Pamangkot sang mga Pamatan-on . . .

Paano Ako May Kaisog nga Mangin Tuhay?

“Kon kaisa ang pag-ipit sang mga katubotubo nagapahimo sa akon sang ginahunahuna ko nga malain, apang bangod ginahimo ini sang akon mga katubotubo, ginahimo ko na lang ini.”​—John.

“ANG pag-ipit sang mga katubotubo nagahilabot sang tagsa ka bahin sang aton kabuhi.” Amo sina ang ginsiling sang manunulat nga si Lesley Jane Nonkin. Ang mga katubotubo nagatinguha sa pagdikta kon paano ka mamayo. Sila ang nagahatag sang sulundan sa kon paano ka maglakat, maghambal, kag maghusay sang imo buhok. Wala ginatugot ang kaugalingon nga kinaiya. Mag-ugyon​—ukon sikwayon!

Apang, ang mga Cristianong pamatan-on indi ulipon sang pag-ugyon. Nagasunod sang sulundan nga ginhatag ni Jesus sa Juan 15:​19, “dili [sila] bahin sang kalibutan” sang mga didiosnon.a Apang makahalangkat gid ang mangin sa kalibutan apang indi bahin sini. Kaangay ini sang pagbugsay sa isa ka sakayan sa mabalud nga dagat. Yara ikaw sa tubig kag ginapalibutan sang tubig, apang agod mabuhi ginatinguhaan mo nga indi magsulod ang tubig sa imo sakayan! Sa kaanggid, ang mga pamatan-on sa tunga sang mga Saksi ni Jehova nagapanikasog nga indi pagpasudlon sa ila kabuhi ang pagkadidiosnon sang kalibutan.

Apang, indi ini pirme mahapos. Binagbinaga ang isa ka lamharon nga Saksi sa Hapon nga si Eiichiro. Ang pag-ipit nga mag-ugyon tuman ka kusog sa sinang pungsod, sa tunga sang mga pamatan-on subong man sang mga hamtong. Si Eiichiro nagasugid: “Sa eskwelahan indi ako makapakigbahin sa mga seremonya may kaangtanan sa pungsudnon nga mga simbulo kag mga ambahanon. Dugang pa, indi ako sarang makatuon sang martial arts, kay supak ini sa mga prinsipio sang Biblia.” (Tan-awa ang Exodo 20:​4, 5 kag Lucas 4:​8; Isaias 2:4 kag Lucas 10:27.) Naghimo ini kay Eiichiro nga madali makita​—ayhan sing tuman ka makahuluya—​sa tunga sang iya mga katubotubo.

Ang Saksi nga mga pamatan-on sa kalibutan nagaatubang sang kaanggid nga kahimtangan. “Ang mga selebrasyon amo ang pinakamabudlay,” siling sang isa ka Cristianong pamatan-on. “Ang tanan nagapamangkot, ‘Ngaa wala kamo nagasaulog?’ ” Para sa isa ka tin-edyer nga babayi ang pinakamabudlay amo ang “kon bala mag-date sa mga lalaki.” Ang isa pa ka Cristianong tin-edyer nagayamo tuhoy sa mga pag-ipit nga makigbahin sa sosyal nga mga pagtinipon. Siling niya: “Pirme sila nagapamangkot sa imo, ‘Indi ka bala magkadto sa party?’ ” Ang iban nga Saksi nga mga pamatan-on gin-uligyat bangod sang indi pag-absent sa mga klase ukon pagkodigo sa mga pasinawan. Mahapos mahangpan, nian, nga ang mangin tuhay nagakinahanglan sing daku nga kaisog, kag indi tanan nga pamatan-on ang nagabatyag nga sila may kaisog.

Ang isa ka pamatan-on nagsulat: “Duha ang akon kabuhi​—isa sa eskwelahan kag isa sa balay. Sa eskwelahan nagaupud-upod ako sa kalibutanon nga mga kabataan. Apang nagapamuyayaw sila halos kada hambal nila, kag nangin kaangay gid nila ako. Ano ang dapat ko himuon?” Ang sabat maathag: Magpakaisog nga mangin tuhay! Apang paano?

