Pamangkot sang mga Pamatan-on . . .

Paano Ako Makapamutang sing Koloreti nga Nagakaigo?

“LUYAG mo bala mamutang sing diutay nga koloreti?” Nakibot si Nina sang ginpamangkot sia sina sang iya iloy. Duha ka tuig antes sini, wala sia gintugutan sa pagbutang sing koloreti. Apang sa sining pinasahi nga okasyon, isa ka punsion sang kasal nga kadtuan nila, namat-od ang iya iloy nga tion na nga si Nina magtuon sang babayin-on nga arte sang pagpamutang sing koloreti. “Ginanerbios ako diutay,” alimunaw ni Nina. “Indi ako makahibalo magpangoloreti. Gani si Mom ang nagbutang sa akon sing diutay nga lipstik kag papula sa guya.”

Ayhan ginabatyag man sang imo mga ginikanan nga nagakaigo nga ikaw mamutang sing koloreti.a Kon ginagamit sing nagakaigo—kag diutay lang—ang koloreti makapatahom sang panagway sang isa. Apang, kon indi husto ang pagpamutang, baliskad gid ang epekto sini. “Ang iban nga mga lin-ay nagapangoloreti kag katahom tulukon,” siling sang isa ka tin-edyer nga lalaki. “Apang ang iban nga mga lin-ay sobra mamutang, kag kalain gid sa ila tulukon.”

“Kon mamutang sila sing tuman kasili nga kolor, kag masili gid,” dugang sang isa ka lin-ay, “daw tarso ang ila hitsura!” Paano ka makapangoloreti sa isa ka paagi nga magapatahom—indi magapalaw-ay—sang imo hitsura?

Mga Panuytoy Gikan sa Pulong sang Dios

Ang mga kosmetiko indi bag-o. Sa tunga sang kagulub-an sang mga Israelinhon may nakit-an nga mga yahong ukon mga paleta nga makapakibot nga sarang magamit karon. “Gingamit [ini] anay sa paghimo sing mga kolor para sa guya” sang Israelinhon nga mga babayi. Suno sa The Biblical Archaeologist, Pebrero 1955, “ang paggamit sing . . . mga kosmetiko lapnag gid” bisan sang panahon sang Biblia.—Ezequiel 23:40.

Sa karon, ang industriya sang kosmetiko nagagasto sing mga duha ka bilyon ka dolyar kada tuig sa pagpasayod sa Estados Unidos lamang. Paagi sa paggamit sing makagalanyat gid nga mga modelo, ginasakdag nila ang pinakaulihi nga “hitsura,” halin sa “natural” padulong sa indi kinaandan. Ining “hitsura,” pangangkon nila, mangin imo kon magbakal ka lamang sang ila kosmetiko nga mga produkto. Apang, pila lamang ka lin-ay ang nagmadinalag-on nga daw mga modelo kon tulukon. Kag mahimo man nila ina, ang bag-o nga “hitsura” mahimo indi na uso antes maubos ang una nga lipstik.

Ang Biblia nagabulig sa imo sa paglikaw nga indi ka makontrol sang madlos sang uso. Ini nagasiling: “Dili kamo magpauyon sa sining sistema sang mga butang, kundi magbalhin kamo paagi sa pagbag-o sang inyo hunahuna, agod nga mapamatud-an ninyo sa inyo kaugalingon ang maayo kag kalahamut-an kag himpit nga kabubut-on sang Dios.” (Roma 12:2) Sang panahon sang Biblia, mahimo nga ang iban sang Cristianong mga babayi may huyog sa pagsul-ob sing makagalanyat nga panapton kag mauti nga mga estilo sang buhok nga uso sadto. Apang si apostol Pablo naglaygay: “Ginahandum ko nga ang mga babayi magpamuni sing panapton nga nagakaigo, nga may kaugdang kag kaligdong, indi nga may sinalapid nga buhok kag bulawan ukon mga perlas ukon panapton nga malahalon.”—1 Timoteo 2:9.

Ang laygay ni Pablo wala nagadumili sang imo pagpatahom. Nagakahulugan lamang ini nga ang imo panagway dapat “nagakaigo,” ukon nagakabagay, wala nagapakitakita; maugdang kag makatarunganon, indi kaladlawan ukon uso gid. Ang Griegong tinaga para sa “kaugdang” nagadala sing ideya nga may ‘pagtahod sa opinyon sang iban,’ kag dapat mo labi na tahuron ang opinyon sang imo mga ginikanan. Busa tan-awon naton kon paano ini naangot sa pagpamutang sing koloreti.

