Pamangkot sang mga Pamatan-on . . .

Paano Ko Sia Matapna sa Pagtublag sa Akon?

SI Jose isa ka kilala nga pamatan-on. Mapisan, masaligan, kag maambong, nagustuhan sia sang bisan sin-o nga nakaupod niya. Ang problema amo nga, ang asawa sang iya nga agalon naluyag sa iya. Ang iya maganyaton nga pagpulupasiplat kapin kag kapin nga nangin makahason; kag ang iya kiatan nga panghuluhambal kapin kag kapin nga nangin masupog.

Gintinguhaan ni Jose nga indi pagsapakon ang iya mga pagpasapding-sapding, apang isa ka adlaw samtang nagatrabaho, nasapwan niya nga sila na lamang nga duha ang nabilin. Iya gid ginpadihot yadto; nga dapat wala gid sing tawo sa palibot sa sulod sang mga oras. Antes mamulalungan ni Jose ang nagakatabo, ginahaylo na sia sang babayi kag ginapangabay nga maghulid sa iya!​—Genesis 39:​7-12.

Ining matuod nga eksperiensia natabo mga 3,500 ka tuig na ang nagligad. Apang ang kaangay nga mga hitabo nagakatabo karon sa tagsa ka adlaw sa eskwelahan kag sa mga ulubrahan. Samtang ang media masami nagasugid tuhoy sa mga paghimulos sa mga babayi, ang masami nga mapasapayanan amo ang problema sang seksuwal nga paghimulos sa mga huben nga mga lalaki.a Bangod sang sobra nga pagpadaku sang moderno nga sosiedad sa sekso kag sang pagtamod nga tupong ang mga babayi sa mga lalaki, upod ang nagausmod nga moral kag sosyal nga talaksan, indi katingalahan nga madamo sa mga lalaki ang nagasugid nga nangin tulumuron sila sang romantiko nga pag-atake sang mga babayi.

Ngaa Ako Pa?

Ang Biblia nagasiling: “Ang himaya sang pamatan-on nga mga lalaki amo ang ila kusog.” (Hulubaton 20:29) Ang kaambong sang pamatan-on, kag ang iya katinlo sa moral kag mga Cristianong pagginawi, mahimo mangin makagalanyat sa mga babayi. Ang iban nagahunahuna pa nga ang pagguba sa pagkatinlo sang pamatan-on nga Cristiano isa ka makawiwili nga hangkat.

Nian yara pa ang impluwensia sang moderno nga sosiedad. Tinangkas nga mga libro kag artikulo ang ginasulat agod buligan ang mga babayi sa pagkuha sang atension sang mga lalaki. Ang mga magasin para sa pamatan-on nagasugo sa mga babayi nga indi mahuya sa pagpakiat. Ang magasin nga Seventeen nagsiling: “Ang pagpakiat isa ka daku nga paagi sa pagpahibalo sa isa ka tawo nga ikaw . . . naganyat sa iya. . . . Makadul-ong ini sa pag-abyanay kag pagluyagay.” Ang talaksan nga tuga sang mga media kag ang nagapangibabaw imoral nga panimuot nagapahuyang sang moral nga kabakod sang mga pamatan-on nga lalaki. Ang manunulat nga si Kathy McCoy nagsulat: “Ang sosiedad sa kabilugan kag ang mga ginikanan kag mga katubotubo ilabi na matinuguton sa seksuwal nga mga kahimuan sang mga pamatan-on nga lalaki. Ang iban nga mga eksperto nagapati nga ang mga pamatan-on nga lalaki nagatigayon sing wala ginabungat nga pagpalig-on . . . nga mangin aktibo sa sekso.”

Walay sapayan, ang Dios nagalaygay sa mga pamatan-on nga magpabilin nga putli. “Kay ini amo ang kabubut-on sang Dios, ang inyo pagkabalaan, nga maglikaw kamo sa pagpakighilawas.” (1 Tesalonica 4:3) Indi mo dapat pagtugutan ang mga impluwensia sining kalibutan nga magpatalang sa imo! Ano kon amo ang himuon mo kon ganyaton ka sang isa ka babayi?

