Ang Pagtamod sang Biblia

Ginapakamalaut Bala sang Dios ang Paggamit sing Alkohol?

‘INDI pagkahangaw-i ang cocaine, ang heroina, ang LSD, kag ang marijuana​—ang alkohol amo gihapon ang pinakadaku nga problema nga dapat awayon sang sosiedad. Ang alkohol ginabangdan sang mas madamo nga kamatayon kag sosyal nga kalaglagan sang sa paggamit sang tanan nga iban nga sahi sang droga.’ Amo sini ang mga pagtamod nga ginpabutyag sa ika-31 nga kombension sang World’s Woman’s Christian Temperance Union sa Canada nga ginahiwat sa kada tatlo ka tuig mga duha ka tuig na ang nagligad.

Nakita sini nga mga delegado sa nagadugang nga pagkonsumo sing alkohol sa bug-os nga kalibutan ang makahalawhaw nga bili sini sa kabuhi kag panglawas sang tawo, subong man sa minilyon ka dolyar nga gastuhon sang gobierno nasyonal kada tuig sa pagsumpo sang alkoholismo. Nagapati nga ginapakamalaut sang Dios ang paggamit sini, madamo nga maalam nga mga tawo ang nagainsister nga idumili ang tanan nga makahulubog nga ilimnon. Apang ginasakdag bala sang Biblia ini nga pagtamod?

Ang Paggamit sang Alak sa Biblia

Madugay na ang nagligad ang Dios nagsaad sa iya matinumanon nga katawhan: “Ang imo tambubo pun-on sing kabuganaan; kag ang imo linasan magaawas sang bag-o nga alak.” (Hulubaton 3:10) Huo, sia ang Isa nga naghatag sa aton sing mabungahon nga ubas, kag nag-aman sing maaslom nga buwa nga nagakulap sa ubas samtang nagahilapit ini sa tion sa paghimo sing alak.

Ang proseso sa paghimo sing maayo nga alak ginpaathag sa bahin sang manalagna sang Dios nga si Isaias. Nagahanduraw sing abanse sang mga pagpakamaayo sang nagapadulong nga bag-ong kalibutan sang pagkamatarong, si Isaias nagsulat: “Si Jehova sang mga kasuldadusan magahimo sa tanan nga tawo . . . sang piesta sang mga alak nga tinago sa labud . . . sang mga alak nga tinago sa labud, nga ginpatin-aw sing maayo.” (Isaias 25:6) Ang mga eksperiensiado nga manughimo sing alak nakahibalo nga ang alak nga “tinago sa labud,” nga wala gintandog sa malawig nga tion sang pagpaaslom, amat-amat nga nagatin-aw nga nagapanamit sang iya nga kahamot kag sabor.

Kalipay kag mga Benepisyo sa Ikaayong Lawas?

Ginpaathag sang Dios ang kalipay kag mga benepisyo sa ikaayong lawas nga makuha gikan sa alak. Ang iya manalagna nga si Jotam naghambal tuhoy sa “bag-o nga alak nga nagapalipay sa Dios kag sa mga tawo.” (Hukom 9:13) Si Hari Solomon nagsulat nga ‘nalipay ang iya unod sang alak.’ (Manugwali 2:3) Kag sa bantog nga kasaysayan tuhoy sa sinalusalo sang kasal sa Cana, si Jesus, sa iya una nga milagro, naghimo sing madamo nga tubig nga “pinakamaayo nga alak,” sa kalipay sang mga bisita sa kasal.​—Juan 2:​6, 7, 10, The New English Bible.

Ang pagkilala ni Jesus sa medikal nga kapuslanan sang alak maathag sa iya ilustrasyon tuhoy sa mainabyanon nga Samariahanon. Sa tapos mahigtan ang pilas sang tawo, ginbubuan sang mainabyanon nga Samariahanon sing “lana kag alak” ang iya mga pilas. (Lucas 10:​30-34) Ang rekomendasyon ni apostol Pablo sa pamatan-on nga si Timoteo sa ‘paggamit sing diutay nga alak sa iya tiyan nga amo sa masami ang iya balatian’ nagahisanto sa moderno nga pagkilala sa kabilihanan sang alak sa medikal kag pagdieta.​—1 Timoteo 5:23.

