Isa Bala ka Kulto ang mga Saksi ni Jehova?
SI Jesucristo ginsumbong nga palahubog, hakugan, manuglapas sang Adlaw sang Inugpahuway, butig nga saksi, manugpasipala sang Dios, kag mensahero ni Satanas. Ginsumbong man sia subong subersibo.—Mateo 9:34; 11:19; 12:24; 26:65; Juan 8:13; 9:16; 19:12.
Pagkatapos napatay kag ginbanhaw si Jesus, ang iya mga disipulo nangin puntariya man sang mabug-at nga mga panumbungon. Ang isa ka grupo sang unang-siglo nga mga Cristiano ginguyod pakadto sa mga gumalahom sang siudad sang katawhan nga nagasinggit: ‘Ginpabaliskad sini nga mga tawo ang napuy-an nga duta.’ (Binuhatan 17:6) Sang isa pa ka bes si apostol Pablo kag ang iya kaupod nga si Silas gindala sa mga awtoridad kag ginsumbong nga nagatublag sing daku sa siudad sang Filipos.—Binuhatan 16:20.
Sang ulihi ginsumbong si Pablo subong “tawo nga magamo kag manugpatigayon sang mga ribok sa tunga sang tanan nga Judiyo sa bug-os napuy-an nga duta” kag nagatinguha sa “pagdagta sang templo.” (Binuhatan 24:5, 6) Ginlaragway sing husto sang pangunang mga tawo sang mga Judiyo sa Roma ang kahimtangan sang mga sumulunod ni Jesus sang ginbaton nila: “Kay nahanungod sining bunghay nahibaluan namon nga bisan diin ginapakamalain ini.”—Binuhatan 28:22.
Sing maathag, ginkabig sang pila ining bag-ong grupo nga gintukod ni Jesucristo subong isa ka relihiosong grupo nga may dikinaandan nga mga pagtamod kag mga buhat nga supak sa kon ano ang ginbaton sadto nga mga adlaw subong kinaandan nga paggawi sang katilingban. Sa walay duhaduha, madamo sa karon ang mahimo nga nagkabig sang mga Cristiano nga isa ka malaglagon nga kulto. Ang mga manugsumbong masami nga kilala kag respetado nga mga miembro sang komunidad, kag daw naghatag ini sing bug-at sa ila mga panumbungon. Madamo ang nagpati sa mga panumbungon batok kay Jesus kag sa iya mga disipulo. Apang, subong sang ayhan nahibaluan ninyo, ang tagsatagsa sini nga mga panumbungon kabutigan! Ang katunayan nga ginsiling sang mga tawo ini nga mga butang wala nagahimo sini nga matuod.
Ano naman karon? Husto bala patuhuyan ang mga Saksi ni Jehova subong isa ka relihioso nga grupo nga may dikinaandan nga mga pagtamod kag mga buhat nga supak sa kon ano ang ginabaton subong kinaandan nga paggawi sang katilingban? Isa bala ka kulto ang mga Saksi ni Jehova?
Kon Ano ang Ginapakita sang Pamatuod
Ang isa ka opisyal sang gobierno sa siudad sang St. Petersburg, Rusya, nagpaathag: “Ang mga Saksi ni Jehova ginpakilala sa amon subong isa ka sahi sang tago nga sekta nga nagalingkod sa dulom kag nagapamatay sang kabataan kag nagapinatyanay.” Apang, sining karon lang nakilala sing maayo sang mga tawo sa Rusya ang tunay nga kinaiya sang mga Saksi. Pagkatapos makapangabudlay upod sa mga Saksi ni Jehova may kaangtanan sa isa ka internasyonal nga kombension, ini man nga opisyal nagsiling: “Karon nakita ko ang normal, palayuhum nga mga tawo, nga maayo pa sa madamong mga tawo nga nakilala ko. Mahidaiton sila kag kalma, kag nagahigugmaanay gid sila sa isa kag isa.” Sia nagdugang: “Indi ko gid mahangpan kon ngaa ang mga tawo nagasugid sing amo nga mga kabutigan nahanungod sa ila.”
