Ang Golden Gate Bridge—50 ka Tuig

PAGDUMDOM sang iban naglinog! Apang indi, epekto yadto sang hangin pati sang bug-at kag hulag sang ginabanta nga 250,000 ka tawo nga nagdugok sa Golden Gate ­Bridge sang San Francisco para sa ika-50 nga anibersaryo sini sang Mayo 24, 1987. May 500,000 pa nga nagginutok sa salamputan sang taytay. Ang mga enhinyero padalidali nga nagkalkular nga masupurtahan sang taytay ang kabug-aton.

Sa kasangkaron nga 1,280 metros sang pinakadaku nga bahin sini, ang Golden Gate amo ang pinakamalaba nga taytay sang mahuman ini sang 1937. Ang pinakamataas nga mga barko sa kalibutan makalabay sa idalom sang nabayaw nga high­way nga nagaarko sing 19 ka panalgan sa ibabaw sang tubig.

Ang kabilugan sang alambre nga nagahuman sa duha ka kable nga ginakabitan sang taytay, 129,000 kilometros. Ang tagsatagsa 90 sentimetros sa diametro kag 2,330 metros sa kalabaon, kag ginabanta nga ang pinakamabaskog nga ten­sile ­strength sini 91 milyones kilogramos.

Bangod sang ekselente nga desinyo kag sang padayon nga pagmentinar sa sini, ginabanta nga ang taytay magadugay sing 200 ka tuig.