Aborsion—Kag “ang Tuburan sang Kabuhi”

SA KARON, bangod sang modernong teknolohiya, madali nga mahibaluan sang mga doktor ang sekso sang kiring. Apang sin-o ang makahibalo sang panimuot sini? Sin-o ang makahibalo sang palaabuton sini subong isa ka buhi kag tawhanon nga kalag? (Genesis 2:7) Amo lamang si Jehova nga Dios, kay sia “ang tuburan sang kabuhi.” (Salmo 36:9) Binagbinaga ang masunod Makasulatanhon nga mga halimbawa.

Ang kasuguan sang pagpanubli sang mga patriarka nagapatuhoy sa pagpanguna sang panganay. Apang, sang ginamabdos ni Rebeka nga asawa ni Isaac ang kapid, ang Dios nagsiling sa iya: “Ang magulang magaalagad sa manghod.” Ang kabuhi sang ila duha ka anak nga lalaki, sanday Jacob kag Esau, nagpamatuod sa paghangop ni Jehova sa ila mga personalidad sing abanse sa wala pa sila ginbun-ag.—Genesis 25:22, 23.

Mga siglo sang ulihi, ginsilingan sang isa ka anghel si Zacarias nga saserdote nga ang iya asawa, nga si Elisabet, magaanak sing lalaki kag tawgon ang iya ngalan nga Juan. Ining anak nga lalaki, nga sang ulihi gintawag nga Juan Bautista, makatigayon sing pribilehiyo nga maghanda sang dalan para kay Jesus, ang Mesias. Ang mapainubuson nga hunahuna amo gid ang kinahanglanon para sa sini nga komisyon, nga nahibaluan gid sang Dios.—Lucas 1:8-17.

Ang Tawhanon nga Kiring—Daw Ano ka Hamili?

Si Hari David nagkilala: “Ginputos mo [Jehova] ako sa tiyan sang akon iloy. . . . Ang imo mga mata nakakita sang akon wala mahuman nga kinaugali, kag sa imo tolon-an nasulat na sila tanan.” Kag matuod gid ini sa aton tanan.—Salmo 139:13-16.

Ang tagsa ka pagmabdos sang tawo hamili sa “tuburan sang kabuhi,” si Jehova nga Dios. Kon daw ano gid ka hamili, maathag nga ginapakita sang Mosaiko nga Kasuguan sa Exodo 21:22, 23: “Kon ang mga tawo mag-inaway kag magsamad sang babayi nga nagadala . . . . kag mahulugan sia, nian magabayad ka sing kalag sa kalag.”

Ginapalutaw sang iban nga badbad sang Biblia nga sa sining kasuguan ang importante nga butang amo ang natabo sa iloy, indi sa kiring. Apang, ang orihinal nga Hebreong teksto nagapatuhoy sa makamamatay nga aksidente sa iloy ukon sa bata.

Ang Panghunahuna sang Unang mga Cristiano

Sa tapos mapatay ang mga apostoles ni Jesucristo sang unang siglo, madamo nga tawo ang nagpaathag sang ila mga panudlo. Ining mga manunulat indi inspirado, indi subong sang mga manunulat sang Biblia nga gin-inspirar, apang interesado kita sa ila mga komento kay ginapakita sini ang relihioso nga panghunahuna sang ila tion sa sining importante nga hulusayon. Yari ang pila ka binalikwat.

The Letter of Barnabas, kapitulo 19:5 (c.100-132 C.E.)

“Dili pagpatya ang bata paagi sa aborsion; ukon, sa liwat, dili ina pagpatya sa tapos ini matawo.”

The Didache, ukon The Teaching of the Twelve Apostles (c.150 C.E.)

“Amo ini ang Dalan sang Kabuhi: . . . Dili mo pagpatyon ang bata sa tiyan ukon ang bag-o matawo nga bata.”

Tertullian: Apology, kapitulo 9:8 (c. 197 C.E.)

“Apang ginadumilian sa aton ang pagpatay. Wala kita ginatugutan sa paglaglag sa kiring sa tiyan, tubtob may dugo nga ginagamit sa pagporma sa tawo. Isa ka plano nga pagpatay ang pagpugong sa pagkatawo sang bata. Wala sing kinaliwan kon bala laglagon sang isa ang kabuhi nga natawo na ukon upangan ang pagkatawo sini. Ang isa nga mangin tawo isa ka tawo.”

Basil: Letter to Amphilochius (347 C.E.)

“Sia nga hungod nga naglaglag sa alibudbod magabayad sing silot nga kamatayon. Kag indi naton pagbatunon ang bisan diutay lamang nga diperensya sa kon bala ang kiring naporma na ukon wala pa.”

Ang Cristianong Pagtamod

Ang aborsion ukon pagkahulog mahimo nga matabo bangod sang tawhanon nga pagkadihimpit ukon aksidente. Apang, lain nga butang ang hungod nga aborsion, agod lamang malikawan ang pagkatawo sang wala mahamut-an nga anak. Suno sa Kasulatan, subong nakita na naton, isa ini ka hungod nga pagpatay sang tawhanon nga kabuhi.

Sin-o “ang Isa nga nagahumlad sang duta kag sang patubas sini, ang Isa nga nagahatag sing ginhawa sa katawhan sa ibabaw sini, kag espiritu sa mga nagalakat sa sini”? Indi ang tawo kundi ang Tuburan sang tanan nga kabuhi, si Jehova nga Dios. (Isaias 42:5) Ang aton hinatag sang Dios nga ikasarang sa pagpaliton sing kabuhi sa aton mga anak isa ka hamili nga pribilehiyo nga subong sang sa tanan nga butang, “ang tagsatagsa magahatag sing husay sang iya kaugalingon sa Dios.”—Roma 14:12.

[Kahon sa pahina 14]

Isa ka Malipayon nga Pagpanamkon

Sang 1973, ang The Watchtower, ang kaupod nga magasin sang Awake!, nagbalhag sing malip-ot nga artikulo nga nagapaathag sang pagtamod sang Biblia sa aborsion. Nabasa ini sang duha ka pamatan-on nga estudyante. Ang babayi nagamabdos, kag sia kag ang amay nagsugtanay nga ipaaborsion ini. Apang ang artikulo nagpahunahuna sa ila. Subong resulta, namat-od sila nga ipanganak ang ila bata.

Kasan-o lang, nasumalang liwat sang mga Saksi ni Jehova ini nga tawo, kag sia nagsiling: “May daku ako nga pagtahod sa inyo literatura sa Biblia. Bangod sadtong makapahunahuna nga artikulo, ang akon asawa kag ako may bugal karon nga mga ginikanan sang isa ka matahom nga 13-anyos nga anak nga babayi!”

Ginpadyaan gid ang ila paghimo sang Makasulatanhon nga dalanon.

[Ginkuhaan sang Laragway sa pahina 15]

H. Armstrong Roberts