Ang mga Saksi ni Jehova wala nagahiwat sing ritwalistiko nga mga miting, ni nagahimo sing tago sang ila pagsimba. Ang indi Saksi nga awtor nga si Julia Mitchell Corbett nagsiling: “Kon magtipon sila, sa masami sing kapin sa makaisa sa isa ka semana, sa mga Kingdom Hall (ang ila mga duog tilipunan wala ginatawag nga mga simbahan), kalabanan sang ila oras ginahinguyang sa pagtuon kag paghinun-anon sa Biblia.” Ang ila mga duog tilipunan may maathag nga karatula. Ang ila mga miting bukas, kag ang publiko ginaagda sa pagtambong. Lubos nga ginaabiabi ang wala ginapaabot nga mga bisita.
“Natigayon sang mga Saksi ang reputasyon subong bunayag, matinahuron, kag mapisan,” dugang ni Corbett sa iya libro nga Religion in America. Madamo sa indi mga Saksi ang gilayon nga nagabaton nga wala sing butang nga dikinaandan ukon katingalahan tuhoy sa mga Saksi ni Jehova. Ang ila pagginawi wala nagasupak sa kon ano ang ginabaton subong kinaandan nga paggawi sang katilingban. Ang The New Encyclopædia Britannica nagasiling sing husto nga ang mga Saksi “nagasunod sang isa ka mataas nga pagsulundan sa moral sa personal nga paggawi.”
Ang direktor sang mga balita kag sang espesyal nga mga proyekto para sa isa ka estasyon sang telebisyon sa Estados Unidos nagsulat sa mga Saksi ni Jehova sa pagsabat sa isa ka may ginadampigan nga report nahanungod sa mga Saksi sa balita sang telebisyon sa programa nga 60 Minutes. Sia nagsiling: “Kon madamo pa nga mga tawo ang magakabuhi suno sa inyo pagtuo, kuntani indi amo sini ang kahimtangan sini nga pungsod. Isa ako ka manugbalita nga nakahibalo nga ang inyo organisasyon ginapasad sa gugma kag sa malig-on nga pagtuo sa Manunuga. Luyag ko nga mahibaluan ninyo nga indi tanan nga manugbalita may ginadampigan.”
Isa ka Kilala nga Relihion
Makatarunganon bala isiling nga ang mga Saksi ni Jehova isa ka diutay nga panatiko nga relihioso nga grupo? Matuod, ang mga Saksi ni Jehova diutay lamang kon ipaanggid sa iban nga mga relihion. Apang, dumduma kon ano ang ginsiling ni Jesus: “Makitid ang gawang kag masipot ang dalan nga nagapadulong sa kabuhi, kag pila lamang ang nakatultol sa sini.”—Mateo 7:13, 14.
Apang, ang mga Saksi indi isa ka diutay nga panatiko nga kulto. Sang tigpamulak sang 1993, kapin sa 11 milyones ka tawo ang nagtambong sa Memoryal sang kamatayon ni Cristo sang mga Saksi. Apang mas importante sangsa kadamuon nila amo ang ila moral nga kinaiya kag huwaran nga paggawi, nga naghatag sa ila sing bug-os kalibutan nga komendasyon. Sa walay duhaduha amo ini ang isa ka rason nga ginhatagan sila sing opisyal nga pagkilala sang mga pungsod subong nakilal-an, matuod nga relihion.
Talalupangdon ang desisyon sining karon sang European Court of Human Rights. Ginpahayag sini nga dapat matigayon sang mga Saksi ang kahilwayan sang hunahuna, konsiensia, kag relihion kag nga may yara sila kinamatarong sa paghambal nahanungod sa ila pagtuo kag sa pagtudlo sini sa iban. Indi kuntani ini matabo kon ang mga Saksi ni Jehova nakilal-an nga nagagamit sing madayaon kag dimaayo nga mga padugi sa pagpanguha sing mga miembro ukon kon naggamit sila sing nagamaniobra nga mga paagi sa pagkontrol sa hunahuna sang ila mga sumulunod.