Ang Tuburan sang Matuod nga Kaisog

Ang kaisog amo ang mental ukon moral nga kusog sa pagbatu sa katalagman, kahadlok, ukon kabudlayan. Wala ini ginapanag-iyahan sang tanan, apang sarang ini matigayon. “Ang Dios wala maghatag sa aton sang espiritu sang katalaw,” siling ni apostol Pablo, “kundi sang gahom kag gugma kag kaligdong sang hunahuna.” (2 Timoteo 1:7) Huo, ang Dios sarang makahatag sa imo sang kusog nga ginakinahanglan agod may kaisog sa imo mga katubotubo.​—Filipos 4:13.

Apang paano mo matigayon ining gahom? Ang isa ka paagi amo lamang ang pagpangabay sini. “Pangayo kag magabaton kamo,” saad ni Jesus sa Juan 16:24. Dapat ka mangamuyo labi na kon ginaatubang sing pagsulay nga magkompromiso. “Nagapangamuyo ako kay Jehova nga mapunggan ko ang akon hunahuna kag tagipusuon,” siling sang isa ka Cristianong pamatan-on.

Maisog nga mga Pamatan-on sang Unang Panahon

Ang pagbasa kag pagpamalandong sa mga sugilanon sang Biblia nga nagasugid nahanungod sa maisog nga mga alagad sang Dios isa pa ka paagi sa pagbulig sa imo nga mapalambo ang pagkawalay kahadlok. Halimbawa, nahuya ka bala sa pagsugid sa iban nga isa ikaw ka Saksi ni Jehova? Nian tun-i ang sugilanon sa 2 Hari 5:​1-5. Nagasugid ini tuhoy sa isa ka ginkidnap nga Israelinhon nga bata nga babayi nga maisog nga nagsugid sang iya pagtuo sa iban. Ang isa pa ka makakulunyag nga sugilanon ginrekord sa Binuhatan 4:20. Didto masidla nga ginsingganan sang mga apostoles ang mga nagapamatok: “Kami indi makahimo kundi magpamulong sang amon nakita kag nabatian.” Ang pagtuon sa sining mga sugilanon magapapagsik sa imo sa pagpakita sang amo man nga kasidla sa paghambal.

Ang isa pa ka makakulunyag nga sugilanon amo ang tuhoy kay Daniel kag sa iya tatlo ka tin-edyer nga kaupdanan, nga sanday Sadrac, Mesac, kag Abednego. Kaupod sila sang madamong dungganon nga pamatan-on nga ginbihag kag gindala sa Babilonia. Nahunahuna sang hari sang Babilonia nga hanason sila para sa mabug-at nga mga posisyon sa gobierno. Agod mahangpan nila ang pangabuhi sa Babilonia, ginkuha sa mga pamatan-on ang ila Judiyong mga ngalan kag gintudluan sang hambal kag mga paagi sang Babilonia. Gintinguhaan pa gid sang mga nagbihag sa ila nga pahilayuon sila gikan sa Judiyong kinabatasan paagi sa pagpakaon sa ila sang “manamit nga pagkaon sang hari.”​—Daniel 1:​7, 8.

Para sa mga taga-Babilonia, manamit ini nga kalan-on. Sa mga mahinadlukon sa Dios nga Judiyo, ang pagkaon sang Babilonia makangilil-ad sing relihioso. Apang, ang kalabanan sa mga bihag nga pamatan-on nasulay​—ang tanan luwas kay Daniel kag sa iya kaupdanan. Handurawa ang pag-ipit nga natigayon nila gikan sa ila Judiyong mga katubotubo! Ano ang ila reaksion sa sining mga pag-ipit? Basaha ang makapabakud-pagtuo nga sugilanon sa Daniel kapitulo 1. Ayhan magabulig ini sa imo nga mangin maisog sa pagpangindi kon may magtanyag sa imo sang ilegal nga droga ukon alkohol!

“Magpakaisog”

Indi bastante ang magbasa lamang nahanungod sa kaisog. Agod mapalambo ang kaisog nga magabulig sa imo sa pagbatu sa pag-ipit sang katubotubo, dapat mo sundon sa adlaw-adlaw ang laygay nga ginhatag ni Pablo sa mga lalaki kag mga babayi sa kongregasyon sang Corinto: “Maglig-on sa pagtuo; magpakaisog kag magpakabakud.”​—1 Corinto 16:​13, The Jerusalem Bible.

