Ang Pagkanta nga Karera nga Nagahatag sing Dayon nga Kalipay
BATA pa ako sang gindedikar ko ang akon kaugalingon sa pagkanta nga karera. Sang ulihi natigayon ko ang reputasyon subong isa ka manugkanta sing fado sa Lisbon. Amo ini ang tumalagsahon, mamingaw nga sahi sang musika sang Portugal. Wala madugay nagakanta na ako sa iban nga mga siudad sang Portugal subong man sa nagapanguna nga estasyon sang radyo sang pungsod, ang Emissora Nacional.
Nian ginhimos sang akon impresario nga maglibot kami sa Espanya, nga naglakip sang mga siudad subong sang Madrid, Barcelona, Zaragoza, kag Bilbao. Sa tapos magkanta sa Pransya, nag-istar ako sing duha ka tuig sa Angola, Aprika. Nagkanta ako didto sa lainlain nga siudad, kag sang 1972, napilian ako subong “Reyna sang Fado.”
Apang, bangod soprano ako, ang una ko nga interes amo ang klasikal nga musika. Gani pagbalik ko sa Lisbon, nag-eskwela ako sa sini nga sahi sang musika. Apang, bisan pa nawili ako sing bug-os sa akon pagkanta nga karera, indi gid ako malipayon. Sa sulod ko may espirituwal nga pagkawala sing unod. Luyag ko mangin malapit sa Dios, apang indi ko mahibal-an kon paano sia palapitan.
Sang 1973 naglibot kami sa Brazil sa pagkanta. Isa ka gab-i, sa tapos sang pagguwa sa TV, kami nga nagkanta gin-agda sa isa ka cocktail nga parti. Wala madugay napahambal kami sang asawa sang akon Brazilianhon nga impresario sang amon ginahunahuna nahanungod sa makapahuol nga mga kahimtangan sa katilingban kag sa mga hitabo sa kalibutan. Nahamuot ako sa iya pagkaprangka sa pagpahangop sing masinaligon nga ang Dios mahimo nga may sabat nga takus sang amon pagbinagbinag. Nagsiling ako nga nagapati ako sa Dios. Sa wala pa magligad ang gab-i, gintanyagan niya ako sing libro nga natig-uluhan Ang Kamatuoran nga Nagadul-ong sa Kabuhi nga Dayon. Sang ulihi ko na lang mahisayran nga sia gali isa sang mga Saksi ni Jehova.
Ang Akon Katapusan nga Plaka
Wala madugay sa tapos sadto, nagbalik ako sa Portugal agod himuon ang akon ikatlo nga plaka, nga nagaplano gid nga magbalik sa Brazil agod padayunon ang akon paglibot. Wala ko gid mahisayri nga mangin amo ini ang akon katapusan nga plaka.
Samtang didto ako sa Lisbon, may isa ka lin-ay nga nagduaw sa balay kag naghambal nahanungod sa mga pagpakamaayo nga dalhon sa sini nga duta sang paggahom sang Ginharian sang Dios. Namati ako sing maayo samtang ginabasa niya gikan sa Biblia ang labing makawiwili kag matahom nga mga pagbag-o nga ginsaad sang Dios sa mga nagakalangkag sa pagkamatarong.
Ang akon nabatian may daku gid nga epekto sa akon. Madugay ko na ginakalangkagan ang mga kahimtangan gid nga ginalaragway niya gikan sa Biblia. Nalugpayan gid ako sa sini bangod bisan hoben pa ako, diborsiado na ako, ang akon bana nag-upod sa iban nga babayi.
Mahanduraw mo ang kakibot ko sang pagkatapos sadto gintanyag sining babayi ang pareho gid nga libro nga nabaton ko sa Brazil! Sa mga paghambalanay nga nagsunod, madali ko nga narealisar nga may hamili pa sa kabuhi sang sa kabantugan ukon manggad. Determinado ako nga makatuon sing dugang pa nahanungod sa matahom nga mga saad nga masapwan sa Biblia.
Isa ka Daku nga Desisyon
Ang akon semanal nga pagtuon sing Biblia amo ang labing makalilipay nga eksperiensia. Sa gilayon ginpalambo ko ang suod personal nga kaangtanan sa akon Manunuga, si Jehova nga Dios.