Madamo sa palibot sang kalibutan ang nakakilala sing maayo sa mga Saksi ni Jehova. Ginpamangkot namon ang minilyon ka di-Saksi nga nagtuon sang Biblia upod sa mga Saksi ukon nga nakatuon upod sa ila sa lainlain nga tion, May mga panikasog bala nga ginkontrol kamo? Naggamit bala ang mga Saksi sing nagakontrol sa hunahuna nga mga padugi sa inyo? “Wala” ang sa walay duhaduha nga mangin prangka ninyo nga sabat. Sing maathag, kon gingamit ini nga mga paagi, kuntani may yara madamo gid nga mga biktima nga nagasupak sa bisan anong argumento nga pabor sa mga Saksi ni Jehova.
“Nawili sing Bug-os sa Pagbulig sa Katawhan”
Masunson nga ginapain sang mga miembro sang kulto ang ila kaugalingon gikan sa pamilya, mga abyan, kag bisan sa katilingban sa kabilugan. Amo bala sina ang mga Saksi ni Jehova? “Indi ako Saksi ni Jehova,” sulat sang isa ka manugbalita sa Republika sang Czech. Apang sia nagdugang: “Maathag gid nga may yara sila [mga Saksi ni Jehova] daku nga moral nga kusog. . . . Ginakilala nila ang mga awtoridad sang gobierno apang nagapati sila nga ang Ginharian sang Dios lamang ang makasarang sa paglubad sa tanan nga problema sang tawo. Apang talupangda—indi sila mga panatiko. Mga tawo sila nga nawili sing bug-os sa pagbulig sa katawhan.”
Kag wala sila nagakabuhi sa magagmay nga mga komunidad, nagapain sang ila kaugalingon gikan sa mga kaparyentehan kag sa iban pa. Ginakilala sang mga Saksi ni Jehova nga Makasulatanhon nila nga katungdanan ang higugmaon kag atipanon ang ila mga pamilya. Nagakabuhi sila kag nagapangabudlay upod sa katawhan sang tanan nga rasa kag relihion. Kon may mga kalamidad, maabtik sila nga nagahatag sing bulig kag iban pa nga mga buhat sang kaluoy.
Sing mas importante, nagahimo sila sing isa ka programa sang pagpanudlo nga indi matupungan. Pila ka relihion ang may organisado nga sistema sa pagduaw sing personal sa tagsa ka indibiduwal sa ila komunidad? Ginahimo ini sang mga Saksi ni Jehova sa kapin sa 200 ka kadutaan kag sa kapin sa 200 ka lengwahe! Sing maathag, ang mga Saksi ni Jehova “nawili sing bug-os sa katawhan.”
Estrikto nga Pagsunod sa Biblia
Matuod, ang mga panudlo sang mga Saksi ni Jehova tuhay sa ginaaman sang mga simbahan. Ang mga Saksi ni Jehova nagapati nga si Jehova amo ang labing gamhanan nga Dios kag nga si Jesus amo ang iya Anak, indi bahin sang isa ka trinidad nga dios. Ang ila pagtuo malig-on nga naangot sa pagtuo nga ang Ginharian sang Dios lamang ang makahatag sing paumpaw sa nagaantos nga katawhan. Ginapaandaman nila ang katawhan tuhoy sa nagahilapit nga kalaglagan sining malaut nga sistema sang mga butang. Ginabantala nila ang nahanungod sa saad sang Dios nga isa ka dutan-on nga paraiso para sa matinumanon nga katawhan. Wala sila nagasimba sa krus. Wala sila nagasaulog sang Krismas. Nagapati sila nga ang kalag mamalatyon kag nga wala sing kalayuhon nga impierno. Wala sila nagakaon sing dugo, ukon nagabaton sing mga pagtayhon sang dugo. Wala sila nagapasilabot sa politika kag nagaentra sa inaway. Ginpamangkot mo na bala ang imo kaugalingon kon ngaa tuhay gid katama ang mga panudlo sang mga Saksi ni Jehova?
