Ano ang Masiling sa Palaabuton?

Ngaa makagalanyat gid ang paghidait sa ulot sang tawo kag sang sapat? Amo sini bangod ang mga tawo gintuga sa ginsuguran agod makighidait sa mga sapat, bisan ang mga ginakilala nga talunon.

Sang gintuga sang Dios ang nahauna nga lalaki kag babayi, ginbutang niya sila sa paraiso nga duog sang duta agod magkalipay sa kabuhi. Katuyuan niya nga sila mag-anak kag pasangkaron ang mga dulunan sadtong orihinal nga Paraiso tubtob malikop sini ang bug-os nga duta. Sa sadtong bug-os nga kasangkaron, ang katawhan magagahom sa mga sapat nga may paghidait.

Ang rekord sang Genesis nagasiling: “Pagahumon sila sa kaisdaan sang dagat kag sa kapispisan sang kalangitan kag sa anta nga mga sapat kag sa bug-os nga duta kag sa tagsa ka butang nga nagagiho sa duta. . . . Sa tapos sadto gintan-aw sang Dios ang tagsa ka butang nga ginhimo niya kag, yari karon! tama gid kaayo.”​—Genesis 1:​26-31; 2:9.

Indi dapat mangin mapintas ining paggahom sa mga sapat. Ang mga tawo kag mga sapat gintuyo nga magkabuhi sing tingob nga may paghidait. Makita ini sa kamatuoran nga sang ang mga sapat nag-agi sa atubangan sang tawo agod hingalanan, wala sia sing armas. Kag wala ginsambit nga ang tawo ukon sapat hinadlukan.​—Genesis 2:​19, 20.

Ang Orihinal nga Katuyuan nga Matuman

Sing makalilipay, inang orihinal nga katuyuan sang Dios tumanon sa indi madugay, kon ang tanan nga gobierno nga ginhimo sang tawo buslan na sang Ginharian sang Dios, nga magagahom gikan sa langit. (Daniel 2:​44; Mateo 6:​9, 10) Kon ang paggahom sang Dios bug-os nga mapasag-uli sa bug-os nga duta, ang orihinal nga katuyuan sang Dios para sa duta kag sa mga tawo kag mga sapat nga pumuluyo sini matuman.

Ang nagapabag-o nga mga epekto sang matarong nga paggahom sang Dios matahom nga ginlaragway sa madamo nga tagna sang Biblia. Halimbawa, talupangda kon ano ang ginsulat ni Isaias sa idalom sang inspirasyon: “Ang lobo magapuyo kaupod sang kordero, kag ang leopardo magaluko kaupod sang kanding nga tinday, kag ang tinday nga baka kag ang leon nga totoy kag ang pinatambok magatingob; kag ang bata magatuytoy sa ila. Kag ang baka kag ang oso magahalab; kag ang tinday nga baka kag ang leon nga totoy kag ang pinatambok magatingob. Kag bisan ang leon magakaon sing dagami kaangay sang baka. Indi sila maghalit ukon maglaglag sang bug-os ko nga bukid nga balaan; kay ang duta matugob gid sang pagkilala kay Jehova subong nga ang mga tubig nagatabon sang dagat.”​—Isaias 11:​6, 7, 9.

Ginapakita man sang iban pa nga tagna ang daku nga paghidait nga magaluntad sa bag-ong kalibutan sang Dios. Tuhoy sini si Miqueas nagtagna: “Salsalon nila nga mga punta sang arado ang ila mga espada kag mga galab nga inughagbas ang ila mga bangkaw. Ang pungsod indi na magbayaw sing espada batok sa pungsod, kag indi na sila magtuon sing inaway. Kag magalingkod gid sila ang tagsa ka tawo sa idalom sang iya ubas kag sa idalom sang iya higuera, kag wala na sing magapahadlok sa ila.”​—Miqueas 4:​3, 4.

Wala na sing talunon nga mga sapat nga magatublag sang paghidait sang katawhan sa amo nga tion, kay ang matagnaon nga pulong sang Dios nagasiling: “Magahimo ako sing katipan sang paghidait sa ila, kag papason ko sa duta ang kasapatan nga malaut, kag magapuyo sila sing malig-on sa kamingawan kag magatulog sa kakahuyan. . . . Kag mangin malig-on sila sa ila duta.”​—Ezequiel 34:​25, 27.

Gani ang paghidait kag paghiusa sa bug-os nga napasag-uli nga Paraiso mangin kompleto. Amo kon ngaa ang kahimtangan didto malaragway sa katapusan nga tulun-an sang Biblia sa sining paagi: “ ‘Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.’ Kag ang Isa nga nagalingkod sa trono nagsiling: ‘Yari karon! ginahimo ko nga bag-o ang tanan nga butang.’ Subong man, sia nagasiling: ‘Isulat ini, kay ining mga pulong matutom kag matuod.’ ”​—Bugna 21:​4, 5.

Huo, matutom kag matuod. Nagakahulugan ini nga masaligan naton ang mga saad sang Dios, kay indi kaangay sang dihimpit nga mga tawo, may gahom sia, kaalam, kag determinasyon sa pagtuman sang iya mga katuyuan. Subong sang ginsiling sang isa sang matutom nga mga alagad sang Dios sang dumaan nga mga tion: “Wala sing isa ka pulong gikan sa tanan nga maayong mga pulong nga ginpamulong sa inyo ni Jehova nga inyo Dios ang napaslawan. Nagmatuod sila tanan para sa inyo. Wala sing isa ka pulong sa ila nga napaslawan.”​—Josue 23:​14; tan-awa man ang Isaias 55:11.

Makasalig man kita nga sa indi madugay, sa bag-ong kalibutan sang Dios, ang iya orihinal nga katuyuan para sa sini nga duta, para sa mga tawo, kag para sa mga sapat matuman. Ang hinatag-sang-Dios nga paghidait magaluntad sa bug-os nga duta. Kag indi lamang magagahom ina nga paghidait sa tunga sang mga tawo kundi ipakita man ini sa duog sang mga sapat.

Ginpasad sa retrato nga sa maayong kabubut-on sang Hartebeesportdam Snake and Animal Park