“May Yara Sila Mabaskog nga Kusog Para sa Kaayuhan”

PAGLIGAD sang mga 40 ka tuig sang paghingabot sa Czechoslovakia, ang mga Saksi ni Jehova makahiwat na sing sirkito nga mga asambleya didto. Ang isa sa Ostrava, sang Mayo 1990, ginreport ni Jiří Muladi sa pamantalaan nga Nová Svoboda (Bag-o nga Kahilwayan). Lakip sa iban nga mga butang sia nagsulat:

“Nahanungod sa mga Tawo nga mga Tawo Gid”

“Sa tatlo ka adlaw antes sang okasyon, mga 90 ka tawo ang nagtipon sa Tatran Hall kag nagtinlo sini sing kapin sa pagtinlo sini sa sulod sang 40 ka tuig. Bisan pa kon madaug ko ang akon kaugalingon, dapat ko isiling ini, nga ang tilipunan subong gid katinlo pagligad sang duha ka adlaw [nga asambleya], wala sing papel ukon upos sang sigarilyo sa salog. Isa pa gali, ang mga Saksi ni Jehova wala nagapanigarilyo.

“Sa nahauna nga adlaw sang sirkito nga asambleya, 1,600 ang nagtambong. . . Nagsugod sila paagi sa pag-amba sang tanan. Madamo nga manugkomposo ang makibot kon daw ano katahom ining mga ambahanon. . . . Ang tanan ginhimo nga wala sing pagpadayawdayaw. Wala sing pagpakilala sa mga mataas sing posisyon. (Busa wala gani ako makahibalo kon sin-o ang may pinakamataas nga ranggo kag hunahunaa lamang wala sing nagasapak sini.) Wala sing pagsaludo ukon pagsinggit sing mga eslogan. Mapainubuson, maluluy-on, kag mahinuklugon.”

Kasayuran Nahanungod sa mga Saksi

“Si Jehova amo ang ngalan sang Dios. Sa Biblia nga Czech, ang iya ngalan ginbadbad (ukon gin-islan) sing ngalan nga Hospodin [Ginuo]. Ang mga Saksi ni Jehova nagainsister sa paggamit sang orihinal nga ngalan sang Dios, kag paagi sa ila mga pagpakig-angot determinado sila sa pagpanaksi nahanungod sa iya pagluntad kag sa iya mga buhat. . . .

“Ang pagtuo sang mga Saksi ni Jehova nagadumili sang paggamit sing mga hinganiban batok sa mga tawo, kag ang mga nangindi sa paghimo sang pamuno nga serbisyo militar kag wala magtrabaho sa mga minahan ginbilanggo bisan sa apat ka tuig.

“Pasad sa sini lamang maathag nga sila may yara mabaskog nga kusog para sa kaayuhan. Sarang magamit ining dimakagod nga mga tawo bisan sa pinakamataas nga mga posisyon sa politika​—apang indi gid naton sila mahaylo sa sini. Ang mga Saksi ni Jehova nagainsister nga ang mga tawo naggahom sang ila kaugalingon sa ila kahalitan lamang. Sa pagkamatuod, ginakilala nila ang awtoridad sang gobierno apang nagapati sila nga ang Ginharian sang Dios lamang ang sangkol sa paglubad sang tanan nga problema sang tawo. Apang bantayi ini​—indi sila mga panatiko. Mga tawo sila nga interesado gid sa katawhan. Kag karon, sarang mo mahunahuna ang bisan ano nga luyag mo tuhoy sa ila.

“P.S. Indi ako isa sang mga Saksi ni Jehova, bisan pa may simpatiya ako sa madamo sang ila mga ideya.”

[Piktyur sa pahina 25]

Asambleya sa Lucerna Hall, Prague, Czechoslovakia