Pula nga mga Pintok sa Nieve​—Lamang Kon Temprano sang Tigpamulak

“ORAS nga makit-an, indi malipatan; makadalayaw ang masanag nga pula sa nagalapos nga silak sang adlaw sa likod sang madulom nga danyag sang kagulangan.” Amo sina ang komento sang Western Forests, isa ka giya sa kinaugali nga libro sang Audubon Society sa nieve nga tanom, ang Sarcodes sanguinea. Mas matahom pa gid ini kon makita mo ini sing mas temprano, kon nagaulhot ini sa nabilin pa nga mga nieve. “Isa ka tumalagsahon nga tanom nga matambok, maunod, may masili nga pula nga duag, nga may mga sipad sa pungango nga nagakuritot sa mga bulak,” paathag sang Western Forests. Makita lamang ini sa bukidnon nga kagulangan sang conifer sa California kag bagatnan nga Oregon.

Ang tanom sa nieve isa sang mga saprophyte, isa ka grupo sang tanom nga wala sing berde nga butang, wala sing chlorophyll, kag busa wala nagahimo sang photosynthesis. Ang mga saprophyte nagakabuhi sa patay ukon dunot nga tanom ukon sapat. Ang mga uhong, mga agup-op, kag iban pa nga ubong kag bakteria mga saprophyte, apang lakip man sa sini nga grupo amo ang pila ka nagapamulak nga mga tanom. Isa sa ila amo ang tanom sa nieve.

Ang iban sang matag-as nga mga tanom sang saprophyte nagasandig sing lubos sa pila ka ubong para sa kalan-on, nga ginatawag mycorrhizal nga kaangtanan​—isa ka maayo nga kombinasyon sang isa ka ubong (myco) kag sang sistema sang gamot (rhiza) sang matag-as nga tanom. Sa amo nga mga kaso ang mga gamot sang saprophyte kinaandan nga kulang sing mga gamot. Ang mga ubong amo ang nagasuyop sang mga mineral kag tun-og. Ang The Encyclopedia Americana (International Edition) nagasiling: “Ang importansia sang mycorrhizae subong simbiotiko nga magkaupod natukiban sang talipuspusan sang ika-19 nga siglo ni Albert Bernard Frank, isa ka Aleman nga botanista subong resulta sang isa ka pagtuon sang pagpadamo sang mga truffle para sa gobierno sang Prussia.”