Gikan sa Amon mga Bumalasa
Mga Bangigay sa Korte Subong isa ka abogado nga nadalahig sa mga bangigay tuhoy sa child custody kag sa dugo, indi ko mapabutyag kon daw ano ka daku nga pagpalig-on ang natigayon ko gikan sa artikulo nga “Jehovah’s Witnesses ‘Delivered Up to Local Courts.’ ” (Septiembre 22, 1992, Awake) Sining nagligad nga semana, ginhatagan sang pila ka doktor sing dugo ang isa ka Saksi walay sapayan sang espesipiko nga instruksion batok sa sini. Ginakangil-aran ang subong sina ka walay kahanuklog nga pagsikway sa sadsaran nga relihioso kag personal nga mga kinamatarong. Ang inyo artikulo nagpalig-on sa akon sing dugang pa nga padayunon ang pagpakig-away!
P. P., Estados Unidos
Mga Babayi—Takus Tahuron Salamat sa serye nga “Women—Deserving of Respect.” (Hulyo 8, 1992, Awake) Nakabulig ini sa akon sa paghangop nga ang pagpasapayan sa mga babayi indi isa ka problema sa isa lamang ka komunidad, kundi nagakatabo sa madamo nga pungsod. Ginapasalamatan ko man ang mga panugda tuhoy sa paglikaw sa seksuwal nga pagsalakay.
S. A., Nigeria
Gin-apresyar ko ang pagkaprangka sining mga artikulo. Ang inyo mga panugda magatiklod sa madamo nga tawo, lalaki kag babayi, nga binagbinagon liwat ang ila mga panimuot. Salamat sa paathag kon paano ginatamod ni Jehova ang mga babayi.
J. P. L., Canada
Ginabatyag ko gid nga ang mga babayi ginpasag-uli sa ila matarong nga posisyon kag gintamod sing nagakadapat. Kabay nga apresyahon man sang Cristianong mga lalaki ining mga artikulo agod nga, kon kinahanglanon, mahimo nga pasibuon nila ang ila pagtamod sa mga babayi. Sinsero nga tahuron namon sila sing dugang pa kon himuon nila ini.
E. S., Pransya
Ang mga artikulo naghatag sa amon sing pahanugot nga magbatyag sing mas maayo nahanungod sa amon kaugalingon kag ipakita nga ang mga lalaki may salabton nga makig-angot sing mahidaiton kag matinahuron sa amon. Sa banta ko maisugon gid ini nga mga artikulo, kag ginaapresyar sing daku.
A. H., Estados Unidos
Nakahibi ako sa paghibalo nga bahin ako sang isa ka organisasyon nga nagahupot sing malig-on nga tindog tuhoy sa pagtratar sa mga babayi. Amo ini ang una nga mga artikulo nga nakita ko nga wala maghatag sing bisan anong pangatarungan nga magamit sang abusado nga mga lalaki subong balibad.
E. M., Estados Unidos
Nahibaluan ko nga ining impormasyon tuhoy sa pagtamod sang mga lalaki sa mga babayi indi magabag-o sang kalibutan, apang makapaumpaw gid ang makabasa sing maminatud-on, makalipay, maluluy-on, kag mahinangpanon nga mga pulong, bangod si Jehova nagaulikid gid gali sa amon.
H. Q., Estados Unidos
Naapektuhan gid ako sang mga artikulo—indi nga ginpatumbayaan ko ang akon asawa, kundi sigurado ako nga kapin pa ang mahimo ko agod buligan sia. Daku ang pagtahod ko sa iya kag ginabatyag ko nga ang mga artikulo magabulig sa tanan nga Cristianong bana sa pagkilala sing dugang pa sang bili sang amon asawa. Takus sila tahuron, padunggan, higugmaon, kag hangpon sang ila mga bana.
S. S., Brazil
Kamatayon Ang inyo isyu tuhoy sa “Kon ang Isa ka Hinigugma Mapatay” (Hulyo 22, 1992, Awake!) nagtandog sang akon tagipusuon. Sang adlaw gid nga nabaton namon ini, napatay ang akon 16 anyos nga bayaw nga lalaki bangod sang kanser. Ang mga artikulo isa gid ka pagpalig-on sa tion sang kasubo. Ang amon mga abyan kag pamilya nag-abot agod magbulig sa amon paagi sa pag-aman sing pagkaon, paglipay, kag bulig sa paghimo sang mga kahimusan para sa lubong. Nagaaman gid si Jehova sing paglipay paagi sa sibu sa tion nga mga artikulo kaangay sini.
C. C., Estados Unidos