Kon Ngaa Mabudlay Mamatok

Samtang ang mga lalaki masami nga nagadaug sa mga babayi nga nagapamatok sa ila romantiko nga pagtinguha, malaka nga ang mga babayi nagadaug sa sini nga kaso. Ngaa, nian, tuman ka budlay para sa isa ka pamatan-on nga lalaki nga pamatukan ang isa ka agresibo nga babayi?

Ang isa ka rason amo nga ‘ang tagipusuon tuman ka malimbungon.’ (Jeremias 17:9) Subong sang ginbaton sang isa ka lalaki nga pamatan-on nga si Wayne: “Masami mo ginapangita ina nga atension. Nagapagsik ka kon mahibal-an mo nga ang isa interesado sa imo. Daw isa ini ka pagdayaw.” Kon sa bagay, kinaandan lamang ang malipay kon hatagan ka sang isa ka babayi sing atension. Apang maghalong ka! Mahimo nga gamiton sang imo malalangon nga tagipusuon inang natural nga huyog agod lutuson ang imo nahibaluan nga husto. (Santiago 1:​14, 15) Kag antes mo matalupangdan, mahimo nga dalhon ikaw ‘kaangay sang baka nga ginatuytuyan sa ilihawan’!​—Hulubaton 7:22.

Sa amo ang Hulubaton nagapaandam sa mga huben nga lalaki nga magbantay “batok sa malum-ok nga dila sang imoral nga babayi. Indi paghanduma ang iya katahom sa imo tagipusuon, kag indi magpadaug sa iya mailigbon nga mga mata.” (Hulubaton 6:​24, 25) Ang sekreto, kon amo, amo ang pagpugong sa imo tagipusuon kag mga kailigbon. (1 Tesalonica 4:​4-6) Makatukod ka lamang sing makakombinsi kag epektibo nga pagpangapin, kon kombinsido gid ikaw nga ang seksuwal nga imoralidad wala sing mahatag kundi amo ang “dalan padulong sa Sheol,” ukon kamatayon.​—Hulubaton 7:27.b

Pag-atubang sa Pag-ipit

“Masupog ang mga babayi; nagabalikbalik sila,” reklamo sang isa ka pamatan-on nga lalaki. “Ginadayaw ka nila sa masami kag nagapang-into.” Madugay na nga ginagamit sang agresibo nga mga babayi subong armas ang pagpang-into. Madali ka bala madala sa sini? (Hulubaton 26:28) “Ang kaalam yara sa mga maugdang,” siling sang Hulubaton 11:​2, gani kon may maugdang ka nga pagkilala sa imo kaugalingon, indi ka madali nga madala sa wala sing pulos nga pagpang-into.

Apang ano ang isiling mo kon dayawon sang babayi ang imo buhok, panglawason, kag ang imo yuhum? Ayhan wala ini sing malain nga motibo. Gani agod indi maguwa nga suplado, simple nga ginapasalamatan sang iban nga pamatan-on ang babayi kag dayon ginabag-o ang topiko. Pero mag-andam nga magpakita sang impresyon nga nagustuhan mo ang iya pang-into.

Kon kaisa kinahanglan nga mangin estrikto ka. Ang iban prangka nga nagahambal. Sa amo nga paagi malikawan nila nga maglawig pa ang indi na maayo nga kahimtangan. “Wala ako sing plano nga mangita sing nobya sa karon” amo ang diretso nga sabat sang pamatan-on nga si Daniel.

Ginasiling nga ang pinakamaayo nga panagang amo ang pag-atake. Ang isa ka mananalawsaw naghatag sini nga panugda: “Agod nga paluyahon sia sing permanente, magsugilanon ka tuhoy sa relihion.” Huo, kon kilala ka nga pirme nga nagasugilanon tuhoy sa imo relihioso nga pagpati, malayo nga ikaw ang hingabuton. Apang kon may yara gid man mangahas nga magpalapit sa imo, ang diretso nga pagsugid sang imo relihioso nga pagpati mahimo magpugong sa iya.