Si Dr. Salvatore P. Lucia, anay propesor sang University of California School of Medicine, nagsiling sa iya libro nga Wine and Your Well-Being nga ang “alak indi lamang ang pinakadaan nga alkoholiko nga ilimnon kundi amo ang pinakaimportante nga bulong nga padayon nga ginausar sa bug-os nga maragtas sang tawo.” Kag ang mananalawsaw sa nutrisyon nga si Janet McDonald nagsiling nga ang pag-inom sing alak sa haganhagan nga kadamuon katulad ka epektibo sa haganhagan nga pangpakanay, pangpagana, kag makabulig sa pagtunaw kag pagsalupsop sang mga mineral sa pagkaon.

Kinahanglan ang Paghaganhagan kag ang Pagpugong sa Kaugalingon

Apang, walay sapayan sang paborable nga mga pagpatuhoy sa alak kag makahulubog nga ilimnon sa Biblia kag sekular nga medisina, ang pag-abuso sa alkohol nagtuga sing terible nga kailo sa madamo nga tawo. Nagahimo bala ini sa Dios nga balasulon sa tanan nga trahedya nga resulta sang pag-abuso sa alkohol? Sa kabaliskaran, sa iya Pulong ang Biblia, naghatag sia sing maathag nga mga panuytoy nahanungod sa paggamit kag pag-abuso sa alak.

Binagbinaga, halimbawa, ang masunod mabaskog nga paandam batok sa pag-abuso sa sini nga dulot: “Dili ka magsimpon sa mga palainom sing alak, sa mga mahakug magkaon sang unod.” Sing pat-od, wala ini nagakahulugan nga ang nagakaon lamang sang utan kag ang wala nagainom sing alak ang kalahamut-an sa Dios, ukon ang teksto nagapakamalaut sa mga nagainom sing diutay nga alak ukon nagakaon sing haganhagan nga karne.” Sa baylo, ang Biblia nagapaandam batok sa sobra nga pagpatuyang sa pagkaon kag pag-inom. Maathag ini subong ginapakita pa sang isa ka hulubaton: “Sin-o bala ang may kailo? Sin-o bala ang may kasubo? Sin-o bala ang may kasuayon? Sin-o bala ang may pagyamo? Sin-o bala ang may pilas sa walay kabangdanan? Sin-o ang may pagpalamula sing mata? Yadtong nagapadugay sa alak.”​—Hulubaton 23:​20, 29, 30.

Ang mga manunulat sang Biblia nga sanday apostol Pablo kag Pedro naglaygay sang paghaganhagan paagi sa paglaygay sa unang mga Cristiano nga maglikaw sa “pagpasobra sa alak” kag indi “magpahubog sa alak.” Ini nga laygay dapat nga batunon sing serioso, subong sang ginpaandam sang apostol: ‘Ang mga palahubog indi makapanubli sang Ginharian sang Dios.’ Sa iban nga pulong, ang mga palahubog sing alkoholiko nga ilimnon wala ginakahamut-an sang Dios kag indi makatigayon sing kabuhi nga dayon.​—1 Pedro 4:​3; Efeso 5:​18; 1 Corinto 6:​9, 10.

Sa amo, kon ang indibiduwal kulang sing pagpugong sa kaugalingon sa paggamit sing alkohol, dapat nga likawan nila ini sing lubos. (Ipaanggid ang Mateo 5:​29, 30.) Luwas sa pisikal nga halit, ang dugang nga pagkagiyan sa alkohol magaresulta sa malala nga halit sa espirituwal. Sa amo, ang Dios maalamon nga nagapaandam sa aton batok sa sobra nga pagpatuyang sa alkoholiko nga mga ilimnon.

Kabaliskaran sa pagtamod sang nagadumili, ang Biblia wala nagasugo, ukon nagapakita, sing bug-os nga paglikaw sa alak ukon alkoholiko nga ilimnon sa tanan nga tawo. (Deutoronomio 14:26) Tuhoy kay Jehova ang salmista nagsiling: “Ginpatubo niya ang mga hilamon para sa kahayupan, kag ang gamhon sa pag-alagad sa tawo, agod nga makapaguwa sia sing kalan-on gikan sa duta, kag ang alak nga nagapasadya sang tagipusuon sang tawo. Sa pagkamatuod, ginhatag sang Dios ang alak para sa maayo kag dungganon nga katuyuan, kon imnon sing nagakaigo​—Salmo 104:​14, 15.

[Piktyur sa pahina 26]

L’ Absinthe by Edgar Degas, 1877

[Credit Line]

​—E.R.L./Sipa Icono