Ang isa ka pamantalaan sa Massachusetts, ang Daily Hampshire Gazette, nagapaathag nga ang “estrikto nga pagpatpat [sang mga Saksi ni Jehova] sa Biblia nagadumili sang madamong mga buhat nga ginapasapayanan sang iban . . . , ang tanan sa panikasog nga mailog ang halimbawa sang unang-siglo nga mga Cristiano kag ang pulong sang Biblia.” Ang The Encyclopedia of Religion nagaugyon nga “ang tanan nga ginapatihan nila ginapasad sa Biblia. ‘Ginapamatud-an [nila] sa teksto’ (kon sayuron, ginahatagan sing biblikanhon nga pagbalikwat sa pagsupurta) ang halos tagsa ka pinamulong sang pagtuo, walay pangduhaduha nga ginabaton ang awtoridad sang Biblia, nga nagailis sing bug-os sang tradisyon.” Ang libro nga Religion in America nagasiling: “Ang grupo wala gid mag-alang-alang sa paghatag sini sing igtalupangod sa pagtuon sa Biblia, kag ang mga panudlo sini ginasakdag sang maathag nga sistema sang mga pagpatuhoy sa kasulatan.”
Sin-o ang Ila Lider?
Bangod sining suod nga pagsunod sa mga panudlo sang Biblia nga ang pagsimba kag pag-idolo sa tawhanon nga mga lider nga amo ang kinaiya sang mga kulto karon indi masapwan sa tunga sang mga Saksi ni Jehova. Ginasikway nila ang ideya sang klero-lego nga kinatuhayan. Ang The Encyclopedia of Religion nagakaigo nga nagasiling nahanungod sa mga Saksi ni Jehova: “Ang klero nga klase kag ang nagapakilala nga mga titulo ginadumilian.”
Ginasunod nila si Jesucristo subong ang ila Lider kag subong ang Ulo sang Cristianong kongregasyon. Si Jesus amo ang nagsiling: “Dili kamo magpatawag nga Rabbi, kay isa lamang ang inyo manunudlo, kag kamo tanan mag-ulutod. Dugang pa, dili kamo magtawag nga amay bisan kay sin-ong tawo sa duta, kay isa lamang ang inyo Amay, ang Isa nga yara sa langit. Dili kamo magpatawag nga ‘mga agalon,’ kay isa lamang ang inyo Agalon, ang Cristo.”—Mateo 23:8-12.
Maathag gid nga ang mga Saksi ni Jehova malayo nga mangin isa ka kulto subong nga si Jesus mangin isa ka hakugan kag palahubog. Matuod, indi tanan sang naimpluwensiahan sang butig nga mga report nahanungod kay Jesus kag sa iya mga disipulo ang nasulay nga pasipalahan sia. Ayhan wala lamang makasayod ang iban. Kon may yara kamo mga pamangkot nahanungod sa mga Saksi ni Jehova kag sa ila mga pagtuluuhan, ngaa indi sila pangilalahon sing maayo pa? Ang mga ganhaan sang ila mga Kingdom Hall bukas para sa tanan nga nagapangita sang kamatuoran.
Makabenepisyo man kamo gikan sa ila mahalungon nga pagpangita sang sibu nga ihibalo sa Biblia kag makatuon kon paano simbahon ang Dios nahisanto sa pinamulong ni Jesus: “Ang takna nagaabot, kag karon amo na, nga ang matuod nga mga manugsimba magasimba sa Amay sa espiritu kag kamatuoran, kay ang Amay nagapangita sing subong nga mga manugsimba sa iya.”—Juan 4:23.