Kon San-o ang AIDS Indi Peligro

Sang gab-i sang Oktubre 3, 1984, ang bata nga si Kyle Bork natawo nga kulang sing pito ka semana. Ang iya diutay nga mga baga indi pa makasarang sa pagpanghikot sing nagakaigo, gani ginsaylo sia sa Children’s Hospital sa Orange County nga 56 kilometros ang kalayuon, nga sa diin may kasangkapan didto para sa mga bata nga nagabalatian.

Ginpaathag sang doktor nga ang dugo ni Kyle dapat dugangan paagi sa pagtughong; kay kon indi, basi nga mapatay sia. Bisan pa mabudlay gid para sa mga ginikanan, nagtindog sila sing malig-on sa ila napasad-sa-Biblia nga desisyon nga indi pagpatughungan sing dugo ang ila bata. (Genesis 9:4, 5; Levitico 17:10-14; Binuhatan 15:28, 29) Ang doktor mahinangpanon kag kooperatibo. Apang, nagsiling sia nga kon ang kahimtangan mangin delikado gid, magakuha sia sing mando gikan sa korte kag tughungan niya sing dugo ang bata.

Talalupangdon nga si Kyle amat-amat nga nag-ayo, kag sang ikasiam nga adlaw, ginhalin sia gikan sa respirator. Pagligad sang duha ka adlaw ginpauli sia sang iya mga ginikanan, kag nagdaku sia nga isa ka malipayon kag mapagros nga bata, subong makita mo sa laragway. Apang indi ina ang katapusan sang sugilanon.

Sang nagligad nga tuig ginbalita sang isa ka telebisyon sa Los Angeles nga ang pila ka kabataan sa Children’s Hospital sang Orange County sang tion nga didto man si Kyle nakatigayon sing AIDS gikan sa gintughong nga dugo nga may dala nga balatian. Ginkontak sang ospital ang mga pamilya sang halos 3,000 ka kabataan agod nga mausisa sila kon may virus sila sang AIDS.

Sa gilayon, ang mga ginikanan ni Kyle nagtawag sa ospital agod pat-uron nga wala gintughungan sing dugo ang ila bata sing lipod sa ila ihibalo. Sa wala magdugay, ginbalusan sang ospital ang ila panawag agod pasaligon sila nga wala gintughungan ang ila bata sing dugo kag wala sing katalagman nga makatigayon sia sing AIDS. “Literal nga nagluhod kami kag nagpasalamat kay Jehova,” paathag sang mga ginikanan, “nga ginhatagan niya kami sang iya matarong nga mga kasuguan kag sing kusog nga huptan ang amon integridad sa atubangan sadto nga pagtilaw.”