Makapasubo nga kon kaisa ang Cristiano nga mga pamatan-on nagakapaslawan sa paggamit sini nga panagang. Ang pamatan-on nga si Tim nagsiling: “Madamo sa amon ang indi maluyag magsiling nga, ‘Cristiano ako, kag indi ko man luyag nga himuon ini.’ Luyag namon nga batunon man kami sang iban.” Sa liwat, makatigayon lamang ikaw sing kasidla kag kaisog nga kinahanglanon agod malikawan ang kapahamakan sa moralidad kon kombinsido gid ikaw nga ang dalanon ni Jehova amo ang labing maayo.

Paglikaw sa Tugalbong!

Ano kon, walay sapayan sang imo lakas nga panikasog, padayon gihapon ang panghaylo? Bueno, binagbinaga sa liwat ang huwaran sang pamatan-on nga ginsambit sa pamuno​—si Jose. Ang Genesis 39:6 nagasugid sa aton nga “nagtubo sia nga may maayo sing panglawason kag maambong” kag naganyat sa iya ang asawa sang iya agalon nga si Potipar. Ginhimo niya ang tanan agod nga maganyat niya sia. Kag ang Biblia wala nagapakita nga malaw-ay sia sa panulok ni Jose. Apang ginpamatukan niya ang iya kasupog. Paano niya nahimo yadto?

Una, may mabakod gid nga pagtuo si Jose. “Paano ko mahimo ining dakung kalautan kag magpakasala sa Dios?” siling niya. Bisan pa wala sing kasuguan batok sa sekso sa guwa sang pag-asawahay sadto, ang iya konsiensia nagsiling sa iya nga isa ka sala ang luyag nga himuon sang asawa ni Potipar. Apang sa gihapon, nagpamilit gid sia. Kag sa kaugot ginbuyutan niya ang iya panapton kag nagpakiluoy sa iya: “Huliri ako!” Wala naglahoglahog si Jose agod pakanayon ang kahimtangan ukon ginlaygayan niya sia tuhoy sa moralidad. Sa gilayon “ginbiyaan niya ang iya panapton sa iya kamot kag nalagyo sia.”​—Genesis 39:​9-12.

Nakahulag sa gilayon si Jose bangod indi na sia kinahanglan magdesisyon kon ano ang himuon. Human na ang iya desisyon. Ginpili niya nga antuson ang mangin resulta sang kaakig sang asawa ni Potipar sa baylo nga pasubuon si Jehova. Kag masakit ang resulta; ginbilanggo si Jose! Apang ginpakamaayo ni Jehova ang iya panikasog nga magpabilin nga matinlo. Sang ulihi nangin panguna sia nga miembro sang ginharian ni Paraon kag nahiusa liwat gikan sa iya madugay na nahamulag nga pamilya.

Ang imo panikasog nga magpabilin nga “di-salabdungon kag walay-kasawayan sa tunga sining tiko kag balingag nga kaliwatan” pakamaayuhon man ni Jehova. (Filipos 2:15) Walay sapayan kon ano man ang mangin una nga kahimtangan, ang husto nga dalanon magaresulta pirme sa pagpakamaayo. Apang kinahanglan nga mangin determinado ka sa pagpabilin nga matinlo kaangay ni Jose. Kinahanglan nga mangin mabakod kag tayuyon ka sa imo mga panikasog, nagahimo sang imo ‘Indi nga Indi.’ (Mateo 5:37) Kinahanglan nga mangin handa ka kag maluyag magpaambit sang imo napasad sa Biblia nga pagpati. Kon himuon mo ini, bisan ang pinakamasupog nga babayi makahangop sa imo​—kag mahimo mag-untat sa pagtublag sa imo!

[Footnote]

Naluyagan sang pila ka mga lalaki ining pagbag-o sang kahimtangan; nagahabok sila bangod sa atension sang mga babayi sa ila. Walay sapayan, ang Cristianong mga pamatan-on nagasunod sa talaksan sang Biblia sa seksuwal nga moralidad. Indi nila luyag nga matublag sang imoral nga handum sang masupog nga mga babayi. Ang pamangkot, Paano nila malikawan ini nga pangganyat?

[Piktyur sa pahina 19]

Ano ang imo reaksion sa imoral romantiko nga mga hulag?