Sa pagkamatuod, may mabudlay nga mga tinion sa tapos ako mamat-od nga biyaan ko ang akon matahom nga karera subong isa ka propesyonal nga manugkanta. Gin-ipit ako sing daku nga magbalik sa Brazil. Nian gintanyagan ako sing kontrata nga magkanta sa Porto sa naaminhan nga Portugal. Ang ideya amo nga kon mapahalin ako sa Lisbon, basi magbaylo ang akon hunahuna kag padayunon ko ang akon pagkanta nga karera.
Apang, tapos na ang akon desisyon. Namat-od ako nga magkadto sa Pransya kag magpuyo upod sa akon may bana na nga utod nga babayi agod mapalayo ako sing bug-os gikan sa mga pagsulay nga pabalikon ako sa kalibutan sang kalingawan. Apang sia kag ang iya bana mabaskog nga nagpamatok sa akon bag-o masapwan nga pagtuluuhan. Wala sila magtugot nga magtuon ako sing Biblia sa ila puluy-an kada semana. Wala mahadlok, ginalakbay ko ang 30 kilometros pakadto-pakari agod nga indi ko malaktawan ang akon pagtuon. Sang ulihi, ginpangabay nila ako nga maghalin sa ila balay.
Bangod isahanon na lamang ako, nakakita ako sing obra sa isa ka manggaranon nga babayi. Nagaplano sia sa pagbakasyon sing tatlo ka bulan sa iya kaugalingon nga isla sa Gresya, kag gin-agda niya ako nga mag-upod sa iya. Apang nakita ko ang katalagman nga mapahilayo ako sa katawhan ni Jehova, gani nangindi ako.
Sa baylo, sadto nga tig-ilinit nagtambong ako sa Portuges nga sesyon sang distrito nga kombension sang mga Saksi ni Jehova sang 1974 sa Toulouse, Pransya. Kapin sa 12,000 ang nagtambong. Didto, ginbawtismuhan ako bilang simbulo sang akon dedikasyon kay Jehova nga Dios. Amo yadto ang akon nahauna nga kombension, kag sing makawiwili, amo yadto ang katapusan nga kombension nga gintambungan sang Portuges nga mga Saksi sa iban nga pungsod kay ang ila dalagku nga mga kombension gindumilian sa Portugal. Pagligad sadto nga tuig gintugutan sila sa paghiwat sang ila mga kombension sa Portugal.
Isa ka Bag-o nga Karera
Ang isa ka bulan nga hilikuton antes sang kombension sa Toulouse may daku nga epekto sa akon. Daw ano ka tumalagsahon nga pribilehiyo nga makaupod kada adlaw ang malig-on nga Cristianong kauturan nga mga lalaki kag mga babayi nga naghupot sang ila integridad sing tinuig sa idalom sang pagkadiktador ni Salazar sa Portugal!
Ang resulta sang suod nga pagpakig-upod sa mga kauturan nga yara sa bug-os tion nga pag-alagad nagpukaw sa akon sing mabaskog nga handum nga mangin bug-os tion nga ministro kaangay nila. Sa amo, pagligad sang anom ka bulan nga nabawtismuhan ako, ginsugdan ko ina nga pag-alagad sa Portugal. Wala madugay sa tapos sadto, gin-agda ako nga mag-alagad sa isa ka espesyal nga asaynment. Kag sin-o ang akon mangin paris? Amo si Maria Eulalia da Luz, ang Saksi nga nagtanyag man sa akon sing Kamatuoran nga libro sa Lisbon!
Rebolusyonaryo nga Teritoryo
Ang Bagatnan nga Portugal amo ang akon nahauna nga espesyal nga asaynment. Isa ini ka rehiyon nga ginapangibabawan sang Partido Komunista sa tapos sang rebolusyon sang 1974. Nagkinagula sa diutay nga mga banwa sang magbantala kami sa Baixo Alentejo Province. Wala madugay mabaskog kami nga ginhingabot.
