Pamangkot sang mga Pamatan-on . . .

Ginasabat Bala sang Dios ang Akon mga Pangamuyo?

“KINAHANGLAN ko mahibaluan kon bala ginasabat ni Jehova ang akon mga pangamuyo,” siling sang 11-anyos nga si Sandra, “bangod indi ako sigurado kon nagasabat sia. Nahibaluan ko ang madamong iban pa nga mga pamatan-on nga may amo man nga problema.” Ang 15-anyos nga si Alyssa may amo man sini anay nga problema nahanungod sa pangamuyo. “Masami ko ginabatyag nga nagapakigsugilanon ako sa akon kaugalingon,” pagbaton niya.

Suno sa 1988 nga surbey sang Gallup, 87 porsiento sang mga tin-edyer sa Estados Unidos ang nangamuyo sa mga pila ka tion, apang wala pa sa katunga ang nagapangamuyo sing tayuyon. Mahimo nga ang iban nagabatyag nga ang ila mga pangamuyo wala gid man ginasabat. Kon kaisa, mahimo ka man magbatyag nga wala sing isa nga nagapamati sa imo mga pangamuyo. Apang, ang Biblia nagapasalig sa aton nga kon ang isa nagapangamuyo sing hanuot sa pagtuo, ang “Nagapamati sang pangamuyo” nagapamati! (Salmo 65:2) Apang paano mo nahibaluan nga indi lamang sia isa ka wala nagasapak nga manugpamati​—matinahuron nga nagapamati apang diutay lamang ukon wala gid sing ginahimo bilang sabat?

Pagkatapos makapanawag sa Dios nga Nagapamati sang pangamuyo, ang salmista nagsiling: “Paagi sa mga makakulugmat nga mga butang magasabat ka sa amon sa pagkamatarong, O Dios sang amon kaluwasan.” (Salmo 65:​5; ipaanggid ang Salmo 66:​19, 20) Ngaa, nian, nagabatyag ang iban nga ang ila mga pangamuyo wala ginasabat?

Mga Balabag sa Pangamuyo

Ang rason mahimo nga amo ang kakulang sing matuod nga kaangtanan upod sa Dios. Ang iban nga mga pamatan-on nagapangduhaduha sang iya mismo pagluntad. Ang iban nagatuo apang nagatamod sa iya subong malayo kag dimaathag nga persona. Ang pangamuyo ginahimo kon kinahanglan lamang​—ang katapusan nga himuon kon yara sa makahaladlok nga mga emerhensia. “Nagatuo ako sa Dios,” siling sang isa ka Katoliko nga pamatan-on. “Kon ako may problema, kon ako nagakinahanglan sing bulig, pirme ako nagapangayo sang Iya bulig.” Ang isa pa ka pamatan-on prangka nga nagsiling: “Kon kaisa nagapangamuyo lamang ako kon may butang nga ginakinahanglan ko gid.”

Apang, ang pangamuyo dapat nga isa ka pagpabutyag sang pagtuo, pagtahod, debosyon, kag pagsalig​—indi lamang bangod sang pagkawalay paglaum ukon makagod nga handum. Kag indi bastante ang mangamuyo bangod ginahunahuna mo nga basi nagaluntad ang Dios. “Ang nagapalapit sa Dios,” siling sang Biblia, “kinahanglan magtuo nga amo sia kag nga sia manugbalus sa mga nagapangita sa iya.” (Hebreo 11:6) Ang mga pangamuyo sang mga nagapangduhaduha wala ginasabat. (Santiago 1:​6-8) Si Jehova nagapamati sa mga nakakilala kag nagahigugma sa iya; wala sila nagatigana sang pangamuyo para sa mga emerhensia. Subong sang ginalaygay sang 1 Tesalonica 5:​17, “nagapangamuyo [sila] sa walay untat,” ukon subong sang pagbadbad sini sang An American Translation, “wala [sila] nagauntat sa pagpangamuyo.”

Masubo isiling, ang iban nga mga Cristianong pamatan-on nakakilala kay Jehova apang wala gid magpalambo sang pagpakig-abyan sa iya. (Salmo 25:14) Ang ila mga pangamuyo diutay kag malaka katama, indi personal, kag sang ulihi wala ginsabat. Matuod man bala ini sa imo mga pangamuyo? Kon amo, “magpalapit sa Dios” paagi sa pagkilala sa iya. (Santiago 4:8) Ang dalagita nga si Alyssa, nga ginsambit kaina, may mga pangduhaduha nahanungod kay Jehova. Apang ang isa ka personal nga pagtuon sa Biblia amat-amat nga nagpanas sang iya mga pangduhaduha kag nagbulig sa iya nga mapalambo ang isa ka kaangtanan upod sa Dios.

