Gikan sa Amon mga Bumalasa
Koloreti Nagatrabaho ako subong makeup artist kag nasapwan ko nga sibu gid kag impormatibo ang artikulo sa “Pamangkot sang mga Pamatan-on . . . Paano Ako Makapamutang sing Koloreti nga Nagakaigo?” (Hulyo 8, 1990). Tuhoy sa katalagman sa bakterya sa pila ka sampol ukon tester sang balaligyaan, ang isa ka makatarunganon nga paghalong amo ang pagbakal sa isa ka kilala nga balaligyaan. Ina nga mga balaligyaan masami nga may nahanas sing maayo nga mga dispatsadora nga nagapangabudlay sing lakas agod tipigan ang ila mga tester nga matinlo kag makagalanyat sa mga bumalakal. Dapat man ikaw mag-insister nga ang gamiton amo ang disposable nga mga inugbutang, subong sang algodon. Ang lipstik dapat tinluan sing alkohol antes gamiton. Ang brush sa pagkoloreti dapat anay tinluan sing cleaning solvent. Ang lapis para sa mata dapat anay tahalan antes gamiton. Makapakita man ikaw sing konsiderasyon para sa masunod nga bumalakal paagi sa indi pagbutang sang imo mga tudlo sa bisan ano nga mga produkto.
C. H., Estados Unidos
Mga Pusil Nasaklaw ako sang inyo napatiko nga paglaragway sang mga pusil sa May 22, 1990 nga guwa. Inang may nadampigan kag negatibo nga paglaragway sa wala sing kabuhi nga mga butang makahalam-ot. Ang mga pusil indi duna nga maayo ukon malaut; amo man ang nagahimo, nagabaligya, ukon nagapanag-iya sini.
J. P., Estados Unidos
Napatay ang asawa sang akon tiyo sa isa ka aksidente sa awto kag tatlo ka bulan nga nagpahubog sia. Sang ulihi ginkandaduhan niya ang iya kaugalingon sa banyo kag gintiro ang iya kaugalingon. Ginalauman ko nga ang mga tawo nga makabasa sang artikulo magdulog kag maghunahuna kon bala mapuslanon magpanag-iya sing pusil.
M. C. A., Brazil
Bisan pa ginabaton ko nga madugay ko na nga handum nga makabakal sing pusil, sang mabasa ko yadtong mga pahina, nagduhaduha ako kon bala mapuslanon gihapon nga magpadayon ako sa pagsupot agod makabakal sing pusil.
D. M., Inglaterra
Pagbinahinbahin sang mga Katoliko Kinugmat ako sa inyo June 22, 1990 nga guwa. Kinahanglanon gid bala nga ipakita ang aton ginlansang sa krus nga Manluluwas nga natunga?
D. L. A., Estados Unidos
Wala kami sing tuyo nga tamayon si Cristo. Ang krusipiho kinaandan nga ginagamit subong simbulo sang Iglesia Katolika. Sa amo ang laragway nagdrama sang makapasubo nga pagbinahinbahin sa sulod sang Katolisismo. Sing makawiwili, sang ginkondenar ni apostol Pablo ang sektaryanismo sa tunga sang mga Cristiano sa Corinto, gingamit niya ining maathag nga ilustrasyon: “Si Cristo nabahinbahin.” (1 Corinto 1:13)—ED.
Nagapanginbulahan ako. Ang sinulat ginpanalawsaw sing maayo, ginsulat sing makawiwili, kag wala nagahukom. Indi gid ninyo ako makombertir sa inyo relihion, apang napasanagan ninyo kag napahibalo ako.
V. O., Estados Unidos
Kuyap Dapat ko ipabutyag ang akon daku nga pasalamat sa inyo artikulo tuhoy sa kuyap! (June 22, 1990) Daw ano nga paumpaw ang marealisar nga indi lamang ako ang nagaantos sa kuyap. Daku gid ang akon kasubo nga nagplano ako nga tapuson ang tanan. Husto gid sa tion ang pag-abot sang artikulo. Ginbuksan sini ang paglaum sa isa ka palaabuton nga wala na sing balatian.
N. P., Republika Pederal sang Alemanya
Pag-eksperimento sa mga Sapat Gin-apresyar ko gid sing daku ang inyo artikulo. (Hulyo 8, 1990) Nahibaluan ko nga ginaeksperimentohan ang mga sapat, apang wala gid ako maghunahuna nga ginagamit sila sa paghimo sing mga kosmetiko, mga shampoo, kag mga detergent! Malangkagon nga ginahulat ko ang tion nga ina nga pag-abuso mauntat na.
R. M., Italya