Isa ka Daw Habol sang Tigtulugnaw

NAEKSPERIENSIAHAN mo na bala nga himutaran, nga may daku nga kawili, ang nagaulan nga nieve? Kon amo, walay duhaduha makasiling ka nga isa ini sang labing matahom kag malinong nga talan-awon​—⁠labi na gid kon hilway ka sa katalagman kag nainit-initan sa sulod sang puluy-an kag wala sing kaladtuan. Samtang nagadamol ang puti nga habol, daw nagakulap ini sing daku nga kalinong kag katawhay sa palibot. Bisan ang ginansal sang siudad ginapaugdaw samtang nagaulan ang minilyon ka tinipik sang kalum-ok nga nieve.

Apang, indi bala katingalahan, kon paano ang daw subong kalum-ok nga tinipik sang nieve mangin mahaliton? Ang masako nga mga siudad kaangay sang Nueva York​—⁠sing masami ginalaragway nga amo ang “siudad nga wala nagakatulog”⁠—​mahimo mapilitan sa pagdulog kon ang nieve nagatangkas na sing tuman kataas.

Gani, indi katingalahan nga ginpamangkot sang Dios ang matutom nga tawo nga si Job: “Nakasulod ka bala sa mga bahandian sang nieve, ukon nakakita ka bala sang mga bahandian sang ulan nga yelo, nga gintigana ko batok sa tion sang kagamo, batok sa adlaw sang pag-away kag inaway?” (Job 38:​22, 23) Sa idalom sang pagkontrol sang Manunuga sini, si Jehova nga Dios, ang nieve mahimo gid mangin isa ka makusog nga hinganiban.

Walay sapayan, sing masami ang nieve may bahin man sa pagtipig sang kabuhi sa baylo sangsa paglaglag sini. Halimbawa, ang Biblia nagasiling nga ang Dios “nagahatag sing nieve kaangay sang de-lana.” (Salmo 147:16) Paano ang nieve kaangay sang de-lana? Nagagamit ang Biblia sing nieve kag de-lana sa paglaragway sang pagkaputi kag pagkaputli. (Isaias 1:18) Apang may yara isa pa ka importante nga kaanggid. Ginagamit ang nieve kag de-lana subong mga insu­lator. Ang The World Book Encyclo­pedia nagasiling: “Ang de-lana . . . nagasagang sang tugnaw kag init.” Kag kon tuhoy naman sa nieve, ang World Book nagasiling nga ini man “sarang magamit subong maayo nga insu­lator. Nagabulig ang nieve sa pag-amlig sa mga tanom kag sa nagapahimunong nga mga sapat gikan sa matugnaw nga hangin sang tigtulugnaw.”

Gani sa dason mo nga pagtan-aw sang nieve nga nagaulan gikan sa langit, mahimo hunahunaon mo ang pagkahalangdon sang gahom sang Dios. Ukon mahunahuna mo ang mapinalanggaon nga pag-amlig nga iya ginahatag samtang ginahumlad niya ang daw habol nga maputi sa iya tinuga, kaangay gid sa mahigugmaon nga ginikanan nga nagakugos sa bata sing maamligon pakadto sa iya tululugan.