Watchtower ONLINE NGA LIBRARY
Watchtower
ONLINE NGA LIBRARY
Hiligaynon
  • BIBLIA
  • PUBLIKASYON
  • MITING
  • g91 9/8 p. 16-19
  • Kon Ngaa Makatalagam ang Pornograpiya

Wala ang video nga ginpili mo.

Sorry, may error sa pag-load sang video.

  • Kon Ngaa Makatalagam ang Pornograpiya
  • Magmata!—1991
  • Mga subtitulo
  • Pareho nga Materyal
  • Malain Bala ang Pagpukaw sa Handum?
  • Kon Paano Bungkagon ang Paghugakom Sini
  • Ang Halit nga Tuga sang Pornograpiya
    Magmata!—2003
  • Ngaa Likawan ang Pornograpiya?
    Pamangkot sang mga Pamatan-on
  • Pornograpiya
    Magmata!—2013
  • Pornograpiya—Makahalalit Gid Bala?
    Ang Lalantawan Nagabantala sang Ginharian ni Jehova—2013
Mangita sing Iban Pa
Magmata!—1991
g91 9/8 p. 16-19

Ang Pagtamod sang Biblia

Kon Ngaa Makatalagam ang Pornograpiya

ANG pornograpiya wala na nalimitehan sa balaligyaan lamang sing malaw-ay nga mga balasahon kag sa mga malaw-ay nga mga palaguwaon. Nagguwa na ini sa publiko. Sa lainlain nga pungsod, ginaduldol ini sa mga mata sang kinaandan nga banwahanon sa mga magasin, mga pamantalaan, mga libro, mga programa sa TV, mga pelikula, kag mga video. Makatalagam gid bala ang butang nga subong sina ka lapnag?

Apang, ano ang pornograpiya? Ang pornograpiya ginapaathag subong “ang paglaragway sa panimuot sang gugma (paagi sa mga laragway ukon mga sinulatan) nga gintuyo sa pagpukaw sang gana sa sekso.” Maathag ini. Apang nagautwas ang baisay sa kon ano ang nagapukaw sang gana sa sekso kag kon ano ang wala. Matuod, sa isa ka kasangkaron, yara sa indibiduwal nga nagatan-aw kon ano ang ginakabig niya nga pornograpiya. Kon sa aton pa, ang makapukaw sa sekso para sa isa ka tawo mahimo nga indi para sa lain nga tawo. Walay sapayan, ang pagsurbe kasan-o lang sa 5,000 ka tawo sa Alemanya nagpahayag nga sa isa ka kahimtangan, ang materyal nga may makapukaw sang sekso nga mga talan-awon nagaapektar sa halos tanan, mga lalaki kag mga babayi.

Malain Bala ang Pagpukaw sa Handum?

Ang pagpukaw sa kinaugali nga handum​—kon bisan ano man ini—​indi maalamon kon wala sing paagi sa pagbusog sini sing nagakaigo. Halimbawa, kon wala ang isa sang imo paborito nga mga kalan-on, mahimo nga indi ka makontento kon pirme mo himutaran ang mga laragway sini sa mga magasin ukon mga libro. Sa pihak nga bahin, kon ikaw​—ayhan bangod sang mga rason sa lawas​—wala ginatugutan sa pagkaon sini, ang pirme nga pagpanumdom sini mahimo gid nga magadul-ong sa makatalagam nga paglapas. Subong man, ang isa ka nagapanigarilyo nga nagatinguha sa pag-utod sang bisyo mahimo nga indi magmadinalag-on kon magtan-aw sia sa iban nga nagapanigarilyo.

Tuhoy sa seksuwal nga mga handum, gikan sa pagtamod sang Biblia, ang nagakaigo nga pagbusog sini sa sulod sang mga latid sang mahigugmaon nga pag-asawahay nagaresulta sa kalipay. (1 Corinto 7:​2-5; Hebreo 13:4) Gani daw ano ka dimaalamon para sa diminyo nga tawo nga pukawon ang handum nga indi niya mabusog! Magadul-ong lamang ini sa kapaslawan ukon, malain pa, sa pagbusog sini paagi sa masturbasyon ukon pagpakighilawas, paagi sa amo nagalapas sa balaan nga mga kasuguan kag mga prinsipio.​—1 Tesalonica 4:​3-7.

Nagakahulugan bala ini nga ang pornograpiya indi makatalagam kon minyo ikaw? Indi, ining Makasulatanhon nga mga talaksan sang paggawi naaplikar man sa minyo nga mga tawo. Subong man, ang pornograpiya nagapukaw sang makagod nga mga kailigbon, nagahatag sing paagi sa pagbusog sang personal nga mga handum, samtang ang gugma nasentro sa pagbusog sang kinahanglanon sang imo tiayon. Ang pornograpiya nagadul-ong sa indi mapatugsilingon kag maiyaiyahon nga sekso, nga, bisan sa ulot sang mag-asawa, mangin manubo kag indi mahigugmaon.​—1 Corinto 13:5.