Antes Mamutang sing Koloreti

Sanglit ang koloreti dapat magpatahom sang imo hitsura, indi maghimo sing maskara ukon pakunokuno, makatarunganon nga halungan mo anay ang imo kinaugali nga panagway kag ang kabilugan nga kapagros. Sa amo kapin ang mahimo sang paghupot sing balanse nga pagkaon kag bastante nga pahuway kag regular nga ehersisyo sa pagdugang sang imo pagkamakagalanyat sang sa koloreti.

Ang consultant sa pagpatahom nga si Jane Parks-McKay nagalaygay pa sa mga lin-ay “nga mag-umpisa sa sadsaran—nga amo ang, regular, epektibo nga pag-atipan sa panit. . . . Madamo nga tawo ang daw nagapatumbaya sa ila panit . . . [kag dayon] takpan ang ila indi tanto katahom nga panit sing mga kosmetiko sa paglaum nga patahumon sila sini.”

Matahom gid ang koloreti sa panit nga ginaatipan sing maayo. Ang libro nga A Lifetime of Beauty nagapaathag: “Ang pagtinlo sa panit kaangay sa paghanda sa dingding para sa bag-o nga anib sang pintura: bisan pa daw ano katahom sang kolor, ang pininturahan indi matahom tulukon kon may higko kag indi pino nga mga bahin sa idalom sini. Ang panit nga kulang sa pagtinlo mamala kag nagahimbishimbis.”

Sa amo ang artist sa koloreti nagsiling sa Magmata!: “Sa aga, mahimo tinluan sang isa ka lin-ay ang iya guya paagi sa maayo nga inugtinlo sa guya. Mahimo niya ini sundan sing toner para sa guya kag sing maayo nga moisturizer.”

Pag-analisar sang Imo mga Kinahanglanon

Karon, tan-awa sing maayo ang imo guya kag analisaha ang imo maayo kag indi maayo nga mga kinaiya. Ginhatagan ka bala sing nagahambal nga mga mata, mapino nga supat, ukon mapagros, alangay nga kolor sang panit? Nian mahimo nga diutay lang ukon wala gid ikaw nagakinahanglan sing koloreti. Sa pihak nga bahin, ayhan ang imo panit sobra ka lanahon (kinaandan sa panahon sang pagkatin-edyer) kag pungguron. Ukon mahimo nga may yara ka kinaiya sa imo guya (subong sang imo cheekbones) nga luyag mo patahumon. Ang maayo nga paggamit sing koloreti mahimo makabulig.

Sang panahon sang Biblia ang pila ka babayi nagagamit sing itom nga pinta agod maghatag sing ilusyon sang ‘ginpadaku nga mga mata.’ (Jeremias 4:30) Sa karon, ang eye shadow, eyeliner pencil, kag likido nga eyeliner ginagamit para sa amo man nga mga epekto. Ang foundation cream kag losyon makapaalangay sang kambang nga panit. Ang papula makapatahom sang imo cheekbones.

Ano kon nagakinahanglan ka sing bulig sa pagpili ukon pagbutang sing koloreti? May yara mga libro sa publiko nga mga librarya nga makabulig. Apang mahimo luyag mo man pamangkuton ang imo iloy ukon ang isa ka abyan nga mas magulang sa imo. Ang lin-ay nga nagahingalan kay Tina nag-alimunaw: “Ginpaupod ako ni Mom sa pagpamalaklon kag ginpamangkot niya ang manugbaligya sing koloreti kon ano nga mga kolor ang dapat ko gamiton.” Ang mga consultant sa pagpatahom sa maayo sing reputasyon nga mga balaligyaan makalaygay kon ano nga mga kolor ang maayo gid sa imo panit kag kon paano ibutang ang koloreti nga matahom gid. Apang sanglit ang ila trabaho amo ang pagbaligya sa imo sang ila produkto, maghalong nga wala ka nagabakal sang mga produkto nga wala gid nimo ginakinahanglan. Kag bangod sang tumalagsahon nga kinahanglanon sang imo Cristiano nga estilo sang pagkabuhi, luyag mo pat-uron nga wala ka nagabakal sing mga kolor nga mahimo maayo sa pormal nga okasyon sa gab-i apang indi nagakaigo para sa eskwelahan ukon sa Cristianong mga hilikuton.

Mga Ideya Tuhoy sa Koloreti

Ang estilo sang koloreti wala nagapalareho sa lainlain nga mga pungsod. Apang mahimo sambiton ang pila ka kabilugan nga mga talaksan:

Binagbinaga ang Sahi sang Imo Panit. Sanglit lanahon ang panit sang kalabanan nga tin-edyer, mahimo luyag mo magpabalin sa water-based, wala sing lana nga mga koloreti. Haganhagan ini, gani daw indi bal-anon ang imo koloreti. Madamo man ang nagapati nga ang lanahon nga mga koloreti nagapagrabe sang punggod.

