Gikan sa Amon mga Bumalasa

Walay Peligro nga Pagmaneho

Batuna palihog ang akon mga komplimento sa inyo mga artikulo kasan-o lang tuhoy sa “Safe Driving.” (January 8, 1988) Maayo kuntani kon ginsambit pa ninyo ang ibang nga mga katalagman, subong sang, pagpanigarilyo samtang nagamaneho, paggamit sing nanuhaytuhay nga mga droga, kag labi na ang mga ginalakip sa pila ka ginaresita nga mga bulong, nga nagabuhin sang ikasarang sang tsuper sa pagkontrol sang iya awto. Subong man, dapat ihatag ang paandam tuhoy sa iban pa nga mga kabangdanan, subong sang kakulang sing tulog, pagkabusog ukon pagkauhaw, pag-away sa pamilya, mga pelikula nga nagapakita sing madasing nga pagmaneho, mapigaw nga panulok, kag kakulang sing ehersisyo.

R. G., Pransya

Samtang ang iban sang mga butang nga ginsambit sa ibabaw nakomentohan na sa amon mga artikulo, kinahanglan sila suliton. Ang walay peligro nga pagmaneho nagakinahanglan nga ang tsuper dapat alisto gid sa kon ano ang nagakatabo sa dalan, sa amo maabtik sia nga makahulag sa bisan anong kahimtangan nga mahimo mag-utwas.—ED.

Samtang ginsakdag sang inyo artikulo ang maayo kag walay peligro nga pagmaneho, natingala ako nga wala ninyo ginrekomendar ang ‘pagtakod sing paha.’ Isa man ini ka walay peligro nga batasan sa pagmaneho. Sa inyo artikulo nga “Why Fasten Your Seat Belts?” (June 8, 1978), ginsambit ninyo ang isa ka report gikan sa Canada nga naghinakop nga sa ‘pagbungguanay ang tsansa nga mabuhi ang tsuper nga nagatakod sing paha napulo ka beses ang kataason sang sa mga tsuper nga wala nagatakod sing paha,’ kag ang report gikan sa Sweden naghinakop “nga ang mga tawo nga nagatakod sing paha nakabaton sing katunga lamang sang madamo nga samad nga natigayon sang mga tawo nga wala nagatakod sing paha sa tanan nga kadasigon.”

C. S., Estados Unidos

Nagaugyon kami sing bug-os tagipusuon sa daku nga importansia sang paggamit sing mga paha sa pulungkuan. Ginapatuman ini sang kasuguan sa madamo nga estado kag mga pungsod, kag kita tanan, bisan diin man kita, dapat maghimo sining makatarunganon nga tikang para sa kasiguruhan bilang pagtahod sa dulot nga kabuhi.—ED.

Teolohiya sang Kahilwayan

Sa inyo guwa tuhoy sa “Liberation Theology” (November 8, 1987), nagbalhag kamo sing ilustrasyon nga nagapasipala sa Iglesia Katolika, kag nagasakit ang buot ko nga makita ang krus nga ginalaragway sa porma sang mga machine gun. Nagatamay ini sa krus nga sa diin ginlansang ang aton Manluluwas, nga si Jesucristo.

J. V., Estados Unidos

Ang pagpakita sa mga pusil sa porma sang krus isa ka talalupangdon nga simbulo sang katapusan nga resulta sang teolohiya sang kahilwayan, nga nagapangangkon nga Cristiano, subong katapusan nga tikang, ang paggamit sing kasingki sa paghilway sa mga ginapigos. Indi ang amon pag-imprinta sining simbulo ang nagapakahuya kay Cristo; sa baylo, ang aksion nga ginahimo sang mga nagasakdag sa naarmasan nga kasingki sa ngalan ni Cristo amo ang nagapakahuya sa iya. Ang mga metodo sang teolohiya sang kahilwayan nagasumpakil sa mga panudlo ni Jesus. Sia nagsiling: “Ang akon ginharian indi bahin sining kalibutan. Kon ang akon ginharian bahin sining kalibutan, nakig-away kuntani ang akon mga alagad agod nga indi ako ikatugyan. Apang, subong amo gid, ang akon ginharian wala maghalin sa sini.” (Juan 18:36) Gintudluan niya ang iya mga sumulunod: “Ang tanan nga nagagamit sing espada sa espada mapatay.” (Mateo 26:52) Ginsakdag niya ang pagtahod sa nagaluntad nga mga pangulohan, nga nagasiling: “Ihatag, busa, kay Cesar ang mga butang nga iya ni Cesar, apang sa Dios ang mga butang nga iya sang Dios.” (Mateo 22:21) Kag gintudluan niya ang iya mga sumulunod nga magpaabot sa Ginharian sang Dios, indi sa mga panikasog sang tawo, sa pagdala sing paaliwansan gikan sa pagpigos. (Mateo 6:9, 10; Salmo 72:1, 2, 4, 11-14) Ginapadunggan naton si Jesucristo paagi sa pagsunod sining mga panudlo.—ED.