Makahalit Gid Bala sa Imo ang Musika?

HANDURAWA ini: Gin-agda ikaw sang imo abyan sa trabaho nga manihapon sa iya balay. Nagsugot ka. Samtang nagahinagob ang gab-i, natukiban mo ang pila ka makakilibot nga mga kamatuoran nahanungod sa imo tagbalay. Isa sia ka sadista, may huyog sa paghikog, bastos maghambal, kag pabor sa pagsimba sa Yawa. Karon, luyag mo pa bala maghinguyang sing isa pa ka gab-i upod sa iya? “Indi!” sabat mo.

Dugang pa, ano kon ginrekord sining abyan mo ang iya tiko nga mga pagpati kag mga panimuot sadto nga gab-i kag ginhatag sa imo ang tape. Ipadayag mo bala ang imo kaugalingon sa sulitsulit nga pagpatokar sini? Mahimo nga indi.

Apang, ang kamatuoran amo nga minilyon karon ang nagapadayag sang ila kaugalingon paagi sa sini. Subong resulta, madamo sang nagapamati sa sining musika ang nagailog sang panghunahuna kag panimuot nga ginapalig-on sini.

Ano nga musika ang ginapatuhuyan namon? Makapalain nga mga impluwensia ang sarang masapwan sa halos tanan nga estilo sang musika. Bisan pa kon pasulabihon sang isa ang klasikal, jazz, ukon iban pa nga sahi sang musika, kinahanglan ang paghalong kag pagkamapilion.

Apang, may yara pila ka porma sang musika nga maathag nga nagapresentar sing malain gid nga mga tema. Isa ini ka pinasahi nga hangkat. Ginlaragway sang U.S.News & World Report ang nagapanguna nga tema sang heavy metal nga musika subong “pagrebelde sang mga pamatan-on, nga puno sing masingki nga sekso kag kon kaisa sing mga ideya sang paghikog.” Si Dr. David Elkind naghambal tuhoy sa pila ka rock nga grupo nga “kalain gid bangod sang ila bastos nga panghambal kag panghulag amo kon ngaa naulamid nila ang bug-os nga industriya sang rock nga musika.” Sa iban nga mga duog ang pila ka album sang mga plaka kag mga tape gintapikan pa sing paandam batok sa malaw-ay nga kaundan sini.

Sobra lamang bala ang reaksion sang mga tawo sa musika nga wala nila naluyagi, ukon may yara gid bala rason nga mabalaka? Usisaon naton sing maayo ang pila sang rock nga musika nga nagalab-ot karon sa daku nga mga bahin sang publiko paagi sa mga album sang mga plaka, mga video sang musika sa telebisyon, kag sa mga konsierto nga aktuwal nga ginatan-aw. Usisaa kon paano naapektuhan ang mga tawo. Nian hukmi kon bala ini nga kalingawan walay halit ukon hilo sa hunahuna. Butang bala ini nga dapat mo pamatian ukon sang imo pamilya ukon mapadayag sa sini?