Sa baylo nga lig-unon ang gugma sang mag-asawa, ginapatay ini sang pornograpiya paagi sa pagpanubo sini, pagpatiko sa sini. Ang seksuwal nga relasyon nga ginalaragway sa pornograpiya amo ang labing malain nga sahi sang pantasya bangod nagapaalinton ini sing sayop kag makahalalit nga mga mensahe tuhoy sa pagkasuod sang mag-asawa. Dugang pa, ang matuod nga mga relasyon indi lamang seksuwal; natukod ini sa gugma, paglahugay, komunikasyon, kag sa pag-ulikdanay. Sa pagpatuhay, ang pornograpiya mahimo pa gani mangin bangil sa ulot sang mag-asawa.

Ginapanubo sang pornograpiya ang mga tawo sa nibel sang mga sapat nga nagahulag pasad lamang sa duna. Wala sini ginapalig-on ang pagpugong sa kaugalingon, isa ka bunga sang espiritu sang Dios. (Galacia 5:​22, 23) Mahimo nga magadul-ong ini sa seksuwal nga mga pagpatiko. Pila lamang ini sang mga rason kon ngaa ginalikawan sang mga Cristiano ang pornograpiya.

Busa, ang maalamon nga laygay sang Biblia amo: “Magkalipay sa asawa sang imo pagkapamatan-on . . . Kay ngaa bala ikaw, anak ko, magpabihag sa babayi nga dumuluong ukon maghakos [sing literal ukon paagi sa pornograpiya] sang dughan sang isa ka dumuluong?”​—Hulubaton 5:​15-20.

Apang, paano ang isa ka tawo makalikaw ukon makapalos sa hugakom sang pornograpiya?

Kon Paano Bungkagon ang Paghugakom Sini

Agod mabatuan ang ganyat sang pornograpiya, ang Biblia nagalaygay: “Busa, patya ninyo ang mga bahin sang inyo lawas nga dutan-on kon tuhoy sa pagkamakihilawason, kahigkuan, seksuwal nga gana.” (Colosas 3:5) Diri, ang tinaga nga “patya” maathag nga nagapaalinton sing ideya nga pagpatay​—indi lamang pagpugong—​sang bisan ano nga bahin sang lawas nga magamit sa sina nga mga bisyo.

Apang, dapat ini hangpon sa metaporiko, indi sa pisikal, nga kahulugan. Indi dapat pag-utdon sang mga Cristiano ang ila lawas. Kon ‘patyon’ naton ang dinagakaigo nga seksuwal nga mga panghunahuna, indi kita magpadala sa ganyat sang pornograpiya, sa amo ginagamit ang mga bahin sang aton lawas, subong sang mga mata, sa sayop nga paagi. (Ipaanggid ang Mateo 5:​29, 30.) Bangod sini, ang Biblia nagalaygay, nga buslan ang dinagakaigo nga mga handum sing “bisan anong butang nga matarong, bisan anong butang nga putli,” kag dayon “magpadayon sa pagbinagbinag sining mga butang.”​—Filipos 4:8.

Ano pa ang makabulig? Amo ang pagdumdom​—ayhan pagsaulo pa gani​—sang mga teksto sa Biblia, subong sang masunod:

“Ipalayo ang akon mga mata sa pagtan-aw sing walay pulos.”​—Salmo 119:37.

“Ang tanan nga yara sa kalibutan​—ang kailigbon sang unod kag ang kailigbon sang mga mata . . . indi gikan sa Amay, kundi gikan sa kalibutan.”​—1 Juan 2:16.

“Ang tagsa ka tawo ginasulay kon ginabuyok sia kag ginahaylo sang iya kaugalingon nga kailigbon. Nian ang kailigbon kon nakapanamkon nagapanganak sing sala; kag ang sala kon maggulang nagapamunga sing kamatayon.”​—Santiago 1:​14, 15.

Ang bisan anong butang nga makaumpisa sang paagisod nga reaksion nga nagadul-ong sa kamatayon husto nga matawag nga makatalagam, kag ang pornograpiya bagay sa sina nga paglaragway! Dumduma: “Sia nga nagasab-ug sa iya kaugalingon nga unod magaani sing kaduluntan gikan sa unod, apang sia nga nagasab-ug sa espiritu magaani sing kabuhi nga wala sing katapusan gikan sa espiritu.” Indi pagtuguti ang pornograpiya nga kawaton sa imo ang kabuhi nga wala sing katapusan!​—Galacia 6:8.

[Blurb sa pahina 19]

Sa baylo nga lig-unon ang gugma sang mag-asawa, ginapatay ini sang pornograpiya paagi sa pagpanubo sini, pagpatiko sa sini

    Hiligaynon Publications (1980-2025)
    Mag-log Out
    Mag-log In
    • Hiligaynon
    • I-share
    • Mga preference
    • Copyright © 2025 Watch Tower Bible and Tract Society of Pennsylvania
    • Mga Kasugtanan sa Paggamit
    • Privacy Policy
    • Privacy Settings
    • JW.ORG
    • Mag-log In
    I-share