Agod paluyahon kami, pirme ginabato sang mga lalaki ang amon ginaarkilahan nga balay, nga nagresulta sa madamo nga gab-i nga wala sing tulog. Masunod, may bomba nga ginpalupok, kag naguba ang kandado sa mayor nga puertahan. Sing indi mapatihan, ang tawo nga nagpamatok sa amon hilikuton nagpaarkila dayon sa amon sing mas maayo nga balay, kay ginahunahuna niya nga makatalagam para sa amon nga mapain kami. Sang isa ka adlaw gintumba sang mga manugpamatok ang puertahan sa atubangan sang wala kami. Handurawa ang amon kakibot sang maabtan namon ang amon bag-o nga kasero nga nagaguardia sa balay! Ginpasalamatan namon si Jehova bangod sang Iya pag-amlig.—Salmo 145:18, 19.
Walay sapayan sadto nga pagpamatok, ang amon hilikuton didto nangin mabungahon. Sang maghalin kami didto, nalipay kami nga duha ka bag-o nga kongregasyon sang mga Saksi ni Jehova ang naporma, ang tagsa may matahom nga Kingdom Hall.
Isa ka Mabudlay nga Hangkat
Sang 1977 ginhalin kami sa Madeira Islands. Bisan katahom gid sang danyag sa sining semitropikal nga duta, nasapwan namon ang amon kaugalingon nga nagaatubang sa bakulod nga alagyan nga makakalapoy gid.
Sa sining asaynment nakilala namon ang mga tawo nga baliskad gid sa mga tawo sa amon nagligad nga teritoryo. Ang relihioso nga debosyon nasentro sa “mga santos.” Kadamo sang indi makahibalo magbasa kag magsulat, kag ang disparatis isa ka gamhanan nga impluwensia sa kabuhi sang mga tawo. Nakita gid namon ang mga epekto sang espirituwal nga “mabug-at nga mga lulan” nga ginpapas-an sang mga lider sang dimatuod nga relihion sa mga tawo. Nagpukaw ini sa amon sing makapahulag sing mabaskog nga puwersa nga magdala sing espirituwal nga paumpaw, ano man ang matabo, sa sining “ginabudlayan kag ginabug-atan” nga mga kalag.—Mateo 11:28, 29; 23:4.
Masami namon mabatian ang mga tawo nga nagasiling nga bangod Katoliko sila, wala sila sing kinahanglan sa amon. Ginapamangkot ko sila kon ginapangadi nila gihapon ang matahom nga “Amay Namon” nga pangamuyo. Kon magsabat sila sing huo, ginasiling ko nga kita tanan nagakalangkag nga himuon ang kabubut-on sang Dios sa duta, kay indi maayo ang ginahimo sang tawo sa karon nga mga adlaw. Kon magsugot sila, nagapamangkot ako kon nahibaluan nila kon ano ang kabubut-on sang Dios para sa aton. Sa masami, ini nga metodo ginapamatian, kag ang mainabyanon nga paghambalanay nagasugod.
Isa ka adlaw nagapakighambal ako sa isa ka babayi nga nagpakita sing interes sa mensahe sang Ginharian sang sa hinali nakibot ako sa lebentador nga naglinupok sa akon palibot. Ang tawo nga nagaatake sa akon amo ang alabuton nga anak nga lalaki sang interesado nga babayi. Maakigon nga ginhaboy niya ako sing libro kag naigo ang akon tiil. Ginawayway ang garab nga ginagamit sa pagpanguha sing saging, namahog sia nga patyon niya ako, kag ginhakyaw niya ang garab sa ibabaw sang akon ulo. Sa hinali, may nagguwa gikan sa kasagingan nga isa pa ka tawo, nga amo lamang ang iya ginatahod kag ginakahadlukan. Nagsinggit sia sa isa ka awtoritatibo nga tingog: “Ano ang imo ginahimo?” kag napunggan niya ang mabaris nga tawo sa pag-atake sa akon.
Sa duha ka okasyon sa sini nga asaynment, ang akon kabuhi ginpahog, kag sa tagsa ka tion nakita ko ang maamligon nga kamot ni Jehova sa akon. (Salmo 68:19, 20) Ang matuod, ining teritoryo nangin mabinatunon sa maayong balita nahanungod sa Ginharian sang Dios, kag sang maglakat kami, madamo pa ang nagatambong sa amon mga miting.
