Paglandas sa Pag-ihig-ihig sa Rasa
ANG taga-Bagatnan Aprika nga si Isaac Langa ginpadaku sa banwa sang mga itom sa Alexandra, Johannesburg. Bangod sang mabaskog nga espiritu sa rasa, ginadumtan niya ang mga puti kag ginatamod niya ang pungsod sang Zulu subong superyor sa iban nga mga itom. Bangod sang iya pagtambong sa mga miting nga ginhimos sang ANC (African National Congress), isa ka ginadumilian nga organisasyon batok sa pangulohan, nadalahig si Isaac sa mga kinagubot sa Bagatnan nga Aprika sang 1976. Sia nag-asoy: “Madamo ang ginluthang kag napatay sang mga polis; ang iban nabaldado tubtob buhi. Sang makita ko ini, nagtubo sa akon ang espiritu sa pagtimalos. Luyag ko makakuha sing awtomatiko nga pusil kag luthangon ang pinakamadamo nga maigo ko antes patyon ang akon kaugalingon. Bangod wala ako sing nakita nga pusil, namat-od ako nga sundon ang halimbawa sang iban nga nagkadto sa kaiping nga mga pungsod agod mahanas didto sa militar.”
Sa sining importante nga tion nakadtuan sang mga Saksi ni Jehova si Isaac sa ila pamalaybalay nga pagbantala. Ginbilinan sia sing mga libro nga nagapaathag sang mensahe sang Biblia, kag ang isa labi na nga, Matuod nga Paghidait kag Kalig-onan—Gikan sa Anong Tuburan?, nakahimo sing dayon nga impresyon sa iya. Sia nagpaathag: “Nakita ko na karon ang matuod nga paghidait nga akon ginapangita. Naton-an ko nga ang Biblia nagasiling: ‘Ang tiko indi mapatadlong,’ kag: ‘Wala sa tawo nga nagalakat sa pagmando sang iya mga tikang.’ (Manugwali 1:15; Jeremias 10:23) Gani nangin maathag sa akon nga ang amon pagpakig-away wala sing pulos bangod indi ini magadala sing paghidait sa duta. Ang Ginharian sang Dios lamang ang magahimo sini. (Bugna 11:17, 18) Nabuligan man ako sang Biblia nga bag-uhon ang akon pagtamod sa iban nga mga rasa. (Binuhatan 10:34, 35) Makalilipay mahibaluan nga may mga tawo gikan sa tanan nga rasa kag mga tribo nga nagakabuhi na upod ang paglaum nga makatigayon sing kabuhi nga walay katapusan sa paraiso nga duta sa idalom sang Ginharian sang Dios.”
Si Isaac nagaalagad karon subong bug-os tion nga nagalakbay nga ministro, nga nagapalig-on sa mga kongregasyon sang mga Saksi ni Jehova nga nahuman sang madamo nanuhaytuhay nga pungsudnon nga mga grupo.