Basaha ang Etiketa. Ipaanggid ang mga ingrediente sang barato nga marka sang produkto sa malahalon. Mahimo nga ang kinatuhayan lamang amo ang presyo kag ang putos. Importante labi na nga basahon ang mga etiketa kon alerdyik ka sa koloreti.

Maggamit sing Masanag nga Kapawa. Kon indi bastante ang kapawa, mahimo nga mapasobrahan mo ang imo koloreti. Sanglit ang koloreti nga ginabutang sa kapawa sang fluorescent mahimo nga maisog tulukon sa kapawa sang adlaw, tilawi nga mamutang sang imo koloreti malapit sa bintana agod makita mo kon ano ang hitsura sini sa kinaugali nga kapawa.

Magbutang sing Diutay Lang nga Koloreti. Ang pagpasobra bisan sa maayo nga butang mahimo nga makahalalit. (Ipaanggid ang Hulubaton 24:13; 25:27.) Kon ang imo guya daw nagasinggit sing “koloreti!” sobra ang nabutang mo ukon ang kolor nga gingamit mo tuman kaisog. Ang sobra nga pagpangoloreti nagapakanubo sang imo panagway kag mahimo nga maghatag pa sing sayop nga impresyon tuhoy sa imo moral nga mga prinsipio. (Ipaanggid ang Ezequiel 23:36-42.) Gani magpabilin sa malalangon, indi masili, nga mga kolor. Hanasa ang teknik sa pagpamutang sing koloreti agod nga ang papula sa imo guya daw indi kinurit nga pinta kon tulukon ukon ang imo eye shadow indi maghimo sa imo nga daw raccoon kon tulukon.

Tinlui ang Imo Guya sing Maayo. Ang libro nga A Lifetime of Beauty nagsiling: “Indi gid magtulog sa gab-i nga wala mapanas ang agi sang koloreti . . . Ang batasan nga pagtulog nga may higko, tap-ing kag patay nga mga selula sang panit nga nagatapik sa imo guya magahimo sang imo panit nga daw mahigko kag mamala tulukon.” Ang isa ka dermatologo nagsiling pa gani nga “may peligro ka nga maimpeksion kag mairitar ang imo panit kon indi mo matinluan ang koloreti kada gab-i antes ka magtulog.” Maggamit sing pangtunaw sa koloreti, subong sang cold cream, sa pagtinlo sang imo guya.

“Ang katahom mahimo nga wala sing pulos,” siling sang Hulubaton 31:30, kag bisan ang matahom nga pagbutang sang koloreti indi makatago sang negatibo nga disposisyon ukon manabaw nga panghunahuna. Ang Biblia nagapahanumdom sa aton: “Ang imo katahom dili mangin sa guwa . . . Sa baylo, dapat ini mangin sa tinago nga tawo, ang wala nagalubad nga katahom sang mapainubuson kag mahim-ong nga espiritu, nga bilidhon gid sa itululok sang Dios.”—1 Pedro 3:3, 4, New International Version.

[Mga footnote]

[Kahon sa pahina 18]

Mga Katalagman sang Pagpangoloreti

Ang sumalakdag sang bumalakal nga si Elaine Brumberg nagreport: “Madamo nga kemikal kag mga ingrediente sang kosmetiko ang sarang makasalupsop sa panit kag makasulod sa lawas.” Ang iban sang ginagamit sing kinaandan nga mga ingrediente ginasuspetsahan nga makapakanser.

Ang iban nga mga ingrediente (sa masami mga pahumot kag mga preserbatibo) kilala nga makapaalerdyik halin sa pagpalangatol tubtob sa pagpangatsi. Matuod, ang iban nga mga produkto nagapangangkon nga hypoallergenic ukon “natestingan nga indi makapaalerdyik.” Apang ang imo reaksion sa isa ka produkto mahibal-an lamang paagi sa eksperiensia kag paagi sa mahalungon nga pag-usisa sa mga etiketa.

Ang isa pa ka kinaandan nga katalagman amo ang pagtapik sang kagaw. Ang mascara mahimo mangin paagi sa pagpadamo sang diutay nga mga organismo nga ginasaylo didto gikan sa ulaklob ukon mga tudlo paagi sa inugbutang sing mascara. Mahimo ini bangdan sang impeksion sa mata kon matandog sang inugbutang sang mascara ang mata. Ang pagsaylo sang higko isa gid ka problema sa mga sampol sa balaligyaan nga sa amo madamo nga tawo ang nagasawsaw sang ila mga tudlo. Busa ginarekomendar sang iban nga mga eksperto nga likawan mo ang pagbutang sang mga sampol sa balaligyaan sa imo guya.

[Laragway sa pahina 16]

Mahimo matudluan ka sang imo iloy sang arte sa pagpamutang sing koloreti