Halimbawa, kon indi ka makita sang imo mga ginikanan kag sang mga katapo sang Cristianong kongregasyon, ginabayluhan mo bala ang imo bayo kag estilo sang buhok agod mangin nagakabagay sa kalibutanon nga mga pamatan-on? Ukon malig-on ka bala nga nagasunod sa Cristianong mga pagsulundan? “Wala ko ginasunod ang tagsa ka estilo nga nagaguwa,” siling sang isa ka maisog nga Cristianong babayi.

Isa pa ka pamangkot: Maisog gid bala ikaw sa pagsugid sa imo mga kabutho nga isa ikaw ka Saksi ni Jehova? Kon ginatugot sang imo eskwelahan nga himuon mo ini, ginadala mo bala ang imo Biblia kag literatura sa Biblia? Kon hambalan sa klase ang isyu may kaangtanan sa ebolusyon, patriotiko nga mga seremonya, ukon pagpatayhon sang dugo, ‘ginaapinan [mo bala] ang paglaum nga yara sa imo sa kay bisan sin-o nga magpamangkot sa imo’? (1 Pedro 3:15) Ukon mahipos ka lang bala nga nagalingkod sing dimahim-os? Siling ni Jesucristo: ‘Ang bisan sin-o nga magkahuya sa akon kag sang akon mga pulong, magakahuya man ako sa iya.’​—Marcos 8:38.

Sing dimahuluy-on, ang isa ka maisog nga Cristiano nagapabugal nahanungod sa iya napasad sa Biblia nga paglaum! (Ipaanggid ang Hebreo 3:6.) Si Eiichiro, ang Hapon nga pamatan-on nga ginsambit kaina, nakatuon sa paghimo sina. Masunson sia ginapamangkot kon ngaa wala sia nagaentra sa patriotiko nga mga seremonya ukon martial arts. Disbentaha bala ang mangin tuhay? “Indi,” siling niya, “gintamod ko ini tanan subong isa ka hangkat. Ti, dapat ako maghanda sing mga sabat sa pagpangapin sang akon ginahimo kag magsalig sa bulig ni Jehova. Gani sang ulihi, ang mga disbentaha nangin mga bentaha.”

Magtuon man sa paghambal kon ginaatubang sang pagsulay. Ang Hulubaton 1:​10-15 nagasiling: “Anak ko, kon ang mga makasasala maghaylo sa imo, indi ka magpasugot. Kon magsiling sila: ‘Upod sa amon . . .’ anak ko, dili ka maglakat sa dalan upod sa ila. Punggi ang imo mga tiil gikan sa ila banas.” Sa pagkamatuod, wala ini nagakahulugan nga magawali ka. Sa iya libro nga How to Say No and Keep Your Friends, ang manuglaygay nga si Sharon Scott nagasiling nga kon kaisa mahimo ka lamang maglakat, mangindi sa imbitasyon​—ukon indi lamang magsapak sini. Apang kon kaisa, diutay lamang ang imo mapilian kundi ang maghambal kag magsugid sa iban kon ngaa indi ka makabuylog sa ila. Ginarekomendar sang manuglaygay nga si Scott nga magmalig-on ka: “Indi maghipos . . . Magtulok sa mata. . . . Maghambal sa malig-on kag matawhay nga tingog.”

Mahimo gihapon nga sunlugon ukon yagutaon ka bangod sang imo tindog. Apang, madamo ang may kahisa nga magadayaw sa imo. Si Mike, isa pa ka tin-edyer, nagsiling: “Madamo ang nakahibalo nga isa ako ka Saksi, kag ginatahod nila ako. Kon may hambalan sila nga malain, magasiling sila, ‘Mike, masugod na kami, gani kon luyag mo maglakat, lakat ka na.’ ” Indi tanan nga pamatan-on magahatag sa imo sina nga pagtahod. Apang ang Dios pat-od gid nga mahamuot sa imo ginahimo. (1 Pedro 4:​3-6) Busa ang isa ka Cristianong pamatan-on nagsiling: “Indi magpalibog kon ano ang pagahunahunaon sang iban sa imo!” Ang opinyon sang Dios ang importante. Kag pakamaayuhon niya ikaw tungod sang imo kaisog nga mangin tuhay.

[Mga footnote]

[Piktyur sa pahina 15]

Kon may kahigayunan nga mapaathag mo ang imo pagtuo, nagahambal ka bala?