Indi Bala Madula ang Pagpamatibati?

Mahimo nga sila sekreto nga nagapamati sa inyo mga paghambalanay.

Mahimo nga nahibaluan nila ang iban sang inyo mga sekreto. May plano bala kamo sa masunod nga talipuspusan sang semana? Mahimo nga nahibaluan na nila ini. Sin-o sila? Sila ang mga tawo nga mahuyugon sa pagpamati sa mga paghambalanay sa mga telepono nga wala sing kurdon. Kon luyag nila, mahimo sila makatipig sing nasulat nga rekord sang mga impormasyon subong sang numero sang inyo credit card, kon sa diin kamo nagatrabaho, kag sang inyo suweldo. Sa kamatuoran, sa masami may libro sila nga sa diin ginasulod nila ang mga ngalan sang mga tawo nga regular nga nagagamit sing mga telepono nga wala sing kurdon.

Mahimo nga kilala ninyo sila ukon indi. Mahimo nga pila lamang ka balay ukon mga milya ang kalayuon nila gikan sa inyo. Sa kalabanan nga pungsod, ini nga huyog indi batok sa kasuguan, kag madali himuon.a

Paagi sa pila ka gatos ka dolyar, ang isa makabakal sing scanner nga radyo kag iangot ini sa isa ka antena sa guwa. Ang scanner makapulot sing mga sinyales gikan sa masangkad nga kasangkaron sang wala sing kurdon nga mga kasangkapan para sa komunikasyon. Ang iban nga mga mahuyugon nagapasulabi sa paggamit sing madaladala nga mga scanner. Bangod sang kamag-anon kag kadiutayon sini, mahapos ini dalhon sa paglagawlagaw sa palibot kag mamati.

Kon maayo ang panahon, ang operator sang isa ka scanner sarang makapamati sa paging system sang isa ka malapit nga ospital, sang paghambalanay sa radyo sang departamento sang pulisiya, kag sang hambalanay sa balay paagi sa intercom system. Kon wala sing kurdon nga mga mikropono ang ginagamit, subong sang salida sa pila ka teatro, ang mga sinyales mahapos nga mapulot sang scanner. Ang iban nga mga mahuyugon nasangkapan sa pagpamati sa mga paghambalanay gikan sa 100 kilometros nga kalayuon!

Ano ang imo mahimo agod punggan ining mga mahuyugon sa pagpamati sang inyo pribado nga paghambalanay paagi sa ila scanner? Diutay lamang ang imo mahimo kon pirme mo ginagamit ang imo wala sing kurdon nga telepono. Sa pagkamatuod, may yara malahalon nga mga kasangkapan nga makapagamo sang mga tawag sa telepono. Apang dapat nga ikaw kag ang mga tawo nga imo ginatawgan may yara sini nga kasangkapan.

Apang, may isa ka butang nga sarang mo mahimo. Kon ang inyo ginahambalan kompidensial, indi maggamit sing wala sing kurdon nga mga kasangkapan subong sang wala sing kurdon nga mga telepono. Kag pat-ura nga ang imo kahambal nagahimo man sini nga paghalong. Kay kon indi, ang inyo mga sekreto magalutaw sa hangin, nagahulat lamang sa bisan sin-o nga mamati.

Ang isa ka butang nga indi mo mahimo amo ang pagdingot sang ila huyog. Bisan pa pabudlayan mo sila sa pagpamatibati sa imo, madali sila makakita sing iban. Tubtob ang mga tawo padayon nga nagabakal sing wala sing kurdon nga mga kasangkapan kag nagapakighambal sa iban paagi sa sini, maayo man ukon malain, ang huyog sa pagpamatibati indi madula!

[Footnote]