Ang Pagtamod sang Biblia
Ngaa Tun-an ang Biblia?
ANG pagbasa sa bug-os nga Biblia indi mahapos. Nahimo mo na bala ini sang isa ukon pila ka beses? Madamo ang nagapabugal nga nahimo na nila ini. Ang pagpain sing tion para sa pagbasa sang Biblia dapat ilista malapit sa ibabaw—kon indi numero uno—sa listahan sang importante nga mga butang sa aton kabuhi. Sa ano nga rason? Agod mahibaluan ang sadsaran nga mga kaundan sang pinakalapnag nga libro sa bilog nga maragtas, ang lamang nga libro nga may kinamatarong nga mangangkon nga inspirado sang Dios.—2 Timoteo 3:16.
Apang, kapin pa sa pagbasa lamang sang Biblia kag paghibalo sang dalagku nga mga punto sini ang mahimo sang isa ka tawo. Handum mo bala nga pahamut-an ang Dios kag agumon ang bug-os nga benepisyo sang mga panudlo sinang balaan nga libro? Nian tumana ang laygay ni apostol Pablo sa pamatan-on nga si Timoteo: “Padayon ka sa pagbasa sang kasulatan sa dayag, sa pagpangwali, sa pagpanudlo. Painuinuhi ining mga butang; ukuri sila, agod nga ang imo pag-uswag makita sang tanan. Andami ang imo kaugalingon kag ang imo panudlo. Magpadayon sa sini, kay paagi sa paghimo sini maluwas mo ang imo kaugalingon kag yadtong nagapamati sa imo.”—1 Timoteo 4:13, 15, 16.
Inang sahi sang pagpamalandong sa mga panudlo sang Biblia kag ang pagkaukod sa sini nagalakip sang labaw sa pagbasa lamang sang mga Kasulatan. Ang pagbasa sang Biblia wala nagagarantiya nga magamit sing nagakaigo sang isa ka tawo ang impormasyon nga natigayon, subong nga ang pagbasa sang libro tuhoy sa utok sang tawo wala nagakalipikar sa iya nga mangin manugbusbos sa utok. Gani, pamatii ang dugang nga laygay ni Pablo kay Timoteo: “Magtinguha sing maayo gid sa pagpakita sang imo kaugalingon sa Dios subong nga pinakamaayo, manugpangabudlay nga indi kinahanglan magkahuya, nga nagagamit sing matadlong sang pulong sang kamatuoran.”—2 Timoteo 2:15.
Nagabukas sing Masangkad nga Paghangop
Ang lantip nga paggamit sang Pulong sang Dios nagakinahanglan sing pagtuon. Kon mahalungon nga ginatun-an sang isa ka tawo ang Biblia, ginabinagbinag ang ginasiling sini, ginahangop ang kahulugan sini, ginabasa ang konteksto sini, ginahangop ang maragtas sini, nian ang wala ginapaabot nga paghangop sini mahimo nga magabukas sa iya. Sia karon personal nga nagabenepisyo gikan sa Pulong sang Dios.
Binagbinagon naton ang isa ka halimbawa nga nagapakita nga sa pagbasa lamang sang Kasulatan, mahimo nga indi naton mahangpan ang kahulugan sang ginasiling luwas kon basahon naton ang konteksto. Sa Binuhatan 17:11 mabasa naton ang tuhoy sa katawhan sang isa ka Griego nga siudad sang Berea, nahamtang indi malayo sa Tesalonica: “Karon ining mga Judiyo labi pa ka dungganon sang sa didto sa Tesalonica, kay ginbaton nila ang pulong sing hanuot, nga ginausisa ang mga kasulatan adlaw-adlaw kon bala ining mga butang matuod.”
Sa una nga pagtamod mahimo ihinakop naton nga ang mga Cristiano sa Berea mas palatuon sang sa mga taga-Tesalonica. Apang talupangda nga sa bersikulo 10 sang kapitulo 17 sang Mga Binuhatan si Pablo kag si Silas sang ila pag-abot sa Berea nagkadto “sa sinagoga sang mga Judiyo” agod magbantala sang Pulong sang Dios. Kag ang bersikulo 12 nagasiling nga “madamo sa ila ang nangin mga tumuluo.” Ining bersikulo nagabulig sa aton sa paghimo sing tuhay nga konklusyon. Ang balaan nga kasaysayan nagasugid sa aton nga indi ang mga Cristiano ang ginapaanggid sa isa kag isa sa sining duha ka siudad, kundi, sa baylo, amo ang mga Judiyo didto.