Ang panimuot kag paggawi sang isa mahimo man nga mangin isa ka daku nga balabag sa pangamuyo. Ang salmista nagsiling: “Kon ginapalabi ko ang kalautan sa akon tagipusuon, si Jehova indi magpamati.” (Salmo 66:​18; Hulubaton 15:29) Makatarunganon bala ang magpaabot nga pagasabton sang Dios ang imo mga pangamuyo kon nagahimo ka sang mga butang nga nagapaakig sa iya​—kon ikaw nagadroga, nagasigarilyo, nagapamati sa malaw-ay nga musika, ukon nagahimo sing seksuwal nga imoralidad? Pat-od gid nga indi. Busa ginasikway ni Jehova ang mga pangamuyo sadtong nagakabuhi sing doble-kara, salimpapaw nga ‘nagalikom kon sin-o gid sila.’ (Salmo 26:4) Nagapamati lamang sia sa isa nga “nagagawi sing matarong kag nagahikot sing pagkamatarong kag nagapamulong sing kamatuoran sa iya tagipusuon.” (Salmo 15:​1, 2) Gani kon nagabatyag ka nga daw nagapakigsugilanon sa imo kaugalingon kon mangamuyo ka, usisaa sing maayo ang imo kabuhi. Ayhan kinahanglan nga maghimo ka sang pila ka mga pagbalhin.

Mga Abuso sa Pangamuyo

Ano nga sahi sang mga butang ang mahimo mo nga ipangabay sa Dios? Si Jesus nagapasalig sa aton: “Kon magpangayo kamo sing bisan anong butang sa Amay ihatag niya ini sa inyo sa akon ngalan.” (Juan 16:23) Inang makagalanyat nga tinaga​—bisan anong butang! Tunay bala nga ang Dios handa sa pagtuman sang tanan nga ginasugo mo kaangay sang isa ka genie? Ihatag bala niya ang tanan nga ginapangabay mo, bisan ang indi gid man importante? Ginpamulong ni Jesus ang iya pinamulong mga pila ka oras lamang antes sang iya masakit nga kamatayon. Pat-od gid nga wala niya ginahunahuna ang binuang nga mga butang! Busa ang Santiago 4:3 nagapaandam batok sa pag-abuso sa pangamuyo. Ini nagasiling: “Nagapangayo kamo, kag wala makabaton, bangod nga malaut ang inyo pagpangayo, agod nga mahinguyang ninyo sa inyo mga kahidlaw sa unodnon nga kalipayan.”

Madamo sa karon ang nagaabuso sang pribilehiyo sa pagpangamuyo. Ang isa ka team sang basketball sa eskwelahan nagaluhod sa tunga sang court kag nagapangadi pagkatapos sang tagsa ka hampang. Apang nagahunahuna gid bala ikaw nga ang Dios isa ka humalangad sang basketball ukon nga magpaubos sia agod magpasilabot sa isa ka paindis-indis nga hampang? (Ipaanggid ang Galacia 5:26.) Ukon paano ang tuhoy sa babayi nga nagapangamuyo kuno sing sapatos? “Kon kaisa ang balaligyaan sang sapatos mahimo nga may isa na lamang ukon duha ka paris nga nabilin sa akon kadakuon,” siling niya, “kag kon wala ako sing kuwarta sa sina nga tion, mangayo ako sa Dios agod pat-uron nga pagbalik ko may yara sini.” Ti, isa ka butang ang mangamuyo bangod sa pagkinahanglan​—kag lain naman ang magpaabot nga Dios ang magapamalaklon para sa imo.

Sa kaanggid, indi nagakaigo​—kag walay pulos—​ang ipangamuyo sa Dios nga luwason ka sa silot ukon disiplina nga nagakabagay sa imo. (Hebreo 12:​7, 8, 11) Ukon nga magamadinalag-on ka nga ipangabay sa Dios nga hatagan ka sing mataas nga marka sa isa ka pasinawan diin diutay lamang ukon wala ka gid sing ginhimo nga paghanda.​—Ipaanggid ang Galacia 6:7.

Mga Pangamuyo “Suno sa Iya Kabubut-on”

Si apostol Juan nagapaathag sang isa ka importante nga punto nahanungod sa pangamuyo: “Ini amo ang pagsalig naton sa iya, nga kon magpangayo kita sing bisan anong butang suno sa iya kabubut-on nagapamati sia sa aton.” (1 Juan 5:14) Ang modelo nga pangamuyo (Pangamuyo sang Ginuo) ni Jesus nagailustrar sang pila ka mga butang nga mahimo ilakip sa sina nga pangamuyo. Nangamuyo sia para (1) pakabalaanon ang ngalan sang Dios, (2) magkari ang Ginharian sang Dios, (3) pagahimuon ang kabubut-on sang Dios, (4) pagaihatag ang pisikal kag espirituwal nga mga kinahanglanon, kag (5) buligan sa paglikaw sa mga siod ni Satanas.​—Mateo 6:​9-13.

