Kinahanglan Ko Na Bala Mag-untat sa Pagdrayb?

Kon amo sini ang imo sitwasyon, ano ang makabulig sa imo sa pagdesisyon kon bala mauntat ka na sa pagdrayb ukon indi?

Sa pila ka pungsod, kon mag-senior citizen na ang isa ka driver, kinahanglan niya anay magkuha sang medical certificate antes sia makapa-renew sang iya lisensia. Ginatuman sang mga Saksi nga nagaistar sa sini nga mga pungsod ini nga kasuguan. (Roma 13:1) Pero bisan diin ka man nga pungsod nagaistar, puede mo usisaon kon bala safe pa para sa imo nga magdrayb ukon indi na.

ANG PUEDE MO HIMUON

Suno sa website sang National Institute on Aging (NIA) sa United States, pamangkuton sang mga tigulang ang ila kaugalingon:

• Indi ko na bala maayo makita ang mga road sign ukon nabudlayan na bala ako magdrayb kon gab-i?

• Nabudlayan na bala ako maglisoliso para tan-awon ang palibot, ang mga side mirror, kag ang rearview mirror?

• Madasig bala gihapon ang akon reaksion sa mga sitwasyon, ukon maabtik bala gihapon ako magpreno?

• Tama na bala kahinay ang akon pagdrayb amo nga nagalalain na ang mga nagasunod sa akon?

• Pila na bala ka beses nga diutayan lang ako maaksidente, ukon may mga gupi kag gasgas na bala ang akon salakyan bangod pirme lang ako makasagaid?

• May bes bala nga ginpapundo ako sang pulis bangod sa akon paagi sa pagdrayb?

• May bes bala nga napiyungan ako samtang nagadrayb?

• May ginainom bala ako nga bulong nga posible makaapekto sa akon pagdrayb?

• May mga miembro bala sang akon pamilya ukon abyan nga nakamuno sa akon nga nabalaka sila sa akon pagdrayb?

Kon huo ang imo sabat sa isa ukon duha sa sini nga mga pamangkot, ginapakita sini nga may dapat ka na bag-uhon. Halimbawa, puede ka magdesisyon nga indi ka na magdrayb kon gab-i. Regular nga usisaa ang imo kaugalingon. Puede mo pamangkuton ang miembro sang imo pamilya ukon abyan parte sa imo pagdrayb. Puede ka man mag-eskwela parte sa kon paano ka pa gid makahalong kon nagadrayb. Pero, kon huo ang imo sabat sa halos tanan sa sini nga mga pamangkot, ginapakita sini nga mas maayo kon indi ka na magdrayb.a

MAGPAGIYA SA MGA PRINSIPIO SA BIBLIA

Mahimo nga indi naton matalupangdan nga indi na gali safe para sa aton ang magdrayb. Kag posible daw kabudlay batunon nga mauntat na kita sa pagdrayb. Ano nga mga prinsipio sa Biblia ang makabulig sa aton nga makahimo sang maayo nga desisyon? Ari ang duha ka prinsipio.

Ipakita nga kabalo ka sang imo limitasyon. (Hulu. 11:2) Samtang nagaedad kita, nagaburon ang aton panan-aw, nagahina ang aton palamatin-an, nagaluya ang aton mga maskulo, kag nagahinay kita maghulag. Gani, ang kalabanan nga tawo nagauntat na sa paghampang sang ila nanamian nga sports samtang nagaedad sila kay madasig na magpalanakit ang ila lawas. Amo man sina sa pagdrayb. Kon kabalo ang isa ka tawo sang iya limitasyon, maabot ang tion nga sia mismo ang magadesisyon nga indi na sia magdrayb kay kabalo sia nga indi na safe kon magdrayb pa sia. (Hulu. 22:3) Kag kon may magmuno parte sa iya pagdrayb, pamatian niya ini.—Ipaanggid ang 2 Samuel 21:15-17.

Likawi nga makasala sa dugo. (Deut. 22:8) Kon indi na safe ang pagdrayb sang isa ka tawo, delikado gid ini. Kay man, puede sia maaksidente nga posible magresulta sa iya kamatayon ukon sang iban. Kag kon sia ang may sala sa aksidente, may salabton sia sa dugo.

Indi paghunahunaa nga indi ka na pagrespetuhon sang iban ukon wala ka na sing pulos kon mauntat ka na sa pagdrayb. Kay man, madamo ka gihapon sang dalayawon nga mga kinaiya. Halimbawa, kabalo ka sang imo mga limitasyon, mapainubuson ka, kag ginahunahuna mo ang kaayuhan sang iban. Bangod sini, palangga ka gid ni Jehova kag nagpromisa sia nga buligan ka niya kag paumpawan. (Isa. 46:4) Indi ka gid niya pagpabay-an. Gani kon kinahanglan mo magdesisyon kon bala mauntat ka na sa pagdrayb, pangabaya si Jehova nga buligan ka nga makahimo sang maayo nga desisyon nga nabase sa mga prinsipio sa Biblia.