Pagbantay sa Kalibutan

May Disbentaha ang mga Babayi

“Ang imol nga mga babayi sa uma amo ang labing nadingutan nga mga tawo sa kalibutan,” siling sang publikasyon sang Nasyones Unidas, nga UN Chronicle. “Kapin sila ka balatianon kag wala sing tinun-an sang sa mga lalaki kag kulang sila sing mga kahigayunan nga bukas sa mga lalaki sa pagpauswag sang ila kaugalingon.” Duha ka daku nga pagtuon tuhoy sa kaimulon sa kalibutan sang 1990 sang duha ka internasyonal nga ahensya sa pagpauswag, ang United Nations Development Program kag ang World Bank, ang nakalab-ot sa makapasubo nga konklusyon. “Mga tunga sa milyon ka mga babayi, 99 por siento sa ila sa nagauswag nga kalibutan, ang nagakapatay bangod sang pagpanganak kada tuig,” report sang UN Chronicle.

Panaad Para sa Palibot

“Kita nga mga tawo nangin katalagman sa aton kaugalingon. Dapat kita maghikot sa gilayon.” Ining makahaladlok nga mga pulong nangin isa ka bahin sang panaad para sa palibot nga ginhimo sang mga presidente sang mga unibersidad gikan sa 22 ka pungsod sang Aprika, Asia, Europa, kag Aminhan kag Bagatnan nga Amerika. Nanaad sila nga ang ila eskwelahan magtudlo sing kapin nahanungod sa palibot kag dugangan ang pundo sang eskwelahan para sa pagpanalawsaw sa palibot. Ang mga opisyal, nga nagsapol sa isa ka komperensya sa Talloires, Pransya, sining nagligad nga Oktubre, nagdeklarar man sing komon nga mga tulumuron “para sa isa ka maayong palibot sa palaabuton.”

“Ginrasyon” nga mga Milagro

Bangod sang tigpalamangag, ginkinahanglan nga ang “milagro nga tubig” gikan sa kilala sa kalibutan nga pool sang Lourdes sa Pransya irasyon, nga ginbangdan sang pagkinagula sang mga bisita nga nagatinguha sang milagruso nga pag-ayo. Ang gintugot sang relihioso nga mga awtoridad sa tagsa ka peregrino 1⁄4 litro lamang sang tubig gikan sa tuburan, nga, suno sa tradisyon, nagbuswak sang 1858 sa tapos sang aparisyon ni Madonna. Ang tanan nga botelya nga may sobra ginkompiskar kag gin-ula liwat ang tubig sa pool. “Sa tanan nga simbahan sa Pransya, nagapangamuyo sila sa Birhen sang Ulan, sa wala sing pulos. Apang kon ano man ang natabo, wala niya mapaulan luwas sa Lourdes lamang,” siling sang pamantalaan nga Corriere della Sera.

Mga Problema sa Sinagod nga mga Sapat

Ang nagauso nga pagsagod sing ido nangin kabangdanan sang kabalaka sa tunga sang mga awtoridad sang siudad kag sang panglawas sa Pransya. Ang Pranses nga semanal nga magasin nga L’Express nagreport nga kada adlaw 20 tonilada sang ipot sang ido ang ginapulot gikan sa mga kalye kag mga bangketa sang Paris sa bili nga kapin sa 400 ka franc ($70, U.S.) kada kilo. Apang dugang sa bili kag tublag, may kapin pa ka serioso nga butang nga natukiban. Ang ipot sang ido amo ang ginahalinan sang balatian nga ginatuga sang parasite nga Toxocara canis. Katunga sang mga duog kag mga kahon sang balas nga halampangan sang kabataan sang Paris ang nasapwan nga may yara sing maisog kag diutay katama nga mga itlog sang parasite, nga nagasulod sa balay paagi sa suwelas sang mga sapat kag sa kuko sang sinagod nga mga sapat. Ang presensia sini sa tawo wala ginlauman nga daku. Ang pagkalapyo, pagsakit sang dughan, alerhiya, problema sa tagipusuon kag sa arterya amo ang maaga nga mga sintoma sang balatian.

Nagadiutay ang mga Iglesia

Ang mga katapo sang dalagku nga mga denominasyon sang Protestante padayon nga nagadiutay sa Estados Unidos, suno sa 1990 Yearbook of American and Canadian Churches. Bisan pa ginapakita sang yearbook, nga ginbalhag sang National Council of Churches, nga ang pagdiutay wala pa sa 1 porsiento sa kalabanan nga kaso, nagpadayon ini sugod sang tungatunga sang katuigan 1960. Ang Disciples of Christ, ang Episcopal Church, ang Presbyterian Church (E.U.A.), ang United Church of Christ, ang United Methodist Church, ang Evangelical Lutheran Church sa Amerika, kag ang American Baptist Churches sa E.U.A. nakaeksperiensia tanan sing pagdiutay. Apang, ginlista sang report ang mga Saksi ni Jehova subong isa sang mga relihion nga nagpakita sing pag-uswag sa kadamuon. Ang mga Saksi ni Jehova sa Estados Unidos nag-uswag sing 3 porsiento sang 1989 kag sing 4 porsiento sang 1990.