Dugang pa, natalupangdan mo bala kon ano ang naghimo sa mga taga-Berea nga mas dungganon sa kinaiya? Gin-usisa nila sing makugihon ang mga Kasulatan. Si Propesor Archibald Thomas Robertson, sang nagkomento sa sining mga pulong sa libro nga Word Pictures in the New Testament, nagsulat: “Sa adlaw-adlaw ginpaathag sing maayo ni Pablo ang Kasulatan sa ila kasubong sang ginhimo niya sa Tesalonica, apang sa baylo nga mamatok sa iya pagpaathag, ila gin-usisa (ang anakrinō nagakahulugan sing bug-os nga pag-usisa, mahalungon kag sibu nga pagpanalawsaw subong sang ginahimo sa isa ka kaso sa korte . . . ) ang Kasulatan para sa ila kaugalingon.” Ang ila pag-usisa indi hapaw. Mahalungon nga nag-usisa ang taga-Berea nga mga Judiyo agod pamatud-an kon bala matuod ang gintudlo ni Pablo kag ni Silas gikan sa Kasulatan nga si Jesus amo ang madugay na ginsaad nga Mesias.
Gani, sa pagsunod sa halimbawa sang dumaan nga mga taga-Berea, importante nga indi lamang nga basahon naton ang Pulong sang Dios kundi dapat tun-an ini—‘mahalungon nga usisaon ang mga Kasulatan’—agod makuha ang kahulugan sang ginasiling sini. Sa amo nga paagi mapadalom naton ang aton paghangop sa Biblia, kag kita man, mangin kasubong ni Timoteo, nga isa nga ‘makasarang sa pagluwas sa aton kaugalingon kag sa sadtong nagapamati sa aton.’ Ngaa? Bangod, dugang sa pagbasa sa Kasulatan, ginatun-an naton ini agod makapanghikot nga masinulundon sa kon ano ang aton natun-an.—Hulubaton 3:1-6.
Tuburan sang Matuod nga mga Talaksan kag Tagna
Binagbinagon pa naton ang duha ka rason nga tun-an ang Biblia. Ang Biblia amo ang nagapanguna sa tanan nga mga libro sa pag-aman sing mga talaksan sa moralidad kag paggawi. Madamo na nga tinuig ang nagligad, ang isa ka Amerikano nga manunudlo nagsiling sini: “Nagapati ako nga ang ihibalo sa Biblia nga wala sing kurso sa kolehiyo mas bilidhon sang sa isa ka kurso sa kolehiyo nga wala sing Biblia.” Agod ang ihibalo sa Biblia mangin isa ka bahandi sa imo, dapat nga ang motibo mo sa pagtuon sang Kasulatan amo ang pag-aplikar sang mga sugo kag panudlo sini sa imo matag-adlaw nga pagkabuhi agod magahimo ini sa imo nga mas maayo nga tawo, ‘isa nga nagagamit sing matadlong sang pulong sang kamatuoran.’—2 Timoteo 2:15; Hulubaton 2:1-22.
Dugang pa, masapwan mo sa mga pinanid sini ang inspirado sang Dios nga mga tagna nga natuman na sa maragtas kag ang iban pa nagakatuman karon sa aton siglo. Ang pagtuon sang mga tagna sang Biblia nagabulig sa isa ka tawo nga mahangpan ang kahulugan sang mga kahimtangan sa kalibutan karon—ang mga inaway, gutom, pagkabungkag sang pamilya, kasingki, kag krimen—kag kon paano malikawan ang masiod sang kabalaka bangod sini. (Lucas 21:10, 11, 25-28) Sa amo, nasanagan kita sang mga sabat sang Dios sa mga problema sa karon, mga sabat nga nagapakita kon sa diin na kita sa lakat sang panahon kag kon paano kita magmadinalag-on sa pagplano para sa palaabuton. Inang mga sabat nagadangat sa aton paagi sa ‘matutom kag mainandamon nga ulipon’ nga klase, nga nagagamit sang Watchtower Society subong ang iya ahensia sa pagbalhag.—Mateo 24:45-47; 2 Pedro 1:19.
Ang Salmo 119:105 nagasiling: “Ang imo pulong suga sa akon mga tiil, kag kapawa sa akon mga dalanon.” Gani, ang mga tawo nga masunson nga nagatuon sang pulong sang kaalam nga makita sa Biblia kag nagaaplikar sini mangin upod sa mga tawo nga makahangop sang kabubut-on kag katuyuan sang Dios, kag, sa kamatuoran, may nasanagan nga banas nga nagatuytoy sang ila matag-adlaw nga pagkabuhi sa mabudlay nga kahimtangan sang moralidad sa karon.