Sa isa pa ka duog sa Madeira Islands, nag-umpisa ako sing pagtuon sa Biblia upod sa isa ka babayi nga ang iya bana indi maayo sa amon. Apang daku ang pagtahod niya sa Biblia. Manughimo sia sing tinapay kag nagaobra sa gab-i, apang lipod sa amon, pagmata niya, nagapamati sia sa amon semanal nga pagtuon. Ang iya interes amat-amat nga nagdaku sa kada pagtuon, apang nagalibog ang iya ulo nga ang ngalan sang Dios amo si Jehova.
Namat-od sia nga usisaon ini sa iya kaugalingon nga Biblia apang indi niya makita ang Biblia. Luyag niya tukibon ang kamatuoran nahanungod sa ngalan sang Dios gani ginpangita gid niya ang iya “daan, matuod nga Biblia” agod mahusay ini. Wala madugay, sang maninlo sia sa panaderya, nakita gid man niya ang iya hamili nga Biblia. Malangkagon nga gintan-aw niya ang pila ka teksto, kag nakita niya ini didto. Sing dimasaypan, ang personal nga ngalan sang Dios amo sa pagkamatuod si Jehova! (Salmo 83:18) Sa sulod sang malip-ot nga tion, talalupangdon ang iya pag-uswag kag ginbawtismuhan sia. Sia karon matutom nga nagaalagad sa kongregasyon.
Pinakaulihi nga Asaynment
Sa karon, nagaalagad ako sa naaminhan sang Portugal sa siudad sang Braga. Sa sulod sang mga tinuig isa ini ka relihioso nga sentro nga may kilala nga Katoliko nga altar kag unibersidad. Apang sin-o ang naghunahuna nga magaabot ang adlaw nga sa diin madamo nga simbahan ang makasapo nga nagadiutay ang ila mga katapo? Apang, amo sini ang nagakatabo karon.
Madamo kami sing nasumalang nga nagapati sa ebolusyon kag nagabaton dayon nga mga agnostiko sila. Ang publikasyon nga Life—How Did It Get Here? By Evolution or by Creation? upod ang mga kamatuoran sini nga nagasakdag sa pagpanuga isa ka gamhanan nga instrumento sa ‘pagrumpag sang mga pangatarungan kag sang tagsa ka bugalon nga kaupangan batok sa ihibalo sa Dios.’—2 Corinto 10:5.
Ang Labing Maayong Karera
Kon balikdon ko ang nagligad nga 15 ka tuig, wala ako nagaduhaduha nga ginpili ko ang labing maayong karera, ginagamit ang akon tingog indi sa paglingaw kundi sa pagpakighambal sa iban nahanungod sa matahom nga mga saad sang Dios. Ang mainit nga imbitasyon nga gamiton ang imo tingog sa pagwali sing “maayong balita” nagahalin kay Jehova mismo kag bukas sa tanan nga magabaton sini.—Mateo 24:14; Roma 10:13-15.
Daw ano ka dakung kahigayunan ang ginahatag sa aton nga tinguhaan nga lab-uton ang tagipusuon sang mga tawo nga ginabudlayan kag ginabug-atan, ginapalig-on sila sa ‘pagkari kag mag-inom sing tubig sang kabuhi nga wala sing bayad’! (Bugna 22:17) Ang mensahe gikan sa Pulong sang Dios amo ang nagatandog sa tagipusuon sang mapainubuson nga mga tawo. Ang akon paris sa bug-os tion nga ministeryo kag ako nagabatyag nga isa ka pribilehiyo namon nga gamiton gihapon ang amon tingog, indi para sa kabantugan ukon manggad, kundi para sa pagdayaw kag pagdala sing dayon nga mga pagpakamaayo sa iban.
Ginabatyag ko nga ang akon karon karera sa “pag-amba” mas superyor sa akon anay karera sa pagkanta, kay ginahimo ko ang ginsiling sang salmista: “Amba kay Jehova, bulahana ang iya ngalan. Sa adlaw-adlaw isugid ang maayong balita tuhoy sa iya pagluwas.” (Salmo 96:2)—Panugiron ni Madalena Ferraz Martins.
[Laragway sa pahina 20]
Si Madalena Ferraz Martins kag ang iya paris sa bug-os tion nga ministeryo, si Maria Eulalia da Luz