Sa sulod sining balayan may madamong nagakaigo nga mga tema para sa pangamuyo. Sa pagkamatuod, ang 1 Pedro 5:7 nagalaygay sa mga Cristiano nga ‘itugyan ang ila tanan nga kabalaka sa Dios, kay sia nagakabalaka sa ila.’ Nagakahulugan ina nga nagakaigo ipangamuyo ang halos tanan nga bahin sang aton kabuhi. Dapat ka bala maghimo sing desisyon, subong sang pagpili sang imo kurso sa eskwelahan? Mangamuyo para sa balaan nga kaalam. (Santiago 1:5) Nakahimo ka bala sing pila ka binuang nga sayop? Nian mangayo sing kapatawaran sang Dios.​—Isaias 55:​7; 1 Juan 1:9.

Apang dapat ka magpanghikot nahisuno sa imo pangamuyo. Binagbinaga ang pamatan-on nga si Clint. Nangin bug-os tion sia nga ebanghelisador pagkagradwar sa hayskul. Mga binulan nga wala sia makakita sing isa nga interesado sa pagtuon sa Biblia. Gani ginpangamuyo niya ini. Walay sapayan, wala sia maghulat nga milagruso nga makakita sia sing isa ka pagtuon sa Biblia nga walay pagpanikasog. Mapisan sia nga nagpadayon sa pagpanuktok sa mga ganhaan, kag sang ulihi nakakita sia sing madamo nga tawo nga handa magtuon sa Biblia.

Kon Paano ang Dios Nagasabat

Kon kaisa ang buhat mismo sang pangamuyo mabuligon. Ang pamatan-on nga si Sandy nagapakigsumpong sa problema tuhoy sa masturbasyon. Nagasiling sia: “Ang pagpangamuyo kag pagpanawag kay Jehova nakabulig sa akon bangod nakahibalo ako nga sa tapos ako makapangayo sa iya nga buligan ako nga indi mag-masturbate, dapat nga indi ko ini paghimuon.”

Apang, kon kaisa, daw ginamaniobra sang Dios ang mga hitabo sa pagsabat sa mga pangamuyo. Kinahanglan anay sang pamatan-on nga si Ken nga makakadto sa Kingdom Hall sang mga Saksi ni Jehova agod mahatag ang isa ka malip-ot nga pamulongpulong sa Biblia nga gintangdo sa iya. Sing masubo, wala sing isa nga makapasakay sa iya. Ginpangamuyo niya ini sing hanuot. Pagligad sang mga pila ka minuto ang iya magulang nga babayi, nga talagsa lang nagaduaw, nag-abot. Bisan pa indi interesado sa iya relihion, ginpasakay niya sia. Isa bala ka direkta nga sabat sa iya pangamuyo? Ayhan. Sa bisan ano nga hitabo, nagakaigo pirme pasalamatan ang Dios kon ang mga butang mahanabo sa kaayuhan naton. Si Pablo nagalaygay: “Magpasalamat sa tagsa ka butang.”​—1 Tesalonica 5:18.

Apang, indi magpaabot nga sabton sang Dios ang imo mga pangamuyo sa pila ka dramatiko nga paagi. Ni dapat mo hangpon ang tagsa ka diutay nga butang nga nagakatabo sa imo subong pagpadayag sang balaan nga kabubut-on. Ang aton mga pangamuyo masami ginasabat sa indi direkta nga paagi: May nabasa ka sa Biblia ukon literatura sa Biblia; ang ginikanan ukon masigka Cristiano nagahatag sa imo sing maligdong nga laygay. Matuod, mahimo nga kinahanglan ang paghantop agod mapat-od kon ano gid ang kabubut-on sang Dios para sa imo. Ang mga butang masami ginalubad sa husto nga tion.

Huo, tion! Indi magpaabot nga ang Dios magahatag sing sabat kon san-o nga ginabatyag mo nga dapat sia maghatag. “Maayo nga ang tawo maglaum kag maghulat sing hipos sang kaluwasan ni Jehova,” sulat ni Jeremias. (Panalabiton 3:26) Dugang pa, wala ginagarantiya sa imo nga makabaton ka sing sabat sa naluyagan mo. Si apostol Pablo tatlo ka beses nga nagpangabay sa Dios nga kuhaon ang problema nga gintawag niya “ungon sa unod.” Ang sabat sang Dios amo ang indi. (2 Corinto 12:​7-9) Apang, wala madula ni Pablo ang iya apresasyon para sa dulot sang pangamuyo kundi nagpadayon sa pag-alagad kay Jehova. Sia amo ang nagsulat: “Padayon kamo sing malig-on sa pangamuyo.” (Colosas 4:2) Gani “padayon kamo sa pagpangayo, . . . padayon kamo sa pagpangita, kag . . . padayon kamo sa pagpanuktok.” (Mateo 7:7) Labi ka nga magasuod sa Dios paagi sa paghimo sini, kag mahimo nga mabaton gid ninyo ang mga sabat sa inyo mga pangamuyo.

[Mga piktyur sa pahina 12]

Ang mga pangamuyo indi dapat maglakip sang indi importante nga mga pangabay para sa materyal nga mga luyag