namat-od sia nga magpaaborsion.
“Samtang nagahilapit ang adlaw sa pagpaaborsion, nakabatyag sia sing kakunyag. Apang dugang nga naglain ang akon pamatyag sa pagpanumdom sini. Sa sini nga tion nabatyagan ko na ang pagsipa sang akon bata sa sulod sang akon tiyan, kag ginahunahuna ko ang bata sa sulod sang tiyan sang akon bayaw nga babayi nga nagadaku man.
“Nag-abot ang gab-i nga himuon ang aborsion, kag naglaum ako nga kabay nga magbag-o ang hunahuna sang akon bayaw. Ginapanan-aw ko ang iya bata, nga nagakupo kag mapagros sa sulod sang iya tiyan nga nagapamati sa mahinay kag makaparelaks nga pitik sang tagipusuon sang iya iloy. Nian gin-ngidlisan ako sa paghunahuna sa sadtong gamay nga bata nga ginkakas sa iya malig-on nga diutay nga kalibutan kag ginalaglag. Nagahibi ako sa paghunahuna sini. Natabo ang aborsion. Indi gid makilala sang akon diutay nga anak nga babayi ang iya pakaisa nga kuntani kaupod niya sa pagdaku, bangod halos magkatubotubo sila.
“Ano ang natabo sa akon bayaw? Nadula niya ang iya trabaho apang nakakita sia sing lain, kag madamo nga trabaho ang iya naagihan sugod sadto. Nakabakal sia sing video, bag-o nga awto, mga tanum, bag-o nga mga panapton, kbp., apang nag-agi sia sa hugna sang kapung-aw kag ginbiyaan niya ang iya bana kag kabataan, kag dayon nagpauli pagligad sang pila ka adlaw. Apang indi sia malipayon. Kon nagaduaw sia sa akon, ang iya duha ka magamay nga bata nga babayi nagapakighambal sa akon anak nga babayi kag sa akon anak nga lalaki nga 11 ka bulan, kag nagasiling sila tuhoy sa akon anak nga babayi: ‘Katahom sa iya Mummy, indi bala? Kuntani may yara man kami gamay nga utod nga babayi ukon lalaki.’ Ginapasiplatan ko sia kon ano ang iya hitsura kon mabatian ko ining mga pulong. Daw luyag ko sia lipayon bangod sa tion sang iya pagpaaborsion wala niya marealisar ang iya ginhimo. Apang ginpili sang akon bayaw ang kuwarta sa baylo sang iya bata, kag sa pamatyag ko amo ini ang rason nga naghinulsol sia karon.
“Apang, nagdul-ong ini sa akon pagpamangkot sa akon kaugalingon sing serioso gid nga pamangkot. Ginakabig ko ang akon kaugalingon subong isa sang mga Saksi ni Jehova, bisan pa wala pa ako mabawtismuhi. Apang makita ko nga malayo pa ang akon lalakton, kay ang matuod nga mga Saksi kaangay ni Jesus, nga nagapakita sing gugma kag kaluoy sa tanan, walay sapayan kon man anay ang iban ukon kon ano ang ila nahimo. Ginakalangkagan ko ang adlaw nga ako makasiling gid nga nagabatyag ako kaangay nila ayon sa iban kag may pagpabugal nga nagadala sang ngalan ni Jehova. Siguro kon wala ako magpabuyanbuyan sing tuman kadugay, kuntani nakatigayon ako sing kaisog sa pagpanaksi sa akon bayaw, kag mahimo nga naluwas ang bata.”
Sinsero nga ginalauman sang mga manugbalhag sang Magmata! nga ining serye sang mga artikulo makapangalagad sa amo gid sina nga katuyuan.