Gikan sa Amon mga Bumalasa

Uniberso Salamat gid sa inyo makapulukaw sing hunahuna nga impormasyon sa serye “Unlocking the Secrets of the Universe.” (Marso 22, 1992 Awake!) Apang gikan sa anong awtoridad nga nagasiling kita nga ang mga red giant, pulsar, kag black hole mga hugna sa kabuhi [kag kamatayon] sang mga bituon? Ang Isaias 40:​26 nagasiling tuhoy sa mga bituon nga “wala sang isa nga nakulang.”

E. W., Sierra Leone

Ini nga teksto sa Biblia wala nagahambal kon bala may makahalapay nga katapusan ang mga bituon. Sa baylo, ginapadaku sini ang dimatungkad nga kaalam sang Dios. Subong Manunuga, nahibaluan sang Dios ang kahimtangan sang tagsa ka bituon. Wala sing isa “nga nakulang” para sa iya. (Tan-awa “Ang Lalantawan sang Septiembre 15, 1989, pahina 31.)​—ED.

Gugma sang mga Pamatan-on Madamo gid nga salamat sa artikulo nga “Pamangkot sang mga Pamatan-on . . . Ano ang Malain sa Pag-estoryahanay?” (Agosto 8, 1992) Nagasulatay kami sang isa ka pamatan-on nga lalaki sa amon kongregasyon. Nagahambalanay man kami sa telepono. Apang sanglit pareho kami nga indi pa handa sa pagminyo, namat-od na kami nga mag-untat sa pag-uyang sang madamo nga tion sa pag-estoryahanay. Nalipay gid ako sa pagbasa nga nakahimo kami sing husto nga desisyon.

M. N., Japan

Kasubong bala nga daw nabasa ninyo ang akon hunahuna! Serioso na ako nga nakapamat-od nga magsulatay sa pila ka pamatan-on nga lalaki. Ayhan gindayaan ko lang ang akon kaugalingon sa paghunahuna nga ining mga sulat para lamang sa pagpalig-on sa ila. Husto gid sa tion ang pag-abot sang inyo artikulo.

D. B., Estados Unidos

Dose anyos ako kag nagasulat sa madamo nga tawo. Isa sa ila amo ang isa ka pamatan-on nga lalaki. Wala ako maghunahuna nga matubuan ako sing romantiko nga balatyagon sa iya, apang isa ka adlaw nagsulat sia kag nagsiling nga ginahigugma niya ako! Ang inyo artikulo nag-abot sa husto gid nga tion!

E. V., Estados Unidos

Artraytis Ang inyo artikulo nga “Pagtuon sa Pagkabuhi nga May Artraytis” (Hunyo 8, 1992) ginbasa ko nga may daku nga interes. Apang subong isa nga nagaantos sa artraytis, masiling ko nga wala sini mapakita sing lubos ang halit nga matuga sini nga balatian paagi sa iya lainlain nga mga epekto; kahuol, ngutngot, kalapyo, indi makatulog sing maayo, kag kapung-aw. Ginpakita ninyo ang larawan sang isa ka baldado nga mga kamot nga subong bala amo ini ang pinakagrabe nga sahi sang artraytis. Ang kitaon nga mga kasablagan indi amo ang lamang nga butang nga dapat namon atubangon. Ang akon natuo nga gusok naglubyok pasulod sa natuo nga tul-an sang akon balikawang, kag bangod wala sing isa ang makakita sa kasablagan, wala ini ginasapak sang mga tawo. Ginpalig-on kami sang inyo artikulo nga magpalambo sing “positibo nga panimuot,” Apang kon kaisa mabudlay ini himuon kon wala ang pagsakdag sang iban.

M. J., Estados Unidos

Ginaapresyar namon ining prangka nga mga komento. Ang amon malip-ot nga artikulo matuod nga limitado sa kasangkaron. Dugang pa, direkta ini nga ginpatuhoy mismo sa mga nagaantos sini nga balatian. Apang, nagaugyon kami, nga dapat mahibaluan sang mga abyan kag mga katapo sang pamilya ang makahalalit nga mga epekto sang artraytis kag dapat magtinguha nga mangin mabinuligon kag masinakdagon.​—ED.

Madamo nga salamat sa pagbalhag sining artikulo. Treintay uno anyos ako kag nagaantos gikan sa grabe nga kasakit sang artraytis. Ang kalapyo nagdala sing kapung-aw, kasubo, kag kabang-awan. Apang nakabatas ako bangod natigayon ko ang espirituwal nga kapagros nga tuman gid ka hamili sa akon.

T. R., Estados Unidos

Madugay na nga nagahulahulat ako nga ipaathag ninyo ini nga topiko, kag nalipay gid ako nga mabasahan ini. Nagaantos ako sing kasakit sang rheumatoid nga artraytis kutob sang siam ka tuig pa lamang ako. Walay sapayan sang kamatuoran nga yara kami kon kaisa sa tunga sang iban nga wala makahangop sing lubos sang amon mga palaligban, ginapakita ni Jehova ang iya interes kag ginapalig-on kami paagi sa mga artikulo kaangay sini.

P. C., Italya